Philippians 3:19 - Sa Ugud Apudyus

¹⁹ Te aaddi ye sa ambanagan ni biyagda, madusada'ḵ inggana'd infiernu. Te dida ḵad, siya ambalinonda'ḵ apudyusda da pipion da long-agda. Ḵad siya is-isḵaḻda da ḵababbaine ḵoḵoḵḵonda. Siya bos ipapuut ni somsomoḵda da awad si luta.

Philippians 3:19 Referans Kwoze

Romans 16:18

Te da ḵassadi ye tagu, daḵampun ḵan Apu taḵu we Kristu anserbiyanda yaḵon da long-agda ya da pipionda. Ḵad mipagapu'tte allin-awae an-uugudda ya ḵinasiḵapda, allelawonda da tagu we ippun ḵon igammuda.

2 Peter 2:3

Ḵad gapu si ḵamommodda, da sanae tagu tultulliyan diḵayu si nangnangwada'ḵ ug-uggud ḵad usaronda diḵayu ta angaḻ-anda'ḵ pilaḵda. Yaḵon nabayage naḵasagana dusada ya adipun masuyop anadail ḵan dida.

Colossians 3:2

Siya oḵyan sosomḵonyu da banage awad ad langit, daḵampun atta awad si annae lubung.

2 Peter 2:1

Yaḵon inninggaw os da sinan profeta we niḵamos atta tagu si awe. Ḵad isuna bos sinsanae awad da asi angidatong atta daḵampun aḵ tuttuwae tuttudu we naḻpuda'tte sabali ye grupu we maḵadadail atte pammati. Ḵad puḵlitanda'ḵ Apu taḵu we nanubut ḵan dida. Pun maaddaganda'tte madusaanda ḵan Apudyus.

2 Corinthians 11:15

Pun nu ḵatti, daḵampun oḵyan aḵ ḵatataag nu da anserbi ḵan siya ipailadae isun di naun-unane sammilun Apudyus. Yaḵon sa ambanaganda si umali ye aḻgaw, laḵ-amonda dusae supapaḵ da lawwenge ḵingwada.

2 Corinthians 11:12

Ḵad pagapagatupaḵ ḵoon ḵaḵna ta ippun wayan da awad sinate apostolyu we angiyisḵaḻ atte mipanggob si ḵewaaḻda ḵan an-isu ḵoonda si ḵoonni.

2 Peter 2:13

Ampaḵaḻamda gapu'tta ḵoḵoḵḵonda. Ibelangdae gangganas angwaanda'tta losane ḵababbain, ḵaissawe amaamayon ni long-agda taḵon ay aḻgaw. Mipanida si mansae angaissaw si silup ya allaylayaddae angallelaw ḵan diḵayu si midog-anda ḵan diḵayu we angan. Ḵad pagapagatupandae anggangganas atta matuḻ-ayane gangganase maḵaallelaw.

Galatians 6:13

Te taḵon ay didae nasogyatan, adidapun tuttuwaon da lintog Moses yaḵon piondae ampasogyat ḵayu ta awad isḵaḻdae nampasogyat ḵayu'tte gapu ḵan dida.

Revelation 21:8

Yaḵon ampaḵimut maḵwa'tta tagu we adidapun ipapuut pammatida gapu si ogyatda, da naippun pammatida, da lawweng ugalida, da pumappatoy, da angadaḻug atta daḵampun aḵ asawada, da andadawaḵ, da ambubuyun, da anaydayaw atta sinan-apudyus ya da losane tuliyan. Asida umoy inggaw atte igaw ni gumilgillayabe apuy ḵan sulfur. Sana ḵumagwae ḵatoy.”

1 Corinthians 3:3

te somsomoḵ da tagu si annae lubung da somsomoḵyu. Nu sissiyae awad de apos ya susubog ḵan diḵayu, daḵampun ḵamman aḵ siya angipailae unudonyu da pipion da long-agyu ya da ugalin da tagu si annae lubung?

Revelation 22:15

Yaḵon adipun maḵaḻnoḵ sidi da ngaimane angwa'tta lawweng, da andadawaḵ, da angadaḻug atta daḵampun aḵ asawada, da pumappatoy, da andaydayaw atta sinan-apudyus ya da losane tuliyan ya da ḵapappaila.”

Jude 1:16

Da sanae tagu, pasigda ngumonongonot ya ippun pulus ḵat-opanda. Siya ḵoonda da lawwenge pipion da long-agda. Isḵaḻda da long-agda ya allelawonda da buḻunda ta aḻanda da pipionda.

2 Timothy 3:4

Ituyuḵda da buḻunda ya ḵoonda da banage adidapun umman somsomḵon ambanagana. Amod ampapasindayawda. Daḵampun ḵan Apudyus ayatonda yaḵon siya amaamayonda da gangganasonda.

1 Timothy 6:5

ya patilayune susubog. Ḵaḵnat te lummaweng somsomoḵda ya naliwatanda ḵatuttuwaan. Te sa ḵananda, sa naapudyusane biyag gapun ni bumaḵnangan.

