1 Korin 1:18 - Nupela Testamen long tokples Kandas

¹⁸ Uni a wasiso unin nanai kutus, a longlong na wasiso kut torom det ra det wan sur a iniru. Ikut, torom dat ra o God i ulaun dat, a wasiso unin nanai kutus, i a dekdekin o God.

1 Korin 1:18 Referans Kwoze

1 Korin 2:14

Ikut, osi ra a Tokodos na Nion ke kis uni, ken utur ukai a kum etowo, ra i wanpat gusun a Nion o God. Uni a kum etowo ra, a kum longlong na utna kut toromi. Ma ken tasman lele a kum etowo, uni a Tokodos na Nion ke kis uni sur in utalapori toromi.

A Pas anun o Pol torom a taro Rom 1:16

Ka maimai una Wakak na Wasiso, uni i a dekdekin o God sur in ulaun pas a taro rop ra det nurnur. Torom met a taro Juda mugu, ma uniri torom mot kai, ra awu sur a taro Juda.

2 Tesalonaika 2:10

Una kum ngas na sakino rop ra in pami, in toro a taro ra det wanan sur a iniru. Det in iru, uni ka det mulaot sur det in nem a lingmulusino, sur o God in ulaun det.

2 Korin 4:3

Ma a Wakak na Wasiso ri, ra met ser wasiso puaso uni, ra in parau, in parau kut torom det ra det wan sur a iniru.

1 Korin 1:21

Uni, una mananos anun o God, i pami sur a taro una rakrakon bual ka det in pet lari sur det in tasman o God una mananos anundeti ut. A wasiso ra met warawai nami, a taro det nuki lena a longlong na wasiso, ikut, una wasiso ra, o God i gas sur in ulaun det ra det nurnur.

1 Korin 3:19

Uni a mananos tagun a rakrakon bual ri, i a longlong na utna kut umatan o God. Elar nami ra di sa tumus tari una Buk Tabu lena, “I ser kun ukai pas a kum tene mananos nama nundet a mananos ut.” Jop 5:13

1 Tesalonaika 1:5

uni a Wakak na Wasiso ra metul upuaso i, awu sur i wanpat torom mot elar nama wasiso kut, awu. I wanpat tomo nama dekdek ma a Tokodos na Nion, ma mot longoro lele i ra mot pam ukai i una balamot. Ra metul laun nisamot, mot tasman wakak a magirametul, ra metul ser upuaso i sur in uwakak mot.

1 Korin 2:2

Ra a kis tomo nam mot, ka nem na nuknuk un tu utna gisen, awu. A nuknuking i kis kut un o Iesu Karisito ma una nun a minat unin nanai kutus.

Aposel 13:41

‘Tama i, mot a kum tene urongon un o God, mot in kisin ma mot in iru, uni an pam ara utna una numot a kum bung na nilaun. Ra taio in inanos mot una utna ra, ka mot in nurnur ut uni.’” Hab 1:5

Ibru 4:12

Uni a wasiso anun o God i laun ma i papam. I wangon doko taun in totok na inaim ra aru paporino der wangon. I ruk ra i totok tuk una nubual ra a niondat ma a balandat der etorom iai, ma tuk una nubual ra a kum sur det tugus tomo iai. Ma i kuro a kum nuknuk ma a kum nemnem nin ubalandat.

2 Korin 10:4

Uni a kum utna na inaim ra met waim nami, awu sur anun a rakrakon bual, awu. A kum dekdek na utna na inaim anun o God, ma det dekdek sakit sur met in rege a kum dekdek na woro nami anun a ebar.

1 Korin 15:2

Ra mot pam ukai dekdek a wasiso ra a sa warawai taru nami torom mot, o God in ulaun pas mot nama Wakak na Wasiso ri. Ra awu, mot nurnur oros kut.

Aposel 17:32

Ra det longoro a wasiso una nilaun melet gusun a minat, ara taro tagun det, det urongon laulau uni, ikut ara taro kai det watungi lena, “Met nemi sur un wasiso melet torom met una utna ri.”

Aposel 17:18

A kum tene mananos tagun a etowo anun a taro Epikurian ma a taro Stoik det wasiso tomo nami. Ara taro det watungi lena, “Asau ri a tene wasiso oros ri i inanos dat nami?” Ma ara taro kai det watungi lena, “Kutiro, i inanos dat una kum matok na god tagun tu tamon gisen.” Det watungi lenri uni i warawai nama Wakak na Wasiso un o Iesu ma a nilaun melet gusun a minat.

Aposel 2:47

Ra det watung ulabo pas o God, ma a taro rop det gas nam det. Ma una kum bung rop, a Labino i ulaun a susut na taro, ra di luk tomo det nama kum tene nurnur.

1 Korin 4:10

A taro det nuki lena met a kum longlong uni met ser mur o Karisito. Ikut mot, mot nuki lena mot sa mananos rop una numot a nilaun un o Karisito. Met, ka met dekdek, ikut mot, mot nuki lena mot dekdek. Mot, di ulabo pas mot, ikut met, di tama pisopiso met.

Ibru 12:2

Dat in tamtama tokodos sur o Iesu, i ra a kibin anundat a nurnur, ma i ra in ulabo pas anundat a nurnur tuk in kudulano. O Iesu i mat netes unin nanai kutus, a utna na maimai mulus. Ikut ke nuk pas a maimai ra, i pitar tari ut sur in taramo a ngunungut ma in mat unin nanai kutus, uni i tasmani lena, numur in los a labino gasgas. Ra uniri i sa kis una papor sot na laman a kiskis na king anun o God.