Ef 4:14 - Nouvo Testaman Kreol Morisien Harmonisation NTPS KM

¹⁴ Lerla nou pa pou kouma bann zanfan, ki balote, ki sakouye dan siklonn tou kalite doktrinn ki bann dimounn rize servi pou antrenn lezot dan lerer.

Nouvo Testaman dan Kreol Morisien

¹⁴ Lerla nou pa pou kouma bann zanfan, ki balote, ki sakouye dan siklonn toukalite doktrinn ki bann dimoun rize servi pou antrenn lezot dan lerer.

Ef 4:14 Referans Kwoze

Eb 13:9

Pa les toutsort lansegnman etranze anbet zot. Li bon ki zot fortifie zot leker avek lagras Bondie, e non pa par bann regleman konsernan manze. Bann ki finn obzerv sa bann regleman-la pa finn tir okenn benefis ladan.

1 Ko 14:20

Frer ek ser, pa rezonn kouma zanfan. Kan ena pou fer avek lemal, wi, la zot kapav kouma zanfan; me kan li konsern larezon, la zot bizin adilt.

1 Zn 4:1

Mo bann frer ek ser bieneme, pa met zot lafwa dan tou sort kalite lespri; teste zot pou gete si lespri-la sorti kot Bondie parski ena boukou fos profet ki finn vinn dan lemond.

2 Ko 2:17

Nou pa kouma boukou lezot ki fer trafik marsandiz ar Parol Bondie; okontrer parski Bondie finn avoy nou, nou koz avek sinserite dan so prezans kouma serviter Lekris.

Let Zak 1:6

Me demann avek lafwa, zame doute, parski seki doute li parey kouma vag lamer dirize par divan;

Ef 6:11

Met tou lekipman solda ki Bondie fourni; met li lor zot pou ki zot kapav reziste kont manigans diab.

Mt 24:24

Parski bann fos mesi ek fos profet pou vini; zot pou fer bann gran-gran sign ek mirak pou tronp mem bann ki Bondie finn swazir.

2 Tim 4:3

Ler pou arive kot dimounn pou nepli anvi ekout bon lansegnman. Zot pou prefer swiv zot dezir ek ekout bann predikater ki pou vinn met dan zot zorey seki zot anvi tande.

Let Zid 1:12

Zot prezans li enn skandal dan zot bann repa fraternel, kot zot fer fet san okenn laont e zot nek okip zotmem. Zot parey bann niaz ki pena lapli e ki divan pe pouse. Zot parey bann zarb ki mem dan lotonn pa donn fri, enn fwa derasinn zot, zot mor pou touletan.

Revelasion 19:20

Alor zot finn trap bebet-la anmemtan ki sa fos profet ki ti fer bann mirak dan so prezans la; ki ti sedwir tou bann ki ti ena mark bebet e ti ador so zimaz. Ti zet bebet-la ek fos profet-la dan enn landrwa ranpli ar dife ki brile kouma souf.

Ga 3:1

Ayo, bann Galat, ala zot bet! Kisann-la finn zet enn sor lor zot? Pourtan, devan zot lizie, zot finn gagn enn prezantasion kler kouma Zezi Kris finn krisifie lor lakrwa.

Mt 24:11

Boukou fos profet pou leve e pou anbet dimounn.

1 Zn 2:26

Mo pe ekrir sa lor size bann dimounn pe rod tronp zot.

2 Tim 3:13

Me tou bann fos krwayan ek bann sarlatan pou touzour fer progre dan lemal. Zot pou tronp dimounn ek zot pou tronp zotmem.

2 Ko 4:2

Nou finn renons bann plan ki fer dan kasiet ek dan laont; nou pena aksion ki desevwar lezot e nou pa falsifie Parol Bondie. Okontrer, nou fer konn laverite dan enn fason kler devan konsians tou dimounn dan prezans Bondie.

Mt 11:7

Apre ki bann disip Zan finn ale, Zezi koz ar lafoul lor size Zan, e li dir: “Ki zot finn al gete dan dezer? Enn fatak balanse dan divan?

1 Ko 12:2

Letan zot ti ankor payin, zot ti antrene ver bann idol ki pa koze.

Zistwar Bann Zapot 23:21

Pa ekout zot. Ena plis ki karant zom ki finn prepar enn piez pou li. Zot inn fer serman pou pa manze ek bwar ziska ki zot finn touy li. Zot finn pare, pe zis atann ou desizion.”

Psom 59:3

Get zot laba! Zot fite pou touy mwa; dimounn danzere finn konplote kont mwa, san ki mo finn fer okenn pese, SEGNER,

Psom 10:9

li res dan kasiet parey enn lion, li vey so ler pou atake; li ris bann pov, li trenn zot dan so piez.

1 Zn 2:19

Sa bann zans-la finn sorti kot nou me zot pa ti vremem ar nou, lakoz samem zot inn kit nou; parski si zot ti ar nou, zot ti pou res avek nou, me zot finn fer li kler ki personn parmi zot pa ar nou.

2 Pi 2:18

Zot fer bel-bel diskour ki pena sans; zot servi zot dezir obsenn pou piez lezot ki fek fini sap dan piez bann ki amenn move lavi.

Let Zak 3:4

Sinon, get bann bato, mem si zot larz e bizin gro-gro divan pou pous zot, pourtan zot dirize par enn ti gouvernay, e kot kapitenn-la anvi fer zot ale, zot ale.

1 Tim 3:6

Fode pa osi ki li fek konverti, ki li pa ankor fer so prev. Lorgey kapav mont dan so latet e li fini kouma diab.

2 Tim 1:15

To kone, tou bann ki dan provins Lazi, finn tourn ledo ar mwa, parmi ena Fizel ek Ermozenn.

1 Ko 3:19

Lasazes dapre sa lemond-la, li enn foli devan Bondie. Lekritir dir, “Bondie may bann saz dan zot prop riz.”