Matthew 5:45 - Sa Ugud Apudyus

⁴⁵ ta mipailae diḵayu tuttuwae abeng Amayu'd langit. Te ḵan siya, iyyunudna inite ḵingwana'ḵ lumangḻang atta naun-unane tagu we isuna bos atta tagu we angwa'tta lawweng ya innatodna bos udan ta maudanan lutan da tagu we angwa'tta pinion Apudyus ya da tagu we angwa'ḵ lawweng.

Matthew 5:45 Referans Kwoze

Luke 6:35

Yaḵon ayatonyu da ḵabusuḻyu ya ḵoonyu da ambaḻu ḵan dida, ḵad pagawatanyu dida taḵon ay nu adiyupun namnamaone ipaulida. Nu ḵoonyu ḵaḵna, daḵoḻ gungunayu ya miyiyap ḵayu'tta abeng ni Ḵangatuwane Apudyus. Te aḵ Apudyus, an-anggom atta lawweng ya da adipun antawili.

Acts 14:17

Yaḵon adinapun iyyunude ippun anaḵdoḻ te ḵingwana ambaḻu. Innatodna udan ya sa adu we apit ya nangitod si adu we maḵan ta awad ḵat-opanyu ya lumayadanyu.”

Ephesians 5:1

Pun gapu ta diḵayu da abeng Apudyus we ayatona, ḵasapuḻane siya oḵyan unudonyu,

Matthew 5:9

Pian da tagu we angwa si maḵalin-awaan da udume tagu'tta sin-ossaossa te ibelang Apudyus dida'ḵ abengna.

John 13:35

Siya angigammuwan da losane tagu we disipuluḵ diḵayu nu an-asiayat ḵayu.”

1 John 3:9

Sa abeng Apudyus, adinapun pagapagatupane bumasuḻ te sa biyag Apudyus iinggaw ḵan siya. Gapu ta nambalinon Apudyus aḵ abengna, adipun maḵwae pagapagatupanae bumasuḻ.

Philippians 2:15

ta naippun idellawda ḵan diḵayu we abeng Apudyus ya ambaḻu da losane ugaliyu. Te taḵon ay nu maḵaigaw ḵayu'tta lawweng ya ḵabasbassuḻane tagu si annae lubung, naippun oḵyan angkuranganyu ta miyisu ḵayu'tta bituwone lumanglangḻang silawda'tte labi.