2 Thessalonians 2:12

ta losanda maḵoddongan aḵ madusa te adidapun namati si ḵatuttuwaan yaḵon siya ginangganasda da maḵabasuḻanda.

Philippians 2:21

Te da udume tagu, siya abus aḵ singsingtonda pipion ni somsomoḵda, daḵampun si pinion Jesu Kristu ḵoonda.

1 Corinthians 5:6

Daḵampun aḵ ambaḻu ansoḵaḻ ḵayu. Adiyupun ḵamman igammu we sa poose yeast pabotaḻona losan niḵamsanae arina?

1 Corinthians 5:2

Ḵad sissiyae ansoḵaḻ ḵayu! Siya oḵyan ḵoonyu idomdomyu ḵababbaine naḵwa ta paḻyawonyu ḵaḵnate tagu'tte gimungyu.

Revelation 19:20

Yaḵon nadoḵmaan ḵaog-ogyate ayam ya sa sinan profeta we nangipaila'tta nakaskasdaawe sinyal si nanserserbiyana si annae ayam. Da annae sinyal, dida da inusarnae nangallelaw atta tagu we namaḻḵaan atte maḻḵan ni ḵaog-ogyate ayam ya da nandaydayaw atte naḵwae ḵais-isuna. Da annae duwae sissiyae matattagu, niballuda si igaw ni gumilgillayabe apuy ḵan sulfur.

James 4:16

Yaḵon ansoḵaḻ ḵayu ya indaddayaw ḵayu. Losane isḵaḻ da tagu we isun da sana, lawweng.

2 Thessalonians 2:8

Ḵad nu mipaila ḵaḻawengane sumusullagi'tta Lintog Apudyus, umali'ḵ Apu Jesus ya dadailona sadi ye ḵaḻawengan atte ampail-ana. Ḵad gongatona taḵon ay abuse pog-awana.

Luke 18:4

Nabayage adimpun ni ḵuwis pinatgan yaḵon anungusna ḵad ḵanana'tte long-agna, ‘Adiḵpun isipog aḵ Apudyus ya potogoḵ da asintataguḵ,

Luke 16:19

Ḵanan Jesus, “Inninggaw laḻaḵi ye baḵnange nansilup atta ampapatoge silupe naḵwa'tte purple we sinnun ḵad inaḻgawe nansida ya anggangganas.

Luke 12:19

Ḵad nu magangputda, ḵanaḵ si long-agḵu we pianaḵ! Te amoamod inapitḵu ḵad masawaḻ si pigae tawon ya umillongaḵ ḵan iggaḵe angaangan ḵan uminuinum ya allaylayadaḵ!’

Matthew 25:41

“Ḵad ibagaḵ atta tagu si madawigiḵ ḵanane, ‘Diḵayu we naḵoddongan aḵ madusa, inḵayun! Inḵayu si annanayune apuye nisasaggana ḵan Satan ya da bubuḵ-unona.

Matthew 16:23

Yaḵon nansagung aḵ Jesus woḵ ḵanana, “Ḵumunudḵa Satan! Tumupodḵa ḵan saḵon. Te sa somsomoḵnu, daḵampun si pinion Apudyus yaḵon sa pion da tagu.”

Revelation 18:7

Sa ḵinaadun ni ḵinabaḵnangna ḵan ḵinasoḵaḻna, ḵaḵnat os isun ni lopong ni ampaḵaḻamana ya sa domdomna. Te ḵanana'tte somsomoḵna, ‘Saḵon de queen we ampangat. Andomdomaḵ ḵammane isun di baḻu?’

Jude 1:4

Te annat da tagu we illimoddae nidoga ḵan diḵayu we adiḵayupun naḵaimatun ḵan dida. Dida da nipadtu si awe si Ugud Apudyus we asi maḵuwis. Sana da tagu we daḵampun aḵ naapudyusane baliwanda ḵatuttuwaan mipanggob si ḵinabaḻun Apudyus te usaronda Ugud Apudyus aḵ analingodda'tta lawwenge ḵoḵoḵḵonda. Adidapun os bigbigon ḵatuttuwaan mipanggob ḵan Jesu Kristu we abus aḵ Apu we anserbiyan taḵu.

Romans 6:21

Yaḵon ngai ginanabyu we dam-on nangwa'tta ḵassadi ye siya mabainanyu sinsana? Sa ambanagan da ḵassadi ye ḵoḵoḵḵon, matoyan ḵan misinaan ḵan Apudyus aḵ inggana!

2 Thessalonians 1:9

Sa dusada, ampaḵaḻamda'ḵ inggainggana ya misinada ḵan Apu aḵ inggana ya adidapun ilan nakaskasdaawe ḵabooḻana.

Jude 1:10

Yaḵon da sanae tagu we adipun naapudyusan, an-ugudda'ḵ lawwenge misullagi'tta banage adidapun maawatan. Isudan ayam te adidapun maḵaḵasḵasmoḵ nu ngai ambaḻu ḵan lawweng ya siya unudonda da gagangaye lawwenge pipionda. Ḵad da sanae banag anadail ḵan dida.