Daniel 9:13 - Sră Goh 2018

¹³ Jơh ală bơta rung rài do neh tuh hơđang bol hi tòm toh be neh cih tòm bơta boh lam Môise dê. Bulah behơ̆ bol hi kung ò rac dan bơta nđàc Jehôwa Yàng Tom Trồ bol hi dê, pơrlac sang bơh bơta iơh bơsak bol hi dê, mơ ơn nùs kơlôi dê bơta dòn song Kơnràñ dê.

Daniel 9:13 Referans Kwoze

Daniel 9:11

Jơh tơl nă cau Israel neh lơh tìs mơ bơta boh lam Kơnràñ dê mơ dô pleh, nàng ò dòn bơr Kơnràñ. Behơ̆, bơta srat sơntơm, mơ bơta lơh glài neh cih tòm bơta boh lam Môise la cau duh broă Yàng Tom Trồ dê, neh tuh hơđang bol hi, tài bơh bol hi neh tìs glài tòmdră mơ Kơnràñ.

Jeremi 2:30

“Añ neh pù lơh kòn sau bol mê dê la ò kwơ; Bol khai ò bài dòp bơta bơto sồr. Đào bol mê neh tơnroh ală cau gơnoar hwơr, Be klìu triă phà tơnroh.

Esai 9:13

Mơya làng bol ò rê wơl hơ Bơtau neh lơh glài bol khai, bol khai kung ò jòi Yàng Jehôwa Gơnap Gơnoar Dờng.

Sră Ôse 7:10

Bơta pơnhừ să Israel dê lơh cơng tòmdră mơ khai, bulah behơ̆ khai ò rê wơl hơ Jehôwa la Yàng Tom Trồ khai dê, hala jòi jat Kơnràñ.

Jeremi 31:18

Ngan, Añ neh kơno Epraim ñìm rac: ‘Kơnràñ lơh glài tơmàl añ, añ kong bơta lơh glài; Kung be dô nơm kơnrồ dam òhềt tui yô. Cèng brê tĕ añ, lòi añ in rê wơl, Bơh Kơnràñ la Jehôwa Yàng Tom Trồ añ jê!

Jeremi 5:3

Ơ Yàng Jehôwa, mat Kơnràñ ò di wèt sền bơta song ngan ơ? Kơnràñ neh pù lơh bol khai, Mơya bol khai ò gŏ jê sồt, Kơnràñ lơh tơnroh bol khai, Mơya bol khai kung ò bài dòp bơta bơto sồr. Bol khai lơh muh mat bol khai kră rlau mơ lŭ, bol khai ò bài rê wơl.

Đơs Crih 119:27

Dan lơh añ in git wă gùng dà jơnau sồr Kơnràñ dê, Gen añ rơp kơlôi sơnơng bơh ală broă crih crài Yàng dê.

Sră Jop 36:13

Cau ò dòn duh tòm nùs prap lòi bơta gơjrañ mañ; bol khai kung ò dan dong kòl tòm tŭ Kơnràñ cap bol khai.

Jakơ 1:5

Dilah tòm oh mi gơs cau lơi siơ̆u bơta jak chài, dan tĕ mơ Yàng Tom Trồ, gen Kơnràñ rơp ai, bơh Yàng Tom Trồ la Bơtau ai gòi tơl nă cau in dô bă ơnàng, ò lah pơrhơng cau lơi.

Ephesô 4:21

ngan oh mi neh kơno bơh Kơnràñ mơ geh bơto tòm Kơnràñ, jat be jơnau song tòm Yàng Jesu.

Jang 10:35

Dilah bơta boh lam sơnđan ală cau dòp geh jơnau Yàng Tom Trồ dê la yàng, (mơ jơnau Sră Goh ò rgơi sang lòi ò),

Jang 8:32

Bol mê rơp git jơnau song, mơ jơnau song rơp hồ toh bol mê.”

Jang 6:45

Tòm ală sră gơnoar hwơr neh cih lah: ‘Jơh tơl nă cau rơp geh Yàng Tom Trồ bơto sồr.’ Kòp nă cau lơi neh iat mơ bơtê bơh di Bèp, gen lòt tus hơ Añ.

Luka 24:45

Gen Kơnràñ pò dơngoh kơlôi bol khai dê nàng git wă Sră Goh,

Sră Ôse 7:14

Bol khai ò hòi dan mơ Añ bơh nùs bol khai dê, mơya bol khai pơt wòl hơđang cơnòng bic bol khai dê. Bol khai còr să tòm bol khai nàng dan kòi mi mơ tơrnòm, bol khai pơrlơ̆ dră di Añ.

Sră Ôse 7:7

Jơh tơl nă bol khai duh be dô nơm bơnhă ồs, mơ bol khai sa loan ală kwang at bồ bol khai dê. Jơh ală cau bơtau bol khai dê kòl gơplơ̆ gơpừ, mơ ò gơs dô nă lơi tòm bol khai hòi dan mơ Añ.

