John 6:40 - Sa Ugud Apudyus

⁴⁰ te sa pinion Amaḵ, losane angimatune saḵon Abengna ya amati ḵan saḵon, maittanda si biyag aḵ inggana. Ḵad pauliyoḵ dida taguwon si anungus ni aḻgaw.”

John 6:40 Referans Kwoze

Romans 6:23

Te sa bayad ni basuḻ siya ḵatoy. Yaḵon sa libli ye atod Apudyus siya biyag aḵ inggana mipagapu si niyossaanan taḵu ḵan Jesu Kristu we Apu taḵu.

John 6:54

Ngaimane angan atte long-agḵu ḵan anginum atte daḻaḵ, awad ḵan siya biyag aḵ inggana. Ḵad ḵasinḵu taguwon dida'tte anungus ni aḻgaw.

John 5:24

“Ibagaḵ ḵan diḵayu ḵatuttuwaan, ngaimane amati'tta ugudḵu ya amati'tte nangibuun ḵan saḵon, awad ḵan siya biyag aḵ inggana. Adipun ogon maḵuwis te illasatna dusa woḵ awad ḵan siya biyag aḵ inggana.

John 11:25

Ḵanan Jesus, “Saḵon anagu ḵasin atta natoy ya angitod atte biyag aḵ inggana. Ḵad ngaimane amati ḵan saḵon, taḵon ay nu matoy, matagu'ḵ inggana.

John 4:14

Yaḵon sa uminum atte danume ittoḵ, adipun ogon mauwaw. Te ambalin aḵ isunan bubune bumubus si long-agnae angitod si biyag aḵ inggana.”

John 14:19

Sin-aḵitan ya da tagu we adipun amati naippun ogon ilanda ḵan saḵon yaḵon diḵayu asiyu ilan saḵon. Te mataguwaḵ ḵasin ya matagu ḵayu bos.

John 12:45

Ḵad ngaimane nangila ḵan saḵon, innilana bos nangibuun ḵan saḵon.

John 6:27

Adiyu gamgaman maḵane madadail yaḵon siya oḵyan gamgamanyu maḵane angitod si biyag aḵ inggana. Ḵad saḵone Abeng Di Tagu angitod atte sadi ye maḵan ḵan diḵayu te ummapyu'ḵ Apudyus we Amaḵ ḵan saḵon.”

John 3:36

Ḵad ngaimane tumuttuwa gapu si amatiyana'tte Abengna, maatod ḵan siya biyag aḵ inggana. Yaḵon sa adipun tumuttuwa gapu si adinapun amatiyan atte Abengna, ippun ḵan siya biyag aḵ inggana yaḵon sa sangan Apudyus iinggaw ḵan siya.

John 1:14

Sa Ugud, nambalin aḵ tagu woḵ inninggaw ḵan ditaḵu. Amod de ḵinabaḻuna ya ḵatuttuwaan da losane imbagabagana. Innilani ḵan siya nakaskasdaawe ugalin Apudyus te siya abus aḵ Abeng we naḻpu ḵan Amana.

Luke 2:30

Te innilaḵe mismu Anagu ḵan diḵani ye imbuunnu.

1 John 2:25

Ḵad sana inkarin Kristu we ittona ḵan ditaḵu biyag aḵ inggana.

John 17:2

Te innatodnu ḵan saḵon ḵaḻabbongane angipangat atta losane tagu ta ittoḵ biyag aḵ inggana'tta losane innatodnu ḵan saḵon.

John 10:28

Ittoḵ ḵan dida biyag aḵ inggana ta adidapun misina ḵan Apudyus aḵ inggana ya naippun paat maḵapuḻos ḵan dida ḵan saḵon.

Jude 1:21

Popotpotanyu ayat Apudyus ḵan diḵayu si anguuwwayanyu si biyag aḵ inggana'd langite itton Jesu Kristu we Apu taḵu gapu si ḵadaguna.

1 Peter 1:8

Adiyupun innila'ḵ Jesu Kristu yaḵon inay-ayatyu. Taḵon ay nu adiyupun ilan sinsadi, amati ḵayu ḵan siya. Pun amo allaylayad ḵayu'tte adipun mibungangay ya ippun miyisuwanae laylayad.

2 Corinthians 4:6

Te aḵ Apudyus nangibaga ḵanane, “Awad oḵyan padda” ta papaddaona anggiḵbot. Siya bos amapadda'tte somsomoḵni ta igammuwonni dayaw ḵan ḵabooḻan Apudyus we maila ḵan Kristu.

Romans 5:21

Yaḵon naḵabasuḻ da losane tagu ḵad sa ambanaganda matoyda ya misinada ḵan Apudyus aḵ inggana. Sinsadi gapu'tte ḵinabaḻuna'tta tagu ya mipagapu'tte ḵingwan Jesu Kristu we Apu taḵu, aḵ Apudyus angwa si maun-unan da tagu ta mataguda'ḵ inggana.

John 12:50

Ḵad da igammuḵe imbilinna, siya angitod si biyag aḵ inggana. Pun da ibagaḵ, siya da paibagan Amaḵ.”

John 8:56

Amod de layad Abraham we daḵdaḵoḻyu te ilana aḻgawe umaliyaḵ sina. Pun tuttuwae nipaila ḵan siya woḵ allaylayad.”

Mark 16:16

Ngaimane amati ḵan saḵon ya mabonyagan, matagu. Yaḵon sa adipun amati, maḵoddongan aḵ madusa.

Hebrews 11:1

Ngai pammati nu? Sa pammati ḵad aaddi ye mituttuwa da namnamaon taḵu ḵad antaḻgod taḵu we awad da banage aditaḵupun ilan.

Hebrews 11:27

Gapu si pammati, tinenan Moses ad Egypt we adinapun iyyogyat sangan ni ari. Inanusanae nampaḵaḻam te isun di innilana'ḵ Apudyus we adipun maila.

John 14:17

Siya Ispiritu Santu we angituttudu ḵan diḵayu si ḵatuttuwaan mipanggob ḵan Apudyus. Da tagu we adipun amati ḵan saḵon, adidapun awaton te adidapun igammu ya immatunan. Yaḵon ḵan diḵayu, igammuyu te awad ḵan diḵayu ya iinggaw ḵan diḵayu.

Matthew 10:15

Ibagaḵ ḵan diḵayu ḵatuttuwaan, nu dumatong anguwisan Apudyus atta losane tagu, nadagdagson dusan da tagu si sadi ye ili nu sa dusan da iSodom ḵan iGomorrah.”

Matthew 25:46

Pune sadi ḵanan Jesus we nangiyanungus, “Da annae tagu, madusada'ḵ inggana yaḵon da naun-unane tagu, mataguda ḵan Apudyus aḵ inggana.”

John 6:39

Ḵad sa pinion ni nangibuun ḵan saḵon, ayyuwanana da innatodnae amati ḵan saḵon. Pauliyoḵ dida taguwon si anungus ni aḻgaw,

John 6:44

Naippun tagu'ḵ maḵaali ya amati ḵan saḵon nu adin Amaḵ we nangibuun ḵan saḵon iyadani. Ḵad da amati, taguwoḵ dida ḵasin si anungus ni aḻgaw.

John 11:24

Ḵanan Martha, “Igammuḵe umuli'tte umuliyan da natoy si anungus ni aḻgaw.”