Yohana 21:15 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹⁵ Pĩna naakondia kwilĩa, ũYesu numuĩĩla uSimoni Petelo, “Simoni shaYohana, undoiluene kwikĩla ĩa?” Numuĩĩla, “Eeze Shekulu, uue umanile kĩna nukuloilue.” Numuĩĩla, “Lĩĩsia ĩaana-nkolo aane.”

Yohana 21:15 Referans Kwoze

Alumĩ 15:1

Ishie gua, yukũjĩpĩĩle nakutĩĩte ingũlũ kuusole uuneketũ wa aasio naagila ingũlũ, kuleke kĩloeelia undiishie.

1 Yohana 4:19

Iishie kutĩĩte uuloogua kunsooko muene alukuloogilue umuandio.

1 Petelo 1:8

Nduyo mumuloilue pĩna sika mumuoonie; kanga ĩsika mumuoonie unzuauu nakĩĩ, musuĩlĩĩle mumuakue nukwilumbĩkia kuulumbi nasika usũũmĩkile kwitambulua, kangĩ naukũmigue.

Aepeso 6:24

uUkende wĩĩ palumuĩ nĩensi naamuloogilue ũShekulu wĩĩtu, Yesu Kilisito kuuloogua naugila kampelo.

Utendi 20:28

ĩkendegeelĩ uniinie akola, nidyale liensi paasio pĩna uMuau Muelu umuĩĩkile inie muĩ akendegeeli, mulĩdĩĩme ikyanisa lya kĩNzua naalĩ wĩligĩĩlie kumugali waakue umuene.

1 Yohana 5:1

Tũlũ wensi nukusuĩĩla kĩna ũYesu ingĩ Kilisito mulelue nuNzua. Tũlũ wensi nukumuloogaguaa umukola kulela, ukumuloogaguaa ninduzo namulelue nduyo.

Yohana 16:27

Kunsooko uTata muene umuloilue inie, kuitĩ inie mwandoilue nukwishuĩĩla kĩna ĩne alĩ mpũnile kwa kĩTata.

1 Petelo 2:25

Kuitĩ alĩ mualĩĩ zĩ nkolo nazipaaluukile, ĩpaiino mwamushookelaa uMudĩĩmi, nuMukendegeeli wa nkolo zaani.

Aebulania 4:13

Sunga kyukutilĩ kakĩumbe nakĩpisigue ntongela yaakue, ĩpa itĩ tũlũ-tũũlũũ igyelĩĩle kualiĩ nukwikũnukulua pamiiso maakue nutĩĩte impola zĩĩtu.

Luka 22:32

Ĩpa nukulompelĩĩle ue, uusuĩĩli waako ulekiula; ninduue pĩna ukipĩluka, uzikamie inkolo za anũna aako.”

Aebulania 13:20

Ĩpa itĩ uNzua wa matiliga naalumupũnilie kwipũna muakiu uMudĩĩmi namukulu nwa nkolo, Shekulu wĩĩtu Yesu, kungũlũ ya mugali wilyago lya kalĩ nakalĩ,

Alumĩ 14:1

Uyo gua, namuneketũ muusuĩĩli musugamĩĩlie, ĩpa itĩ muleke kumukungumia ĩmasĩĩgo maakue.

Matayo 16:17

ũYesu nushookeelia, numuĩĩla, “Umukembetue Simoni shiYona, kuitĩ sika ĩnama nĩmĩgali nazukukũnukulĩĩle izi, ĩpa uTata waane nwa kwigyulu.

Ukũnukulua 2:23

nineene nĩkakuaulaga ĩaana aakue kuukiu. Nĩmakanisa tũlũ mikilĩĩnga kĩna neene nukukeesagiaa moo nĩnkolo. Nineene nĩkakumupeela muntu wensi kumiani kwilika lya utendi waakue.

1 Petelo 2:2

Zĩ aana naatakata naalelue ĩpaino maawĩ ĩmasunsu ma nkolo ĩma, tai, mukulĩle kumaasio mupikĩĩle uugũnua;

Agalatia 5:6

Kuitĩ mwa kĩKilisito Yesu, kwiaalamigua katia kwisiiitiaalamigua igila kangũlũ; ĩpa uusuĩĩli naukĩtumaa umulĩmo kunzĩla ya uloogua.

Yohana 21:12

ũYesu nuaĩĩla, “Nzuĩ mulĩe.” Ukutilĩ muamanigua nalugimilie kukumukolia, “uUe waani.” Alĩ amanile kĩna ingĩ Shekulu.

Yohana 21:7

Paapo umumanigua nuasio ũYesu naalumuloilue numuĩĩla uPetelo, “Ingĩ Shekulu.” uSimoni Petelo pĩna nũigia kĩna ingĩ Shekulu, nwĩtũnga ĩntiila kunsooko alĩ ukĩpũĩ, nutima munanza.

Matayo 18:10

“Laaĩ, muleke kumumela umuĩ wa ĩa naaniino, kuitĩ namuĩĩla kĩna ĩamalaĩka aao kwigyulu ntondo zensi akuulaaa uusiu wa kĩTata waane nuĩlĩ kwigyulu.

Aepeso 4:14

koona kulekitũla aana atakata, kangĩ ĩkwigumua kunu nukunu nukwikenkua kunzega zensi za mamania kuupembeelia wa antu, kuwĩsukukia naubĩĩ, ĩkwitiata ĩmiena ya ulimĩĩli.

1 Akolinto 8:11

Itĩ unuasio namuneketũ wilimĩĩligua kuulĩngi wako ninduyo ingĩ munũna wa uKilisito naalukiile kunsooko yaakue.

Yohana 8:42

ũYesu nuaĩĩla, “Kanga uNzua ĩTata waani aza mujilindoogua nineene, kuitĩ nijile mpũnile kwa kĩNzua; sika nijile ning'ene, ĩpa muene aluntumile.

Maliko 14:29

uPetelo numuĩĩla, “Kanga tũlũ ensi asuukue, ĩpa ĩne sika neene.”

Luka 12:32

Mulekioopoka inie namwidyale niino, kuitĩ uTata waani waloilue kukumupeela inie uutemi.

Matayo 10:37

Numuloilue ũshee katia unina kwikĩla ĩne, sika winjĩpĩĩle; numuloilue umuana namugoosia katia namukĩĩma kwikĩla ĩne sika winjĩpĩĩle.

Yohana 13:37

uPetelo numuĩĩla, “Shekulu, nĩkĩ sika nishũũma kukutiata ĩpaino? Nikipũnia uumĩ waane kunsooko yaako.”

Yohana 1:42

Numutuala kwa kĩYesu. ũYesu numutuupĩĩla, nuũga, “uUe Simoni muana wa kiYona. Ue ukiĩĩtua Kefa” (ndogolelio yaakue, Petelo).

Matayo 26:35

uPetelo numuĩĩla, “Kanga injĩpĩle nakĩ kwikia palumuĩ ninduue sika nĩkakukukaana kainiino. ĩAmanigua tũlũ naaũga iio-iioo.”

Matayo 26:33

uPetelo nushookeelia, numuĩĩla, “Kanga tũlũ ensi ashooke kunũma kunsooko yaako, ĩne sika nikitenda yaasio kainiino.”

Utendi 20:29

Ĩne manile kĩna pĩna nikilega, iyĩngi naataki ikiingĩla pakatĩ yaani nasika ĩkakulĩkolelua idyale.