Hebrews 5:7 - Sa Ugud Apudyus

⁷ Sa inninggawan Jesus si annae lubung, indangsoḻna iyyibile nalluwaḻu ḵan nanḵodaw ḵan Apudyus we ḵallamog anagu ḵan siya si ḵatoy. Pun dingngoḻ Apudyus luwaḻuna te tummuttuwa ya impakumbabana long-agna.

Hebrews 5:7 Referans Kwoze

John 17:1

Inabus ḵad Jesus imbaga da anna, nantangad ad langit woḵ ḵanana, “Ama, dummatong timpu we padayawam Abengnu ta padayawana bos siḵa.

Matthew 27:46

Pun ummag-agaw ḵad, ḵanan Jesus we nampoḵaw, “Eli, Eli, lema sabachthani?” Sa piona ḵanan, “Apudyusḵu, Apudyusḵu, ngaipam saḵon an-awidan?”

Mark 15:34

Pun ummag-agaw ḵad, nampoḵaw aḵ Jesus woḵ ḵanana, “Eloi, Eloi, lema sabachthani?” Sa piona ḵanan, “Apudyusḵu, Apudyusḵu, ngaipam saḵon an-awidan?”

Hebrews 12:28

Pun anggappiya taḵu ḵan Apudyus te midoga taḵu si ampangatanae adipun mayugayug. Ḵad dayawon taḵu'tte mas-omana ya patgan taḵu ḵan isipog taḵu.

John 11:35

Ummibil aḵ Jesus.

Matthew 27:50

Napapḵaaw ḵad ḵasin aḵ Jesus, naḵaan angosna.

Mark 15:37

Pun napapḵaaw aḵ Jesus woḵ naḵaan angosna.

Hebrews 2:14

Gapu ta tagu da annae abeng Apudyus we maḵwae matoy, nambalin aḵ Jesus aḵ tagu we isuda. Ḵingwana sana ta mipagapu si matoyana, oḻgona'ḵ Satan we anna ḵabooḻana si ḵatoy

Luke 23:46

Napapḵaaw aḵ Jesus woḵ ḵanana, “Ama, itaḻgodḵu ḵalidodwaḵ ḵan siḵa.” Imbagana ḵad sadi, naḵaan angosna.

Hebrews 13:20

Aḵ Apudyus we maḻpuwan ni lumin-awaan, tinaguna ḵasin aḵ Jesus we Apu taḵu we ḵangatuwane angayyuwan atta karnero. Mipagapu si daḻan Jesus we pummoy-as si natoyana'tte kros, pinanoḵnoḵana annanayune tuḻag.

1 Timothy 3:16

Ḵad iniiggammu taḵu we ampatopatog pinati taḵu mipanggob ḵan Jesu Kristu. Adipun nipaigammu si awe yaḵon impaigammun Apudyus ḵan ditaḵu sinsadi. Nambalin aḵ tagu ya pinanoḵnoḵan ni Ispiritu Santu we siya Abeng Apudyus. Innilan da anghel, niwaḻagawag mipanggob ḵan siya'tta ḵinailin di ili. Namati da tagu'tte lubung ḵan siya woḵ nipangatu'd langit ta madaydayaw.

2 John 1:7

Te lummoswa da adu we umallelaw si annae lubung. Adidapun bigbigone aḵ Jesu Kristu nambalin aḵ tuttuwae tagu'tte ummaliyana si lubung. Da ḵaḵnate tagu, umallelawda ya ḵabusuḻ Kristu dida.

1 John 4:3

Yaḵon da losane tagu we adipun amigbig atte mipanggob ḵan Jesus we nambalin tagu, daḵampun ḵan Apudyus naḻpuwan da ibagabagada nu adi sa Ispiritun ni sumullagi ḵan Kristu. Didingngoḻyu we umali sadi ye sumullagi ḵan Kristu ḵad naabuse anna si lubung sinsadi.

Galatians 4:4

Yaḵon dummatong ḵad ustu we timpu we inḵoddong Apudyus, imbuunna abengna ta miyanaḵ atte bubai. Niyanaḵe Judyu we paituray atte lintog.

John 11:42

Inigammuḵe pasige dongngom saḵon yaḵon ibagaḵ sana mipagapu'tta annae tagu we ataḵtaḵdog ta amatidae siḵa nangibuun ḵan saḵon.”

Romans 8:3

Sa lintog daḵampun aḵ lamogna ditaḵu puḵayan atte ḵabooḻan ni basuḻ te tagu taḵu we abuse aditaḵupun lamog tuttuwaon da imbilin ni lintog. Yaḵon ḵingwan Apudyus adimpun ni lintog lamog ḵoon. Imbuunna abengnae isun da tagu we ḵabasbassuḻan ta maḵoddongan aḵ madusa para'tta basuḻ taḵu. Ḵad sadi inon Apudyus we nangaan atte ḵabooḻan ni basuḻe anturay atta tagu.

John 1:14

Sa Ugud, nambalin aḵ tagu woḵ inninggaw ḵan ditaḵu. Amod de ḵinabaḻuna ya ḵatuttuwaan da losane imbagabagana. Innilani ḵan siya nakaskasdaawe ugalin Apudyus te siya abus aḵ Abeng we naḻpu ḵan Amana.

Hebrews 10:5

Annaya gapuna, anna ḵade madam-an umaliyan Kristu si annae lubung, ḵanana ḵan Apudyus, “Daḵampun aḵ siya piom da midatun ya da datun, yaḵon insaganam long-age para ḵan saḵon.

Hebrews 10:10

Pun gapu ta nituttuwa pinion Apudyus, pummoḻḵas taḵu'tta basuḻ taḵu mipagapu si namingpingsane nangidatunan Jesu Kristu si long-agna.

Hebrews 11:7

Mipagapu si pammatin Noah, nandongoḻ atta imbagan Apudyus mipanggob atta banage maḵwa si umali ye aḻgawe daannapun yan ilan. Tinuttuwana'ḵ Apudyus woḵ nangwa'ḵ daḵoḻe bapur ta matagudae simbaḻyan. Gapu si pammatina, impailanae nankamali da tagu'tte lubunge adidapun amati ḵan Apudyus ya dusaon Apudyus oḵyan dida. Pun imbelang Apudyus aḵ naun-unan mipagapu si pammatina.