1 Pita 2:11 - Nupela Testamen long tokples Kandas

¹¹ A kum wakak na paspasang, mot kis na usiro nin una rakrakon bual, awu sur anumot a tamon ri. I mo ra a saring mot, sur gong mot mur a kum sakino nemnem ina pinimot, ra det inaim nama niomot.

1 Pita 2:11 Referans Kwoze

Galesia 5:24

A taro anun o Karisito Iesu, det sak wat a sakino nemnem ina pinindet unin nanai kutus anun o Karisito.

1 Pita 4:2

Ra ke pitar tari mo anun a nilaun una kum laulau na nemnem. I pitar tari mukut sur in mur a nemnem anun o God.

Ibru 11:13

A taro rop ri det nurnur tuk ra det mat. Ra det laun nin upiso, ka det utur ukai a kum utna ra o God i sa uliliman tar det nami. Det tama i kut tagitiro bakbak, ma det gas pasi. Ma det watungi un det ut lena, det kis na usiro kut, ma det in laun lilik pas kut nin upiso.

A Pas anun o Pol torom a taro Rom 8:13

Uni ra mot mur a sakino nemnem ina pinimot, mot in mat. Ikut, ra una dekdekin a Tokodos na Nion, mot in um doko ru a kum sakino petutna ra a pinimot i ser pami, mot in laun.

Jems 4:1

Asau a kibino ra mot waim ma mot engaras etetalai? I kibino una numot a kum laulau na nemnem ra det waim una numot a nilaun.

2 Timoti 2:22

Un nan gisen gusun a kum nuknuk na barman, ma un mur a tokodos na petutna, ma a nurnur, ma a marmaris ma a malmal, tomo nam det ra det ser wararing torom a Labino nama tokodos na nuknukin det.

2 Korin 7:1

A kum wakak na paspasang, dat sa rakon pas a kum liliman ri, ra i wakak sur dat in utalapor pas dat gusun a kum utna rop ra i udur a pinindat ma a niondat. Ma dat in talapor rop, uni dat urur doko torom o God.

A Pas anun o Pol torom a taro Rom 12:1

I mo ra a kum tistising, a saring mot sur mot in pitar tar a pinimot rop torom o God, uni o God i maris doko mot. Mot in pitari elar nama etabor ra i laun, ma katu dur uni, ma i elar nam anun a nemnem ut. I ra anumot a lotu mulus torom o God.

Epeses 4:1

A kis una karabus uni a papam torom a Labino. Anung a dekdek na sasaring torom mot i lenri: Mot in laun elar nama nilaun ra o God i sa kabo pas mot suri.

A Pas anun o Pol torom a taro Rom 7:23

Ikut, una kum du pining a tama i kai ara se ngas na dekdek, ra ke mur a Warkurai anun o God. I waim tomo nama wakak na warkurai kuri una nuknuking, ma i ker ukai iau sur an kis una karabus anun a sakino petutna, ra i ser papam una kum du pining.

Aposel 15:29

Gong mot wan tu utna ra di sa etabor taru nami torom a kum torotoro na god. Gong mot wan tu utna ra ka di gos wakak a gap gusuni, ma tu wewegua ra di pos doko i kut, ra a gap kura utmakai uni. Ma gong mot pam a kum petutna na pamuk. Ra ka mot in pam a kum utna ri, in wakak torom mot. I kut ra, ma i rop. A marmaris torom mot.

Luk 21:34

“Mot in tumarong mot, sako mot in balon nama pam lukaro ma a ininum, ma a nginara sur a kum utna una nilaun nin upiso, ma a bung ra in nanpat kisin torom mot elar namin nukun.

1 Pita 1:17

Ra mot ser wararing, mot watung o God, a Tamamot. I wakak ra mot in laun nama nginara umatano, una anumot a kinkinis na usiro nin una rakrakon bual, uni i ra, in warkurai a taro rop nama tokodos na warkurai, una kum utna rop ra det sa pam tari.

2 Korin 6:1

Met papam tomo nam o God, ra met saring mot, sur gong mot ukio orosi kut a marmaris anun o God torom mot.

2 Korin 5:20

I mo ra met tur ukinalong o Karisito. Ra met wasiso, i elar nam o God ut i saring mot sur mot in emarom nami, ma met saring mot una risan o Karisito, sur mot in emarom nam o God.

Aposel 15:20

Dat in tumtumus torom det, ma dat in inanos det lena, det in mur a kum warkurai kut lenri: Gong det wan tu utna ra di sa etabor taru nami torom a kum torotoro na god, uni a ngas na lotu lenri i udur a utna na inangon. Gong det pam a kum petutna na pamuk. Gong det wan tu utna ra ka di gos wakak a gap gusuni, ma tu wewegua ra di pos doko i kut ra a gap kura utmakai uni.

1 Pita 1:1

Iau o Pita, a aposel anun o Iesu Karisito, a tumtumus torom mot ra o God i sa pilok pas mot, ma mot kis sarara elar nama kum usiro una kum papor Pontus, Galesia, Kapadosia, Asia ma o Bitinia.

Epeses 2:19

I mo ra, mot awu melet mo sur a kum usiro, awu. Uniri mot takai mukut nama taro anun o God, ma mot a kabotaro mulus anun o God.

Ibru 6:9

A kum wakak na paspasa met, met sa watung tar a kum dekdek na wasiso ri torom mot. Ikut met nurnur lena, mot mur a wakak na petutna ra i sot una taro ra o God i sa ulaun pas det.

1 Pita 4:12

A kum wakak na paspasang, gong mot kisin ra di lar mot nama kum dekdek na maut, elar nama sungun i tun mot, ma gong mot nuki lena tu matok na utna i wanpat torom mot.

2 Pita 3:1

A kum wakak na paspasang, a pas ri, i a manru na pas ra a tumusi torom mot. Ma una aru pas rop ri, a unuk melet tar mot una kum utna ra mot sa tasmani, sur an ukatutur a nuknuki mot sur in tokodos.