Sră Pơyoa Pol Dê Pơyoa Tit In 3:2 - Sră Goh 2018

² bañ bơrsèl tơnhial di cau lơi, bañ tòmpìt tòmhà, gơtòmsòr tĕ, bềng bơta niam lơnhơn gơwèt mơ jơh tơl nă cau.

Sră Pơyoa Pol Dê Pơyoa Tit In 3:2 Referans Kwoze

Ephesô 4:31

Sang tĕ bơh di oh mi jơh ală bơta sràt bơtang, gơjrañ mañ, gơhào nùs, nggồr nggàc, bơrsèl tơnhial, bal mơ jơh ală bơta bih khih.

Ephesô 4:2

Tòm ală bơta pal pơndêt să, niam lơnhơn, ơt ơl, ai nùs kòñ gơboh mơ kong ơt bal mơ gơp.

I Timôthe 3:3

Ò tơhìr tơrnòm alak, ò lơh rhung rhang, mơya pal sơrmah sơrmài; ò jòi jơnau, mơ ò hàm hà jền priă;

I Pier 3:10

Bơh, “Cau lơi kòñ gơboh bơta kis Mơ kòñ gŏ ală ngai niam, Gen pal kơrmap gàr lơmpiat bañ đơs jơnau iơh bơsak, Mơ sơndồi bañ đơs jơnau lac lèo,

I Pier 3:8

Lồi tơnơ̆, jơh tơl nă oh mi pal gơs dô nùs kơlôi bal, nđàc sơngit bal, kòñ gơboh di oh mi, gơs nùs lơbơn niam mơ pơndêt să.

Jakơ 4:11

Ơ oh mi, bañ đơs joh di gơp. Cau lơi đơs joh di oh mi he hala cahrña di oh mi he, hơ̆ la đơs joh di bơta boh lam, mơ cahrña di bơta boh lam. Mơya dilah mê cahrña di bơta boh lam gen mê ò di la cau lơh jat, mơya la cau cahrña di bơta boh lam.

Galati 5:22

Mơya plai Yàng Hwềng dê hơ̆ la kòñ gơboh, hòn chò, lơngap lơngai, kong ơt, kơ̆ dơn, lơbơn niam, dòn song,

Mathiơ 11:29

Bol mê tui tĕ yô Añ jê mơ bơtê jat Añ, bơh Añ gơs nùs niam lơnhơn mơ pơndêt să, gen hwềng soàn bol mê rơp geh rlô bòl.

I Pier 2:1

Behơ̆ oh mi sang lòi tĕ jơh ală bơta iơh bơsak, ală bơta lac lèo, ală bơta ma blac, nùs ƀoah gơjrañ, mơ jơh ală đơs bơrsèl tơnhial.

Jakơ 3:17

Mơya bơta jak chài bơh đang jòng gen lài ngan la sàng goh, tơnơ̆ tai la lơbơn niam, gơtòmsòr bal, ơt ơl, bềng lìu nùs kòñ nđàc mơ plai niam. Ò sền òsơp cau lơi hala ma blac.

Galati 6:10

Behơ̆ tòm tŭ gam gơs tơngai, gen bol he lơh tĕ broă niam jơh ală cau in, sơnròp ngan la ală cau tòm hìu nhă bơta dòn dê.

II Samuel 22:36

Yàng neh ai añ in khèl bơta dong klàs Kơnràñ dê, Yàng neh mù nàng lơh añ in geh dờng ryŭ.

Galati 6:1

Ơ oh mi, dilah gơs cau lơi nisơna gơtơntìs glài lơi, gen oh mi la cau gơs Yàng Hwềng, ai tĕ nùs niam lơnhơn nàng dong kòl bol khai; să tòm oh mi kơrmap gàr tĕ, rngòt kung gơkòl ơniai sơl.

I Timôthe 3:11

Cau ùr kung behơ̆ sơl, pal kràñ cê, ò di đơs iơh, pal git kơrhia mơ dòn song tòm jơh ală bơta.

