Luke 18:7 - Sa Ugud Apudyus

⁷ Adimpun ḵamman Apudyus itton ḵalintogan da pinilinae tagu we anḵodaw aḵ ḵadagu ḵan siya si inaḻgaw ya nilabi? Itaḻyanna ḵamman badangna?

Luke 18:7 Referans Kwoze

2 Peter 3:9

Sa ḵasomsomḵan da udume tagu, itaḻyan Apudyus we angituttuwa'tta inkarina yaḵon daḵampun aḵ tuttuwa. Sa ḵatuttuwaan, anuanusana diḵayu te adinapun pione awad ossaan aḵ madusa yaḵon siya piona ibabawin oḵyan da losane tagu da basuḻda ya agaydae angwa.

Luke 11:13

Pun diḵayu we ḵabasbassuḻan, igammuyu we angitod si ambaḻu'tta abengyu, maguḻaman aḵ Amayu'd langit adina itton Ispiritu Santu atta anḵodaw ḵan siya?” Sana mungimung ni tutttudun Jesus mipanggob atte luwaḻu.

1 Timothy 5:5

Sa baḻu we ippun paat osa'ḵ angayyuwan ḵan siya, namnamaonae aḵ Apudyus bumadang ḵan siya. Ḵad pagapagatupanae alluwaḻu ya anḵodaw aḵ badang atte inaḻgaw ḵan nilabi.

Revelation 6:10

Ḵanandae nangidangsoḻ, “Apudyus we maḵabooḻ atta losan, siḵa gattoḵe nasantuwan ḵan tuttuwa, ḵamaan ni anguwisam ḵan angibaḻosam atta tagu'd lutae namatoy ḵan namapoy-as atta daḻani?”

2 Thessalonians 1:6

Ustu inon Apudyus we anḵuwis te da tagu we namaḵaḻam ḵan diḵayu, ampaḵaḻamona bos dida.

Luke 2:37

Sissiyae baḻu inggana'ḵ nantawon aḵ waḻumpuḻu ya opat. Patilayun umoy si paway ni templo ta andayaw ḵan alluwaḻu ḵan Apudyus atte inaḻgaw ḵan nilabi. Patilayune allaun ta alluwaḻu.

Matthew 7:11

Pun diḵayu we ḵabasbassuḻan, igammuyu we angitod si ambaḻu'tta abengyu, maguḻaman aḵ Amayu'd langit adina itton ambaḻu'tta anḵodaw ḵan siya. Sana mungimung ni tuttudun Jesus mipanggob atte luwaḻu.

Revelation 18:20

“Diḵayu we awad ad langit, anggangganas ḵayu'tte nadadailana. Diḵayu we tagun Apudyus, da apostol ya da profetana, maganasan ḵayu bos te dinusan Apudyus sanae siyudad gapu'tta losane ḵingwana ḵan diḵayu.”

1 Thessalonians 3:10

Inaḻgaw ya nilabi ye ipapangogni ḵodawon ḵan Apudyus we an-asiila taḵu ta dog-anni da angkuranganyu'tte pammati.

Colossians 3:12

Gapu ta diḵayu da pinilin Apudyus we taguna ya inay-ayatna, unudonyu oḵyan da sanae ug-ugali: Ḵumadagu ḵayu ya bumadang ḵayu, ipakumbabayu da somsomoḵyu ya somsomḵonyu oḵyan bumaḻuwan da udum ya pasig ḵayu oḵyan naanus.

Romans 8:33

Ngai ḵad ain ḵallamog angidaḻum atta pinilin Apudyus? Naippun te aḵ Apudyus we mismu nangwa ḵan ditaḵu'ḵ naun-unan.

Revelation 7:15

Pun sana gapunae awadda si sinagung ni tronon Apudyus we anserserbi ḵan siya si templona'tte inaḻgaw ya nilabi. Sa awad atte trono, patilayune buḻunna dida ya taltalliḵunana dida.

Titus 1:1

Saḵon aḵ Paul we dinutuḵan Apudyus aḵ anserbi ḵan siya ya osa'tta apostol Jesu Kristu. Imbuunaḵ aḵ umoy amapigsa'tta pammatin da tagu we pinilin Apudyus. Ipaigammuḵ os ḵatuttuwaane naḻpu ḵan siyae mituttuwa naapudyusane antataguda.

2 Timothy 1:3

Anggappiyaaḵ ḵan Apudyus we anserbiyaḵe ampoḻḵas somsomoḵḵu we isun ni nanseserbin da danaḵḵoḻ taḵu. Alluwaḻuwaḵ ḵad ḵan Apudyus atte inaḻgaw ḵan nilabi, adiḵpun maliwatane anggappiya ḵan Apudyus gapu si pammatim.

Matthew 24:22

Ḵad nu adin Apudyus simsimmoḵe paabobbaon sanate timpu, naippun tagu'ḵ matagu. Yaḵon gapu'tte ḵadaguna'tta pinilinae taguna, pinaabobbana sadi ye timpu.

Matthew 24:24

Te ampaila da umallelawe tagu ya ibagadae dida Kristu ya awad os da angibagae dida profeta. Ḵad angipailada'tta amo nakaskasdaaw ta amanoḵnoḵe awad ḵabooḻanda ta allelawonda da tagu, taḵon ay da pinilin Apudyus nu maḵwa.

Luke 21:28

Pun nu dumatong misaḻdan da annae maḵwa, papigsaonyu da somsomoḵyu te madam-ane subuton Apudyus diḵayu.”

2 Timothy 2:10

Pun attomaḵ da losane ampaḵaḻamaḵ gapu'tta pinilin Apudyus we tagu ta mataguda gapu'tte niyossaananda ḵan Jesu Kristu ya midogada si ḵabaḻuwane antatagu ḵan Apudyus ad langite ippun anungusna.

1 Peter 1:1

Saḵon aḵ Peter we apostol Jesu Kristu. Annaya suḻatḵu ḵan diḵayu we tagu we pinilin Apudyus we isun di mangili si annae lubunge naas-asipaḻaḵ atta ili'd Pontus, Galatia, Cappadocia, Asia ya ad Bithynia.