Luke 4:18 - Sa Ugud Apudyus

¹⁸ “Sa Ispiritu Santu anna ḵan saḵon, te dinutuḵanaḵ aḵ angiwaḻagawag atte Ambaḻu we Damag atta ḵapus ya atta baḻud Satan ta mapuḵayanda, ya diyatoḵ atan da naḵuḻap. Imbuunaḵ os ta puḵayaḵ da ampaḵapaḵaḻam

Luke 4:18 Referans Kwoze

Matthew 11:5

Da naḵuḻap, maḵailada, da napilay, maḵataddaḻanda, da naleprosy, naḵaan saḵitda, da natuḻong, maḵadongoḻda, da natoy, nataguda ḵasin ḵad miwaḻagawag Ambaḻu we Damag atta ḵapus.

Acts 10:38

Igammuyu we dinutuḵan Apudyus aḵ Jesus we iNazareth ya innatodna Ispiritu Santu ya sa ḵabooḻana ta dinumane ayana, ḵoona da ambaḻu ya ḵinaanna da ampaḵaḻaman da nampaḵapaḵaḻamon Satan te anna'ḵ Apudyus ḵan siya.

Luke 7:22

woḵ ḵanana'tta imbuun John, “Mipauli ḵayu ḵan John ta inḵayu ibaga ḵan siya da innilayu ḵan dingngoḻyu, we da naḵuḻap, maḵailada, da napilay, maḵataddaḻanda, da naleprosy, naḵaan saḵitda, da natuḻong, naḵadongoḻda, da natoy, nataguda ḵasin ḵad sa Ambaḻu we Damag miwaḻagawag atta ḵapus.

Acts 26:18

Ibuunḵu siḵa ḵan dida ta igammuwonda ḵatuttuwaan ta masilawan da somsomoḵda ya an-awidanda da lawweng ya ansagungda si padda. Ḵad an-awidanda ḵabooḻan Satan ḵad ansagungda si ḵabooḻan Apudyus ta amatida ḵan saḵon ḵad mapakawan da basuḻda ya mibelangda'tta intotoḵḵon Apudyus aḵ taguna.’

John 12:46

Ummaliyaḵ atte annae lubung aḵ isun di silaw ta ngaimane amati ḵan saḵon, adidapun iinggaw atte giḵbot.

1 Peter 2:9

Yaḵon diḵayu pinilin Apudyus aḵ ḵabaḻyanna ya isuyu da padi ye anserbi ḵan Apudyus we Ari taḵu. Diḵayu ilin da tagu we nitotoḵḵon para ḵan siya ya ampatoge tagunae ḵinuḵuwwana ta ipaigammuyu nakaskasdaawe ḵingwana. Pinilina bos diḵayu ta tenanyu giḵbot ya inggaw ḵayu si nakaskasdaawe paddana.

Colossians 1:13

Te siya nanagu ḵan ditaḵu si ḵabooḻan ni pangat atte giḵbot woḵ indogana ditaḵu si ampangatan ni ay-ayatonae Abengna,

Matthew 4:16

Da tagu ḵad sidi, isudan inggaw si pongot te isunan nalibuuwan ilida si ḵatoy. Yaḵon sa umali ye aḻgaw, ilanda ampigsapigsae silaw te ampaila ḵan dida anilaw atta somsomoḵda.”

Matthew 5:3

“Pian da tagu we antaḻgod ḵan Apudyus atta ngaiman te midogada si ampangatan Apudyus.

Luke 6:20

Pun nansagung aḵ Jesus atta disipuluna woḵ ḵanana, “Pian da tagu we antaḻgod ḵan Apudyus atta ngaiman te midogada si ampangatana.

James 2:5

Andongoḻ ḵayu ay-ayatoḵe susunud ḵan Kristu. Daḵampun ḵamman ḵan Apudyus namili'tta ḵapus si annae lubung aḵ bumaḵnang si pammati ya gangganasonda da laḵsunda si midog-anda si ampangatan Apudyus we inkarina'tta angay-ayat ḵan siya?

John 3:34

Sa imbuun Apudyus, siya ugudona da Ugud Apudyus te innatod Apudyus Ispiritu Santu ḵan siyae ippun anungusna.

John 1:41

Ḵingwan ḵad Andrew, daguse ummoyna singngit sunudnae aḵ Simon woḵ ḵanana ḵan siya, “Indasanni Messiah.” Sa pion ni Messiah ugudon Kristu.

Matthew 12:20

An-anggom atta tagu we anḵuya pammatidae isun ni adinapun putton naḻupaḵe loda baḵon nu badangana da aḵit pammatidae isun ni adinapun ḵospon anḵusḵusyope silaw. Pagatupanae an-anggom atta tagu we isun ni sana inggana'ḵ ḵoona da tagu'ḵ maun-unan si antotollong Apudyus.

Acts 4:27

Sadi imbagan Ari David te da Herod ḵan Pontius Pilate ya da Gentil ya da ganaḵ Israel nadagupda'd Jerusalem ta antutuḻagdae gongatonda'ḵ Jesus we nasantuwane sammilume dinutuḵam.

Matthew 12:18

“Annaya sammiluḵe piniliḵ. Siya ay-ayatoḵ ḵan mas-omaḵ. Ibuunḵu Ispirituḵ ḵan siya ta iwaḻagawagna'tta losane Gentil inon da tagu we maun-unan atte antotollong Apudyus.

Luke 4:17

Naitod ḵan siya da inggilin Profeta Isaiah. Binuḵyagna ḵad, indasana sanae nigili woḵ ḵananae namasa'tta tagu,

Acts 4:26

Nansagana da ari si annae lutae maḵagubat ya nandatdatong da papangate bumusuḻ ḵan Apu ya sa Kristu we dinutuḵana.’