I Tesalônika 2:7

Mơya bol hi neh ơm digùl oh mi dô bă niam lơnhơn, be dô nă mè kơnđơt kơnđu kòn tòm khai dê.

Philip 4:5

Ai tĕ jơh ală cau in git bơta kong ơt oh mi dê. Yàng neh rềp rau.

I Kôrintô 9:19

Bơh bulah añ neh geh khat gơboh gơwèt mơ jơh ală cau, gen añ kung kong lơh gơs dĭ gơna jơh ală cau in nàng añ in geh oă cau rlau.

Đơs Crih 140:11

Dan bañ lòi cau đơs jơnau blac chừt bơtào tơngguh tòm lơgar; Lòi bơta iơh mhar ting mòc bàn cau kòñ lơh iơh.

II Kôrintô 12:20

Bơh añ rngòt lah dơ̆ añ lòt tus, gen gŏ oh mi ò di be añ kơp kòñ, oh mi gŏ añ kung ò di be oh mi neh kơp kòñ. Añ rngòt tai lah gam gơs bơta tòm pơndang, ƀoah, gơjrañ kơuềng, cah is mpồl, đơs joh, jak đơs iơh, jòng să, nggồr nggàc tai mòn.

II Kôrintô 10:1

Añ la Pol, tòm tŭ ơm di đap oh mi gen lơbơn lơño, mơya tŭ neh ngkòi mat gen cha rma ngan gơwèt mơ oh mi. Añ ai bơta niam lơnhơn mơ bơta lơbơn niam Bơtau Krist dê mơ tơngkah oh mi,

Broă 23:5

Pol ho lah: “Ơ oh mi, añ ò git khai la cau gơnoar dờng lam bồ ơn phan duh khoai ò, bơh neh cih lah: ‘Bañ đơs iơh di cau kwang at bồ làng bol he.’”

Jơnau Pơnđik 25:24

Chan ơm dô mum hơđang rkàng hìu, niam rlau mơ ơm bal hìu mơ cau ùr jak tòmlah.

Jơnau Pơnđik 6:19

Cau lơh cơng ò song mơ đơs jơnau blac, bal mơ cau rsìh bơta tòm pơndang digùl hìu nhă he.

Jude 1:10

Mơya ală cau do bơrsèl tơnhial di ală bơta bol khai ò git wă, ai ală bơta bol khai jat bơta òs mơ git kung be ală phan poan jơng ò gơs dơngoh kơlôi, gen bol khai kòl tơnroh bơh ală bơta hơ̆.

Jude 1:8

Bulah behơ̆, ală cau gơlơh be mpau do kung jat dô gùng hơ̆ mơ lơh ƀơ̆ ƀơl să jan he, pơndang sang gơnoar at bồ, mơ bơrsèl tơnhial di ală gơnoar dờng ryŭ.

II Pier 2:10

lài ngan la ală cau lơh lòt jat nùs hàm kòñ is ngkòr ngkàc poac să dê, mơ sền òsơp di ală gơnoar Yàng dê.

I Pier 4:4

Bol khai gŏ oh mi tŭ do ò jat bol khai lơh bơta gơlềng gơlàng ală alai hơ̆, gen bol khai ai lơh krơi mơ đơs iơh di oh mi,

I Kôrintô 6:10

cau ntung kơñau, cau hàm hà, cau bơñul lơmbè, cau lah sơrpah, cau sa kwà, jơh ală cau hơ̆ ò geh pơrdòn lơgar Yàng Tom Trồ.

Esai 40:11

Kơnràñ ròng siam mpồl Kơnràñ dê kung be cau ê belàt; Kơnràñ pơjum tơrgòm ală belàt kòn tòm tơwòr tê Kơnràñ dê, mơ kơnđu bol gơ rềp di nùs Kơnràñ dê; Kơnràñ tề lam dô bă lơbơn niam ală belàt me gơs kòn gam pô.

Jơnau Pơnđik 19:19

Cau jak gơhào gơjrañ jàñ bơsak, rơp kong àñ glài; bơh dilah kòn dong tă khai, ngan pal dong tă wơl tai.