Romans 3:31 - Sa Ugud Apudyus

³¹ Ḵad idiyan taḵu ḵad ain lintog gapu si annae pammati? Naid! Yaḵon ipaila taḵu we tuttuwa pion ni lintog ḵanan.

Romans 3:31 Referans Kwoze

Galatians 2:21

Adiḵpun idiyan ḵinabaḻun Apudyus. Nu maun-unan tagu si sinagung Apudyus gapu'tte anuttuwaana'tte lintog, naippun ain anun ni natoyan Kristu!

Matthew 5:17

Pune sadi ḵanan Jesus, “Adiyu sosomḵone ummaliyaḵ ta iyyaḵ waswason da lintog Moses ya da inggilin da profeta yaḵon ummaliyaḵ ta ituttuwaḵ da imbagada.

1 Corinthians 9:21

Isun ni antuttuduwaḵ atta Gentil we adidapun unudon lintog da Judyu, ambalinaḵ aḵ dogada ta adu da maawisḵu ḵan dida. Yaḵon daḵampun aḵ ḵanaḵe adiḵ tuttuwaon Lintog Apudyus te sissiyae unudoḵ da lintog Kristu.

Romans 10:4

Te aḵ Kristu anungus ni lintog ta da losane amati, aḵ Apudyus angwa ḵan dida'ḵ maun-unan atte sinagungna.

Romans 8:4

Ḵatti ḵingwan Apudyus ta maḵwae tuttuwaon taḵu we ustu da bilin atte lintog. Pagatupan taḵu we angunud atte pinion ni Ispiritu Santu we daḵampun atte pinion taḵu.

Galatians 2:19

Te gapu si lintoge adiḵpun lamog unudon, inigammuḵe naḵoddonganaḵ aḵ matoy ya misinaaḵ ḵan Apudyus. Pun ibelangḵu we natoyaḵ mipanggob atte lintog ta mataguwaḵ para ḵan Apudyus.

Romans 7:25

Anggappiyaaḵ ḵan Apudyus te siya abus aḵ anagu ḵan saḵon mipagapu ḵan Jesu Kristu we Apu taḵu. Pun sa annae ḵasasaadḵu, sa somsomoḵḵu pioḵe anserbi'tte Lintog Apudyus yaḵon sa long-agḵu piona anserbi'tte lintog ni basuḻ.

Romans 7:22

Te sa somsomoḵḵu, amod de ayatḵu si Lintog Apudyus.

Romans 4:14

Te nu maatod inkarin Apudyus atta anuttuwa si lintog, ippun ogon anun ni pammatin da tagu ḵad ippun anun ni inkarin Apudyus.

Romans 3:4

Naid! Te tuttuwa'ḵ Apudyus, taḵon ay nu tuliyan da losane tagu. Te sa nigili ye ugudna ḵanana, “Nu taḵdoḻam mismu we long-agnu, ipailame ustu da ḵingwam ḵan pasige oḻgom da losane amabasuḻ ḵan siḵa.”

Matthew 15:6

Ḵatti ḵamman inonyu we angipatog atta amayu ḵan inayu? An-awidanyu Ugud Apudyus ta siya unudonyu ugalin da danaḵḵoḻyu.

Matthew 5:20

Pun sa ibagaḵ, ḵaḻabbonganyu we midoga si ampangatan Apudyus nu amo naun-unan ḵayu nu da mimistulun ni lintog ya da Pharisee.”

Matthew 3:15

Yaḵon ḵanan Jesus we summongbat, “Ḵoom sinsadi te ustu nu ḵoon taḵu anna ta ituttuwa taḵu da losane pinion Apudyus.” Pun binonyagan John.

Luke 20:16

Dumatong ḵad, gongatona dida ya impaayyuwanna'tta udume tagu mumuḻḻaan atta de grape.” Dingngoḻ ḵad da tagu sana, ḵananda, “Adi oḵyan maḵwa da ḵaḵna!”

Romans 2:20

Ḵad ḵananyu bose diḵayu ḵallabbong anuttudu'tta dong-og ḵan anuttudu'tta inaabbeng da somsomoḵda gapu'tte lintoge annat ḵan diḵayu we angigammuwanyu si ustu ḵan ḵatuttuwaan.

Romans 3:6

Daḵampun aḵ ḵatti! Te nu adi naun-unan aḵ Apudyus, ngai inonae anguwis atta losane tagu si annae lubung?