Luke 23:5 - Sa Ugud Apudyus

⁵ Yaḵon ḵanandae nangipatut, “Ginuluguluna da adu we tagu'tte intero we probinsiya'd Judea. Insaḻadnae nantuttudu'tte probinsiya'd Galilee woḵ dummatong ad Judea ya taḵon ay sinsadi sina'd Jerusalem.”

Luke 23:5 Referans Kwoze

John 2:11

Sa annae ḵingwan Jesus ad Cana we ili'tte probinsiya'd Galilee, sana ummunae nakaskasdaawe sinyale nangipail-ana'tte ḵinaapudyusna. Pune sadi, namati da disipuluna ḵan siya.

John 1:43

Mabigat ḵad, simsimmoḵ Jesus we umoy atte probinsiya'd Galilee. Indasana'ḵ Philip woḵ ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.”

Mark 1:14

Naabus ḵade nibaḻud aḵ John, nipauli'ḵ Jesus atte probinsiya'd Galilee ta umoyna iwaḻagawag Ambaḻu we Damag we naḻpu ḵan Apudyus.

Matthew 4:23

Ginaḵay Jesus da losane ili'tte probinsiya'd Galilee woḵ nantuttudu'tta sinagogada. Iwwaḻagawagna Ambaḻu we Damag mipanggob si ampangatan Apudyus. Ḵinaanna da nankalakalasi ye saḵit ḵan ampaḵaḻaman da tagu.

Acts 23:10

Pun amo dummallu susubogda woḵ naḵimtan kumander te ḵananapun nu an-in-innatanda'ḵ Paul. Pun binilinna da suḻdadu we umoyda aḻan ta itallayda'tte ḵampuda.

Acts 10:37

Inigammuyu bos da ampatoge naḵwa si intero we probinsiya'd Judea, nisaḻad atte probinsiya'd Galilee si nagangpute iwwaḻagawag John mipanggob atte bonyag.

Acts 7:57

Yaḵon da papangat da Judyu, impupda da ingada ya nanugtug-uyda ta adida dongngon da ibagana woḵ losanda induḵḵus

Acts 7:54

Dingngoḻ ḵad da papangat da Judyu da imbagan Stephen, ngumalitod da babada'tte ummamdane sangada.

Acts 5:33

Dingngoḻ ḵad da ḵuḵunsisaḻ sadi, amod de sangada woḵ pionda gongaton da apostol.

John 19:15

Pun ḵanandae nanugtug-uy, “Pagongatnu! Pagongatnu! Paipattoḻnu'tte kros!” Ḵanan Pilate, “Pionyu ḵammane ipattoḻḵu'tte kros ariyu?” Ḵanan da papangat da papadi, “Naippun udum aḵ arini yaḵon sa Emperor.”

John 7:52

Ḵanandae summongbat ḵan siya, “Isum nin naḻpu'tte probinsiya'd Galilee. Singtom si Ugud Apudyus woḵ igammuwome naippun profeta'ḵ naḻpu'tte probinsiya'd Galilee.”

John 7:41

Ḵanan da udum, “Siya Kristu we imbuun Apudyus.” Yaḵon ḵanan os da udum, “Naid! Sa Kristu, tuttuwae daḵampun aḵ maḻpu'tte probinsiya'd Galilee.

Luke 23:23

Yaḵon amo nanugtug-uyda impatute ampaipattoḻ ḵan Jesus atte kros inggana'ḵ naabaḵ aḵ Pilate,

Luke 11:53

Nagangput ḵad da sadi ye imbagana, lummawa'ḵ Jesus. Inggan ni sadi, sinullagin da mimistulun ni lintog ya da Pharisee. Pun amod da inimusda ḵan siya,

Matthew 27:24

Innilan ḵad Gobernor Pilate we ippun lamogna ḵoon yaḵon isaḻaddae magulu, nangaḻa'tte danum woḵ nambuḻuna'tta imana si sinagung da tagu. Ḵanana, “Ippun biyangḵu si magongatan ni annae tagu, ḵigadyu pagay.”

Matthew 2:1

Aḵ Jesus ḵad niyanaḵ ad Bethlehem atte probinsiya'd Judea si nampangatan Ari Herod. Baag-en inninggaw da ummoy ad Jerusalem we naḻpu si dumingitan init. Nalaingdae angibaga'tta pion da bituwon ḵanan.

Matthew 11:1

Ginangput ḵad Jesus binilin da nasawaḻan aḵ duwae disipuluna, ummoyon woḵ ummoy nantuttudu ya iwwaḻagawagna Ambaḻu we Damag atta adani ye ili.

Luke 23:6

Dingngoḻ ḵad Pilate imbagan da tagu inimusna ḵan dida ḵanane, “Naḻpu ḵamman annae laḻaḵi si probinsiya'd Galilee?”