Luka 6:23 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

²³ Lumbĩkiĩ palutondo luasio, mupũũte-pũũte, kunsooko laaĩ, uupeegua waani wingĩ mwigyulu. Kuitĩ yoi ĩatata aao alĩ aatendile ĩanakĩdagu.

Luka 6:23 Referans Kwoze

Ukũnukulua 21:7

Nudulile ukakumasaala aya, nineene nikitũla Nzua waakue, ninduyo ukitũla muana waane.

Ukũnukulua 3:12

Uyo nudulile nĩkakumutenda wĩĩ kĩsĩmbĩlĩ munumba ya kĩNzua waane; sikukipũna kangĩ muasio. Nineene nikiandĩka mumuakue ĩliina lya kĩNzua waane, nĩliina lya kaa ya kĩNzua, Yelusalemũ nampia, niikile kwipũna kwigyulu kwa kĩNzua waane, nĩliina liane ling'ene nĩpia.

Ukũnukulua 3:5

Uyo nudulile ukijialua majialo nameelu, kangĩ sika nikilimansĩĩlia ĩliina liakue mukĩtabũ kya upanga. Nineene nĩkakulĩkũmuula ĩliina liakue ntongela ya kĩTata waane, kangĩ ntongela ya amalaĩka aakue.

Utendi 5:41

Iio gua, ndĩo naapũna mũlindĩ liasio, nailumba kunsooko alĩ aalĩĩligue kĩna alĩ ijĩpĩĩle kwimelua kunsooko ya liinaa liakue.

Matayo 5:12

Lumbĩ nukwilumbĩĩlia; kuitĩ ĩkĩpeegua kiani ĩngĩ kĩkulu kwigyulu; kuitĩ iio aliaaagilie ĩanakĩdagu naalĩ amutongelĩĩle.

Ukũnukulua 2:26

Ninduyo nudulile nukukuukendegeela uutendi waane sunga ĩmpelo, nĩkakumupeela usũũmi kundugu,

Ukũnukulua 2:17

Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa. Nudulile nĩkakumupeela kwilĩa ityũmpĩ lya mana naalĩ mpisue, nineene nĩkakumupeela igyũe nalielu, numwigyũe liandĩkue liina nĩpia nasika wĩliĩzĩ kamuntu, isiititũla nukulianũnkulaa.”

Ukũnukulua 2:7

Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa. Uyo nudulile nĩkakumupeela walĩe inkali zikyota lya upanga naliĩlĩ muPaladiso ya kĩNzua.’”

1 Petelo 4:13

Ĩpa kĩna iio namukamantĩĩne muwaagi wa kĩKilisito, lumbĩkiĩ; koona numuukũnukulua wa ukulu waakue, mulumbe nukwilumbĩĩlia.

Yakobo 1:2

Anũna aane, pĩna mwiaagaana ĩmagemua namĩsia-sia, sĩĩgĩlĩ ya kĩna ulumbi utilĩ;

Utendi 3:8

Nupũũta, nuĩmĩka, nugenda; nũingĩla muNumba ya kĩNzua palumuĩ ndĩo, nwigenda, nwipũũta pũũta nukukumukũmazukia uNzua.

Aebulania 11:26

Nusĩĩga kĩna kwitukĩlua kunsooko ya kĩKilisito ingĩ ugolĩ ukulu kwikĩla imbĩĩka za Mĩsili, kuitĩ nalaaĩkia uupeegua wa pembele.

Aebulania 11:6

Ĩpa pĩna kutilĩ kausuĩĩli sika ishũũmĩkile kukumuloeelia. Kuitĩ wensi nukumusũgamĩlaa uNzua yumũjĩpĩĩle wasuĩĩle ya kĩna ukoolĩ, kangĩ ya kĩna ukuapeelaa uupeegua nauuza ĩaasio naakumudũũmaa.

2 Timoteo 2:12

Kanga kugigimĩlie, kukitema palumuĩ nduyo gaa; Kanga kumukaane uyo, uyo nduyo ukakukukaana ishie;

Akolosai 1:24

Ĩpaino nilumbĩĩlia uwaagi nanuutĩĩte kunsooko yaani, kangĩ nikijulĩĩlia waasio naukeepukile muwaagi wa kĩKilisito mumuĩlĩ waane, kunsooko ya muĩlĩ waakue nduo ikyanisa liakue.

2 Akolinto 12:10

Kunsooko ĩĩ numuloeeligue nuuneketũ, nuugaalĩlua, nuwaagigua, nuupaatigua, nuukoigua kunsooko ya kĩKilisito, kuitĩ pĩna numuneketũ, paapo ntĩĩte ingũlũ.

Alumĩ 5:3

Ĩpa sika iio dũũ, sunga kulumbile numunzago gaa, ĩkumanile kĩna uwaagi ukuleetaa ugigimĩlia,

Utendi 14:10

nuũga kululi lukulu, “Ĩĩmĩka kumĩgulu yaako, ĩgolole!” Nuuka kuukaaũ, nũigenda.

Luka 6:35

Ĩpa alooguĩ ĩanaulugu aani, atendelĩ naiiza, nukukualĩĩsia ĩmpaa mulekitũngĩla kakĩntu, nuupeegua waani ukitũla wingĩ, niniinie mukitũla aana aakue Nwa kukiania, kunsooko uyo ingĩ muuza kumuao naagila kausongelio, nĩalaku.

Luka 1:44

Laaa gua pĩna ululi lwa mĩlamu yaako lũingĩla muakutuĩ aane, ĩkaana kapũũta kuulumbi mundaa yaane.

Luka 1:41

uElizabeti pĩna nũigia ĩMĩlamu ya kĩMalia, ĩkaana nakapũũta mundaa yaakue, uElizabeti nwijulua nuMuau Muelu,