Ñìm Rac 5:21

Khoai Yàng Jehôwa, dan bơtào bol hi wơl hơ să tòm Kơnràñ, gen bol hi rơp geh bơtào wơl, Lơh pa wơl ală ngai bol hi dê kung be yau òr!

Jeremi 44:27

Añ rơp drơng kơp nàng tơndùh bơta rung rài bol khai in mơ ò tơndùh bơta lơngai; kòp nă cau Juda ơm tòm lơgar Ejiptơ rơp kong tơnroh bơh pềs tà mơ jơgloh rung jơl tus neh tơnroh jơh.

Esai 64:7

Ò gơs dô nă cau lơi hòi dan di sơnđan Kơnràñ, hala pơnđơl pràn nàng at di Kơnràñ; bơh Kơnràñ neh pồn mat bơh di bol hi, mơ lòi bol hi kong roh rui tài bơh tồi glài bol hi dê.

Esai 42:9

Sền ne, ală bơta yau neh gơlik gơs rau, mơ Añ yal tơnggit ală bơta pa; Añ yal tơnggit bol mê in lài mơ tŭ gơ gơlik tus.”

Đơs Crih 119:73

Mpàng tê Yàng neh crơng gơs añ mơ mòn rùp să añ; Dan Yàng ai añ in bơta git wă, nàng añ bơtê bơta sồr lam Kơnràñ dê.

Đơs Crih 119:18

Dan Yàng pò mat añ, Nàng añ in sền gŏ ală bơta crih crài tòm bơta boh lam Kơnràñ dê.

Đơs Crih 85:4

Ơ Yàng Tom Trồ la Bơtau dong klàs bol hi, dan bơtào wơl bol hi, Mơ tă sang bơta gơhào nùs Kơnràñ dê gơwèt mơ bol hi.

Yal Wơl 29:4

Mơya jơl tus di tŭ do Yàng Jehôwa òhềt ai bol mê in dơngoh jak nàng git wă hala ală gar mat nàng sền gŏ hala ală trồm tồr nàng kơno.

Esai 31:1

Bòl glar ală cau in mù hơ Ejiptơ nàng dan dong kòl, kơnòm di ală ơseh, kơnòm di oă ngan rơndeh lòs tòmlơh mơ kơnòm di bơta pràn kơldang oă ngan ală cau ling hào ơseh dê, mơya ò sền tơnggòr di Bơtau Sàng Goh Israel dê, hala jòi lùp Yàng Jehôwa.

II Ală Bơtau 22:16

Yàng Jehôwa đơs be do: Ngan Añ rơp cèng bơta rung rài tus hơđang tiah do mơ hơđang làng bol ơm tòm hơ̆, lơh wil tơl ală jơnau tòm sră mơ bơtau Juda neh sền.

Esai 43:22

Mơya, ơ Jakôp, mê neh ò hòi dan mơ Añ, Ơ Israel, mê neh kong bòl glar să tòm mê dê Añ in.

Esai 64:6

Bol hi jơh tơl nă neh gơlik gơs kung be dô nă cau ƀơ̆ ƀơl, mơ jơh ală broă song ring bol hi dê la kung be ală ào ƀơ̆ ƀơl; bol hi jơh tơl nă ñòp ro kung be dô nơm nha, mơ tồi glài bol hi dê kung be càl khồm pơrdô bol hi roh thit.

Jeremi 30:14

Ală cau kòñ gơboh mê neh hŭi mê, Ò kơlôi rcang mê in dô êt lơi; Bơh Añ neh lơh mê kong sồt kung be cau sò tơm lơh, Lơh glài mê kung be cau rhung rhang lơh glài, Tài bơh bơta tìs glài mê dờng ngan, Tồi glài mê oă ngan.

Jeremi 44:23

Hơ̆ la tài bơh bol mê neh chu kơlhô mơ neh tìs glài tòmdră mơ Yàng Jehôwa, bơh bol mê ò dòn jat jơnau Yàng Jehôwa, mơ ò cơnđòa jat bơta boh lam, gơnoar sồr, mơ bơta bơto sồr Kơnràñ dê, gen tàng bơta rung rài do neh dùh bol mê in, kung be neh gơs jơl tus ngai do.”

Ejekiel 16:43

Tài bơh ai ò kah ală ngai tòm tŭ ai gam kơnòm să, mơya neh lơh Añ in gơhào gơjrañ bơh jơh ală bơta do, gen ngan la Añ rơp tơndùh hơđang ai ală bơta ai neh lơh,’ Jehôwa Yàng Tom Trồ đơs behơ̆. Ai ò di neh bơtơl bơta rềs àr bơrnàn tòm ală broă cù kìr ai neh lơh ò ơ?