Matthew 5:22 - Sa Ugud Apudyus

²² Yaḵon sa ibagaḵ ḵan diḵayu, ngaimane sumasanga si asintataguna maḵuwis ḵan maḵoddongan aḵ madusa. Ngai ḵad ose angibabbain atte asintatagunae ḵanana, ‘Ippun paat silbim,’ midaḻum atta ḵuḵunsisaḻ. Isun os da ḵanandae, ‘Dong-ogḵa,’ inḵa si apuy ad infiernu.

Matthew 5:22 Referans Kwoze

1 John 2:9

Nu awad osa'ḵ ḵananae iinggaw atte padda ya sasangngaana da sunudna ḵan Kristu, sissiyae iinggaw atte giḵbot.

James 3:6

Sa dela taḵu isunan apuye sumgob ya dumadail atta losane nampaliḵwos. Te nu an-ugud taḵu'ḵ lawweng, ipailanae amod de lawwenge awad ḵan ditaḵu, siya gapun ni angwaan taḵu'ḵ lawweng ya ansomsomḵan taḵu'ḵ lawweng ya lumawengan os da adu we tagu. Sa annae lawweng naḻpu ḵan Satan ḵad dadailona losane ḵinatatagu taḵu.

Titus 3:2

Adida oḵyan an-ugud aḵ lawweng atte mipanggob atta ngaiman ḵad adida oḵyan sumubog yaḵon naanusda oḵyan ya pasigda patgan da losane tagu.

Matthew 10:28

Adiyu isipog da lamogda gongaton da long-agyu yaḵon naippun lamogdae angongat atta ḵalidodwayu. Sa isipogyu oḵyan, aḵ Apudyus. Te lamogna dadailon long-ag ḵan ḵalidodwa'd infiernu.

Matthew 18:35

Pun ḵanan Jesus we nangiyanungus, “Siya isun ni ḵoon Amaḵ ad langit ḵan diḵayu nu adiyu pakawanone sipupusu da asintataguyu.”

1 Peter 3:9

Nu awad angwa ḵan diḵayu'ḵ lawweng, adiyu ibaḻos. Nu awad os an-ugud aḵ lawweng, adiyu songbatan aḵ lawweng yaḵon iluwaḻuyu ḵan Apudyus ta bindisyunana dida. Te pinilin Apudyus diḵayu'ḵ mismu we taguna ta maḵatawid ḵayu si bindisyun.

Romans 12:10

An-asiayat ḵayu we isun ni an-aayat da mismu we ansusunud. Ḵad ibelangyu da bubuḻunyu'ḵ napatpatog nu diḵayu.

1 Peter 2:23

Inang-angyagda ḵad, adipun os ummang-angyag. Nampaḵaḻamonda ḵad, adinapun inḵoḻkog dusa ḵan dida yaḵon nantaḻgod ḵan Apudyus we naun-unan anḵuḵuwisna.

Matthew 18:21

Aḵ Peter ḵad, ummoy ḵan Jesus woḵ ḵananae nangimus, “Apu, ngai inona ya bumasubasuḻ asintataguḵ, angampigaoḵ pakawanon? Angampitu ḵamman?”

Jude 1:9

Taḵon ay pangat da anghel we aḵ Michael, adipun nan-ugud aḵ lawweng ta ḵuwisona'ḵ Satan atte nansongbatanda ḵan Satan mipanggob atte ngai ḵaḻabbonganae angaḻa si ladag Moses. Abuse ḵanana, “Aḵ Apudyus asi anuppaḵ ḵan siḵa.”

1 John 3:10

Ḵaḵna angimatunan taḵu'tta abeng Apudyus ya da abeng Satan: Da tagu we daḵampun aḵ abeng Apudyus, adidapun ḵoon da ustu ya adidapun ayaton da asintataguda.

Acts 17:18

Inninggaw os da udume mimistulun da Epicurean ya da Stoic we naḵasossongbat ḵan siya. Ḵanan da udum, “Ngai ibagabagan ni annate aginlalaing?” Ḵanan os da udum, “Siya nin iwaḻagawagna sabali ye apudyus.” Imbagada ḵaḵna te iwwaḻagawag Paul mipanggob ḵan Jesus ya sa ummuliyana.

1 Thessalonians 4:6

Ḵasapuḻane ippun oḵyan bumasuḻ ḵan diḵayu baḵon nu angallelaw si sunudna ḵan Kristu mipagapu'tte ḵaḵnae gunay te aaddi ye aḵ Apu bumaḻos atta ngaimane angwa'tte ḵatti. Sana da imbilibilinni ḵan diḵayu.

