Revelation 16:9 - Sa Ugud Apudyus

⁹ Yaḵon taḵon ay nu naatunganda si ḵaog-ogyate atungna, amo nan-ugudanda'ḵ lawweng ngadanna. Adidapun imbabawi da basuḻda ya adidapun iyyagaye nangwa ya adidapun binigbig ḵinangatun Apudyus we anna ḵabooḻana'tta sanae ampaḵimute ampaḵaḻaman.

Revelation 16:9 Referans Kwoze

Revelation 16:21

Ḵad naottag da danaḵḵoḻe daḻaḻu we naḻpu'd langite umoye limampuḻu we kilo dagson ni osa woḵ nitup-ugda'tta tagu. Yaḵon amo nan-uguugudda'ḵ misullagi ḵan Apudyus gapu'tta sanae daḻaḻu ya da ḵaog-ogyate ampaḵaḻaman.

Revelation 11:13

Sa sadi ye oras, inggaw os ummamdane lunige anadail atte ḵasimpuḻun ni sadi ye siyudad woḵ sadi nanḵaḵatoyan da pitullibu we tagu. Pun ummogyat da nabun-an woḵ andayawda'tte ḵinangatun Apudyus we awad ad langit.

Revelation 2:21

Innatodḵu ḵan siya wayanae ambabawi'tta basuḻna ya agaynae angwa yaḵon adinapun agaye miyadaḻug atte daḵampun aḵ asawana.

Luke 13:5

Naid! Annaya ibagaḵ ḵan diḵayu, nu adiyu ibabawi da basuḻyu ya adiyu agaye angwa, madusa ḵayu we ḵama ḵan dida.”

Luke 13:3

Naid! Annaya ibagaḵ ḵan diḵayu, nu adiyu ibabawi da basuḻyu ya adiyu agaye angwa, madusa ḵayu we ḵama ḵan dida.

Revelation 14:7

Ḵananae nangidangsoḻe gumminga, “Isipogyu'ḵ Apudyus ya bigbigonyu ḵinangatuna te dummatong timpu we anguwisana'tta tagu. Idaydayawyu nangwa'd langit ya ad luta, da baybay, da bubun ya da tawwang.”

Revelation 9:20

Yaḵon da nabun-ane tagu we adipun nanḵaḵatoy gapu'tta sanae ampaḵaḻaman, adidapun nambabawi'tta basuḻda ya adidapun iyyagaye angwa. Sissiyae adidapun iyyagaye nanaydayaw atta aḻan ya da sinan-apudyus we naḵwa si buḻawan, palata, gambang, batu ya da ḵayu we ḵingwan di tagu we sinan-apudyus we adidapun maḵaila, maḵadongoḻ ya adidapun maḵataddaḻan.

2 Corinthians 12:21

Umogyataḵ aḵ umaliyaḵ ḵad ḵasin, pabainanaḵ os ḵan Apudyus atte sinagungyu gapu'tta ḵoḵoḵḵonyu. Umogyataḵ nu lawweng somsomoḵḵu gapu'tta naḵabasuḻ si awe ye adidapun imbabawi da basuḻda ya adidapun iyyagaye nangwa'tta ḵaissawe ḵoḵoḵḵonda, isun ni maḵadagdagas ya da udume ḵaissawe ḵoḵoḵḵon.