Revelation 21:27 - Sa Ugud Apudyus

²⁷ Yaḵon naippun maḵaḻnoḵ atta ngaimane ibelang Apudyus aḵ ḵaissawe isun da angwa'tta ampabain ya da losane tuliyan yaḵon abus da nigili da ngadanda si iblun ni Ubbu we Karnero we nigiliyan da awad da biyagda'ḵ inggana'ḵ maḵwae lumnoḵ.

Revelation 21:27 Referans Kwoze

Revelation 20:15

Ḵad ngaimane adipun nigili ngadanna'tte iblu we nigiliyan da ngadan da awad da biyagda'ḵ inggana, niballuda si igaw ni gumilgillayabe apuy ḵan sulfur.

Revelation 3:5

Da tagu we angngog atte lawweng, ansilupda si itaḵ ya adiḵpun paat ḵaanon ngadanda si iblu we nigiliyan da ngadan da awad de biyagda'ḵ inggana. Ibabaggaḵ si sinagung Amaḵ ya da anghelnae dida da taguḵ.

Matthew 13:41

Te saḵone Abeng Di Tagu, ibuunḵu da anghelḵu ta umoyda dagupon da losane tagu we gapun ni maḵabasuḻan da buḻunda ya da losane adipun tumuttuwa'tta pinion Apudyus. Miyadayuda'tta tagu we ipangataḵ.

Ephesians 5:5

Te inigammuyu we naippun maḵadagdagas ya angwa'tta ḵababbain aḵ midoga si ampangatan Kristu ya aḵ Apudyus. Isuna bos da ḵamommodona ḵuwan da udum te sa ḵamommodna, siya isun di apudyusna.

Revelation 21:8

Yaḵon ampaḵimut maḵwa'tta tagu we adidapun ipapuut pammatida gapu si ogyatda, da naippun pammatida, da lawweng ugalida, da pumappatoy, da angadaḻug atta daḵampun aḵ asawada, da andadawaḵ, da ambubuyun, da anaydayaw atta sinan-apudyus ya da losane tuliyan. Asida umoy inggaw atte igaw ni gumilgillayabe apuy ḵan sulfur. Sana ḵumagwae ḵatoy.”

Revelation 13:8

Ḵad daydayawon da losane tagu si annae lubung sanae ḵaog-ogyate ayam yaḵon da tagu we nigili da ngadanda'tte iblu we nigiliyan da ngadan da awad da biyagda'ḵ inggana, adidapun daydayawon sanae ḵaog-ogyate ayam. Te sa daan ni lubung maḵwaan, nagagangpute nigili da ngadan da sanae tagu si iblun ni biyage sa ḵuwan ni Ubbu we Karnero we nagongat.

Hebrews 12:14

Pangganyu allin-awae maḵabuḻbuḻunanyu'tta losane tagu ya mitotoḵḵon ḵayu'ḵ taguna ta bumaḻu ugaliyu te nu adi tagu ḵaḵnat adinapun ilan aḵ Apu.

Revelation 20:12

Innilaḵ os da natoye nangatu ya nababae summisiḵadda'tte sinagung ni trono. Inninggaw da naḻpu'd Hades we igaw da nanḵaḵatoy ya da nanḵaḵatoy atte baybay. Pun nabuḵyag iblu we nigiliyan da ngadan da awad da biyagda'ḵ inggana. Nabuḵyag os da iblu we nigiliyan da losane ḵingwan da tagu woḵ naḵuwis da sin-ossaossa sigun atta ḵingwadae nigili'tta annae iblu.

Philippians 4:3

Siḵa ḵad ose mataḻgodane buḻunḵu, badangam ḵappos da sanae bubai ta an-asipakawanda ya mipaḻ-og an-ossaananyu. Te pummangogdae naḵaḵewaaḻ ḵan saḵon atte nangiwaḻagawagaḵ si Ambaḻu we Damag, nidoga da Clement ya da udume naḵaḵewaaḻ ḵan saḵone awad da ngadanda si iblu we nigiliyan da ngadan da awad biyagda'ḵ inggana.

Mark 7:2

Innilada da udume disipulunae nangan yaḵon adidapun inunud ugali si inondae ambuḻu we intuttudun da Pharisee aḵ mibelang aḵ ampoḻḵas.

Luke 10:20

Taḵon ay os nu lamogyu paḻyawon da aḻan, daḵampun aḵ siya gapunae allaylayad ḵayu. Sa gapunae allaylayad ḵayu oḵyan, nigili da ngadanyu'd langit.”

1 Timothy 1:10

da maḵadagdagas, da antattanunge angasawa'tta asillaḻaḵida ya asimbubaida, da andopap atta asintataguda ya illaḵuda dida. Da tuliyan, da angisapata'tta tinutuli ya da losane angwa'tte misullagi si tuttuwae tuttudu.

2 Peter 3:13

Yaḵon awad de inkarin Apudyus we uuwayon taḵu, we sa baru we langit ḵan baru we lutae naun-unan da ugalin da losane iinggaw sidi.