Revelation 13:14 - Sa Ugud Apudyus

¹⁴ Pun inallelawna da adipun namati'd luta gapu'tta nakaskasdaawe sinyale niyunude ḵingwana si nanserserbiyana si ummunae ḵaog-ogyate ayam. Pun imbagana ḵan dida ta angwada'ḵ sinan-ayame dayawondae isun ni ummunae ayame nasugat atte ispada yaḵon sissiyae natagu.

Revelation 13:14 Referans Kwoze

Revelation 19:20

Yaḵon nadoḵmaan ḵaog-ogyate ayam ya sa sinan profeta we nangipaila'tta nakaskasdaawe sinyal si nanserserbiyana si annae ayam. Da annae sinyal, dida da inusarnae nangallelaw atta tagu we namaḻḵaan atte maḻḵan ni ḵaog-ogyate ayam ya da nandaydayaw atte naḵwae ḵais-isuna. Da annae duwae sissiyae matattagu, niballuda si igaw ni gumilgillayabe apuy ḵan sulfur.

Revelation 12:9

Ḵad niballu'd luta daḵoḻe dragone nidoga da anghelna. Aḵ Satan sanae nampailae uḻog si awe. Siya nangallelaw atta tagu si intero we lubung.

Revelation 13:8

Ḵad daydayawon da losane tagu si annae lubung sanae ḵaog-ogyate ayam yaḵon da tagu we nigili da ngadanda'tte iblu we nigiliyan da ngadan da awad da biyagda'ḵ inggana, adidapun daydayawon sanae ḵaog-ogyate ayam. Te sa daan ni lubung maḵwaan, nagagangpute nigili da ngadan da sanae tagu si iblun ni biyage sa ḵuwan ni Ubbu we Karnero we nagongat.

Revelation 20:10

Ḵad aḵ Satan we nangallelaw ḵan dida, asi miballu si igaw ni gumilgillayabe apuy ḵan sulfur we sa niballuwan ni ḵaog-ogyate ayam ya sa sinan profeta. Ḵad ampaḵapaḵaḻamda'tte inaḻgaw ya nilabi'ḵ inggainggana.

Revelation 18:23

Ḵad naippun os ogon da matonggane silaw ya naippun ogon ankasar. Sanat da dusan ni Babylon te da allaḵlaḵu si sadi ye siyudad, ansosoḵaḻ da somsomoḵda ya ngannonda dida ḵabaḵnangan ad luta. Ḵad da ummili sidi, inallelawda da tagu'd luta'tta tulidae isun da buyun.

Revelation 16:2

Pun ummoy ni ummunae anghel intuyaḵ inggaw si maḻuḵungna'tte luta woḵ tummubu da ampaḵimut ḵan danaḵḵoḻe busali'tta tagu. Sana da tagu we namaḻḵaan atte maḻḵan ni ḵaog-ogyate ayam woḵ nandaydayawda'tte sinan-ayame ḵais-isuna.

Revelation 15:2

Innilaḵ os isunan baybaye samling ḵopyanae naḵamsan atte apuy. Inggaw da summisiḵad sidi ye illogda ḵaog-ogyate ayam te adidapun nandaydayaw si sinan-ayame ḵais-isuna ya adidapun os iyyunude namaḻḵaanda si belange sinyal ni ngadanna. Nampaḵ-odonda'ḵ arpae innatod Apudyus,

Revelation 14:11

Pasige ampangatu asuḵe maḻpu si apuye amaḵaḻam ḵan dida'ḵ inggana. Aḻgaw ḵan labi ye ippun umillongan da ampaḵaḻamanda te nandayawda'tte ḵaog-ogyate ayam ya sa sinan-ayame ḵais-isuna ya nampamaḻḵada'tte ngadan ni ḵaog-ogyate ayam.”

Revelation 14:9

Nipasani bos ḵumaḵlu we anghel atta duwae ummuna. Gumminga bos si andangsoḻe ginga woḵ ḵanana, “Nu awad andayaw si ḵaog-ogyate ayam ya sa sinan-ayame ḵais-isuna ya namaḻḵaan da ḵidayda baḵon nu da imada'tte maḻḵan ni ḵaog-ogyate ayam,

Revelation 13:15

Niyunud os atte sanae ḵumagwae ayame ittona angos atte sinan-ayam ta lamognae an-ugud ya angiḵoddonge mapatoy da losane adipun ḵan siya andayaw.

2 Thessalonians 2:4

Sullagiyona'ḵ Apudyus ya da losane sinan-apudyus ya da ngaimane daydayawon da tagu ya ipangatunae mismu long-agna nu da ngaiman ḵan dida. Ta tumuḵdu si templo we boḻoy Apudyus ya iwaḻagawagnae siyae mismu Apudyus.

Revelation 2:10

Adi ḵayu maḵimut atte madam-an umali ye ampaḵaḻaman. Impaibaḻud Satan da udum ḵan diḵayu ta mapadas ḵayu ḵad ampaḵaḻamon diḵayu'ḵ simpuḻu we aḻgaw. Yaḵon mataḻgodan ḵayu oḵyane ipapuutyu we amati ḵan saḵon taḵon ay nu siya gapun ni matoyanyu ta ittoḵ ḵan diḵayu koronae siya biyag aḵ inggana.

Revelation 3:10

Te tinuttuwayu da bilinḵu we anusanyu iyattom ampaḵaḻamanyu, saḻaḵnibaḵ diḵayu'tte ampaḵimute ampaḵaḻamane madam-an dumatong si intero we lubung ta mapadas da losane tagu'd luta.

Revelation 13:1

Pune sadi, innilaḵ ḵaog-ogyate ayame tummoḵwaḻe naḻpu si baybay. Pitu uḻuna ya simpuḻu sakkudna. Naamin nakoronaan da sakkudna ḵad nigili si sin-ossaossae uḻuna angngadanda ḵan Apudyus.

Revelation 16:13

Naabus ḵad, innilaḵ da tuḻu we aḻane isudan ḵatollongan di tuḵaḵ, sa osa ḵad naḻpu si sungad ni dragon, naḻpu osa si sungad ni ḵaog-ogyate ayam ya sa osa ḵad os naḻpu si sungad ni sinan profeta.