Mark 1:11 - Sa Ugud Apudyus

¹¹ Pun dingngoḻna gingae naḻpu'd langite ḵanana, “Siḵa abengḵu we ay-ayatoḵ ya mamas-omaḵ ḵan siḵa.”

Mark 1:11 Referans Kwoze

Mark 9:7

Pune sadi nannaḵunaḵ libuu ḵan dida pun dingngoḻda gingae naḻpu'tte libuu we ḵanana, “Annaya Abengḵu we ay-ayatoḵ. Dongngonyu da ibagana.”

Matthew 3:17

Baag-en ḵanan ni gingae naḻpu'd langit, “Annaya Abengḵu we ay-ayatoḵ ya mamas-omaḵ ḵan siya.”

Colossians 1:13

Te siya nanagu ḵan ditaḵu si ḵabooḻan ni pangat atte giḵbot woḵ indogana ditaḵu si ampangatan ni ay-ayatonae Abengna,

Romans 1:4

Nu mipanggob os si ḵinaapudyusna, impailan Apudyus we siya maḵabooḻe Abengna atte ummuliyana. Siya'ḵ Jesu Kristu we Apu taḵu.

John 3:16

Gapu ta amod de ayat Apudyus atta tagu si lubung, innatodna os-ossaane abengna'ḵ datun ta ngaimane amati ḵan siya, adipun madusa'ḵ inggana yaḵon awad ḵan siya biyag aḵ inggana.

John 5:37

Aḵ Amaḵ we nangibuun ḵan saḵon, tinaḵdoḻanae mismu mipanggob ḵan saḵon yaḵon adiyupun dingngoḻ gingana ḵan innila bosaḻna.

John 1:34

Innilaḵe mismu, pun panoḵnoḵaḵe siya tuttuwae Abeng Apudyus.”

Luke 9:35

Pune sadi, dingngoḻda gingae naḻpu'tte libuu we ḵanana, “Annaya abengḵu we piniliḵ. Dongngonyu da ibagana.”

Matthew 17:5

Sissiya ḵade an-uguugud, baag-en nalibuuwanda si ampaddapadda woḵ dingngoḻda gingae naḻpu'tte libuu we ḵanana, “Annaya ay-ayatoḵe abengḵu ya siya masmas-omaḵ. Dongngonyu da ibagana.”

John 6:69

Namati ḵani ḵan iniiggammuni ye siḵa nasantuwane imbuun Apudyus.”

Matthew 12:18

“Annaya sammiluḵe piniliḵ. Siya ay-ayatoḵ ḵan mas-omaḵ. Ibuunḵu Ispirituḵ ḵan siya ta iwaḻagawagna'tta losane Gentil inon da tagu we maun-unan atte antotollong Apudyus.

Mark 1:10

Tummoḵwaḻ ḵad aḵ Jesus si danum, daguse innilana'd langite nabuḵtan ya sa Ispiritu Santu we dumoḻadoḻae isunan kalapati woḵ nansap-oy ḵan siya.

Luke 3:22

Pun dummoḻa Ispiritu Santu we isunan kalapati woḵ nansap-oy ḵan siya. Ḵanan ni gingae naḻpu'd langit, “Siḵa Abengḵu we ay-ayatoḵ ya masmas-omaḵ ḵan siḵa.”