Mark 14:55

Da papangat ḵad da papadi ya da losane ḵuḵunsisaḻ, singsingngitda inondae angidaḻum ḵan Jesus ta awad anggadingandae angongat ḵan siya. Yaḵon ippun indasanda

Matthew 26:59

Da papangat ḵad da papadi ya da losane ḵuḵunsisaḻ, angngitda'ḵ ipabasuḻda ḵan Jesus we taḵon ay nu tuli ta awad lasundae ampagongat ḵan siya.

John 11:47

Pun da papangat da papadi ya da Pharisee, impaayagda da ḵuḵunsisaḻ woḵ ḵananda, “Ngai ḵoon taḵu? Te adu da ḵingwan ni annae tagu we nakaskasdaawe sinyal.

Revelation 20:14

Naabus ḵad, sa ḵatoy ya sa gagangaye igaw da natoy ad Hades, niballuda'tte igaw ni gumilgillayabe apuy ḵan sulfur. Sana ḵumagwae ḵatoy.

Acts 7:37

Aḵ Moses we mismu nangibaga'tta ganaḵ Israel ḵanane, ‘Sa umali ye aḻgaw, awad de osae profeta we isuḵe ibuun Apudyus ḵan diḵayu we maḻpu ḵan diḵani ye susunude ganaḵ Israel.’

Luke 12:5

Yaḵon aḵ Apudyus oḵyan isipogyu. Te maḵwa ḵaanona angosyu ḵad ḵaḻabbongana bose angitop-aḻ ḵan diḵayu'd infiernu. Annaya ibagaḵ ḵan diḵayu, siya abus aḵ isipogyu!

Matthew 5:44

Yaḵon ibagaḵ ḵan diḵayu we andongoḻ. Pagatupanyu ayaton da ḵabusuḻyu ya pagatupanyu iluwaḻuwan da amaḵaḻam ḵan diḵayu,

Matthew 5:34

Yaḵon ibagaḵ ḵan diḵayu, adiyu paat isapata da ngadan da ngaiman. Awatna, adiyu isapata'd langit te siya tronon Apudyus.

Matthew 3:17

Baag-en ḵanan ni gingae naḻpu'd langit, “Annaya Abengḵu we ay-ayatoḵ ya mamas-omaḵ ḵan siya.”

1 John 5:16

Nu awad osa'ḵ angila si sunudna ḵan Kristu we maḵabasuḻ, iluwaḻuna oḵyan ta itton Apudyus ḵan siya biyag aḵ inggana. Sa pioḵ ibaga, iluwaḻuwan taḵu tagu amod ay nu daḵampun aḵ ambanag si ḵatoy naḵabasuḻana. Te awad de basuḻe ambanag si ḵatoy yaḵon daḵampun aḵ ḵanaḵe iluwaḻuwan taḵu oḵyan.

James 2:20

Siḵae nadongdong-ogane tagu, piome panoḵnoḵane sa pammati ye naippun gunay ippun anuna?

Hebrews 12:25

Ilanyu ta adiyu idiyan aḵ Apudyus we an-ugud. Te nu adipun niligsi da adipun nandongoḻ atta bagbagana sina'd luta, ngai inon taḵu we angiligsi si dusa nu idiyan taḵu namagbaga ḵan didae naḻpu'd langit?

Hebrews 5:9

Ḵingwana ḵad da losane ḵasapuḻane ḵoona, nambaline siya anagu'tta losane tagu we anuttuwa ḵan siya'tte angittana ḵan dida si biyag aḵ inggana.

1 Corinthians 6:10

da aḵḵawan, da ḵamommod, da bartekero, da an-ugud aḵ lawweng atta asintataguda, da tulisan, adidapun gangganason da laḵsunda si midog-anda si ampangatan Apudyus.

1 Corinthians 6:6

Yaḵon ngaipayu umoy idaḻum atta daḵampun aḵ namati sunudyu ḵan Kristu ta dida angilintog ḵan diḵayu?

Acts 5:27

Inniyoyda da apostol atte sinagung da ḵuḵunsisaḻ. Pun sinumaḻyan ni ḵangatuwane padi dida.

John 15:25

Maḵwa sana ta mituttuwa nigili si lintogdae ḵanana, ‘Sasangngaanda saḵone ippun gapuna.’ ”

John 8:48

Pun ḵanan da Judyu, “Daḵampun ḵamman aḵ tuttuwa imbagani ye iSamariaḵa we naaḻanan?”

John 7:20

Ḵanan da tagu, “Naaḻananḵa! Ngai lawa maḻyad angongat ḵan siḵa?”

Mark 15:1

Wiḵwiḵis ḵad, nandatdatong da papangat da papadi, da pallakayon da Judyu, da mimistulun ni lintog ya da losane ḵuḵunsisaḻ woḵ nantutuḻagda nu ngai ḵoonda ḵan Jesus. Nagangputda ḵad nantutuḻag, binaḻudda. Pun intallayda woḵ impuḻangda ḵan Gobernor Pilate.

Matthew 25:41

“Ḵad ibagaḵ atta tagu si madawigiḵ ḵanane, ‘Diḵayu we naḵoddongan aḵ madusa, inḵayun! Inḵayu si annanayune apuye nisasaggana ḵan Satan ya da bubuḵ-unona.

Matthew 23:33

Tuttuwae lawweng ḵan ḵaḵimḵimut ḵayu! Diḵayu da ganaḵ ni uḻog. Adiḵayupun paat miligsi'tte anusaan Apudyus ḵan diḵayu'd infiernu!

Matthew 23:15

“Ḵaddagu ḵayu, diḵayu we mimistulun ni lintog ya da Pharisee. Ḵapappaila ḵayu! Te andoḻdoḻmang ḵayu'tta baybaye umoy atta adayu we ili ta awad awisonyu'ḵ taḵon ay ossaan ta ambalin aḵ disipuluyu. Ḵad nu gangputonyu tuttuduwan sadi ye tagu, nambalin aḵ lawwelawweng ḵad amo madusa'd infiernu nu sa madusaanyu.

Matthew 17:5

Sissiya ḵade an-uguugud, baag-en nalibuuwanda si ampaddapadda woḵ dingngoḻda gingae naḻpu'tte libuu we ḵanana, “Annaya ay-ayatoḵe abengḵu ya siya masmas-omaḵ. Dongngonyu da ibagana.”

Matthew 12:24

Yaḵon dingngoḻ ḵad da Pharisee ḵananda, “Abus aḵ Beelzebul we pangat da aḻan aḵ nangitod atte ḵabooḻanae amaḻyaw atta aḻan.”

Matthew 10:17

Ḵad ummanyu bos te doḵmaanda ḵan idaḻum diḵayu'tta ḵuḵunsisaḻ ya ap-apliton diḵayu'tta sinagogada.

Luke 22:66

Anna ḵade pumadda, inniyoyda'ḵ Jesus atte igaw da ḵuḵunsisaḻ we nandaḵdaḵngan da pallakayon da Judyu, da papangat da papadi ya da mimistulun ni lintog.

Acts 4:15

Pun pinaḻawada dida ta umabusdae ḵuḵunsisaḻ aḵ an-uugud.

Acts 5:21

Dingngoḻda ḵad sana, nillumnoḵda si templo atte wiḵwiḵis woḵ nantuttududa. Dummatong ḵad de ḵangatuwane padi ya da buḻunna, inayaganda da ḵuḵunsisaḻ ya da losane pallakayon ad Israel. Pun imbuunda da guwaḻdan ni templo ta umoyda aḻan da apostol atte babaḻḻudan.

Acts 6:12

Pun pinasangada da tagu, da pallakayon da Judyu ya da mimistulun ni lintog. Pun dinoḵmaanda'ḵ Stephen woḵ inniyoyda si sinagung da ḵuḵunsisaḻ.

Acts 6:15

Pun losan da ḵuḵunsisaḻ ya da udume nadagup sidi, intotollongda'ḵ Stephen woḵ innilada bosaḻnae isunan bosaḻ di anghel.

Acts 22:30

Mabigat ḵad, gapu ta pion ni kumander igammuwon ustu we ipabasuḻ da Judyu ḵan Paul, pinuḵayana woḵ binilinna da papangat da papadi ya da losane ḵuḵunsisaḻ ta ammimitingda. Pun inniyoyda'ḵ Paul si igaw da ammiting woḵ pinataḵdogna si sinagungda.

Acts 23:1

Pune sadi, immumusḵoḻ Paul da ḵuḵunsisaḻ woḵ ḵanana, “Susunudḵu we ganaḵ Israel, iniiggammun Apudyus we ampoḻḵas somsomoḵḵu mipanggob si inoḵe nanserbi ḵan siyae nilapu si awe inggana sinsanae aḻgaw.”

Acts 24:20

Yaḵon nu naippun, ibagam atta annae tagu nu ngai indasandae basuḻḵu'tte tummaḵdogaḵ si sinagung da ḵuḵunsisaḻ ad Jerusalem,