Hebrews 4:15 - Sa Ugud Apudyus

¹⁵ Te sa ḵangatuwane padi taḵu maawatana da losane anḵuyaan taḵu te pinadasna da nankalakalasi ye sulisuge isu taḵu bos. Yaḵon adipun naḵabasuḻ.

Hebrews 4:15 Referans Kwoze

2 Corinthians 5:21

Aḵ Kristu, ippun paat basuḻna. Yaḵon gapu ḵan ditaḵu, imbelang Apudyus aḵ ḵabasbassuḻan ta mipagapu si niyossaanan taḵu ḵan siya, aḵ Apudyus angwa si maun-unan taḵu.

1 John 3:5

Igammuyu we ummali'ḵ Kristu ta ḵaanona da basuḻ te siya ḵad naippun paat basuḻna.

1 Peter 2:22

Adipun paat naḵabasuḻ ya ippun paat nantultulliyana.

Hebrews 7:26

Ḵad aḵ Jesus ḵangatuwane padi taḵu we ustuustu we siya ḵasapuḻan taḵu. Te nasantuwan, ippun ḵadellawana ya ippun basuḻna. Nitotoḵḵon atta ḵabasbassuḻan woḵ nipangatu'd langit.

Hebrews 4:14

Pun gogomgoman taḵu pammati taḵu te aḵ Jesus we Abeng Apudyus siya maḵabooḻe ḵangatuwane padi taḵu we ummoy ḵan Apudyus ad langit.

Hebrews 5:2

Siya ḵad anna bos anḵuyaana ḵad maanusana da ḵabasbassuḻane adidapun igammu we lawweng da ḵooḵoonda.

John 8:46

Ngai ḵan diḵayu anaḵdoḻe naḵabasuḻaḵ? Ippun! Nu ibagaḵ ḵatuttuwaan, ngaipayu adi patiyon nu?

Luke 22:28

“Inninggaw ḵayu ḵan saḵon atta nampaḵaḻamaḵ.

Luke 4:2

Sa inninggawana ḵad aḵ opatpuḻu we aḻgaw sidi, pinadas Satan sinulisug. Sa sadi ye timpu, naippun nanganan Jesus inggana'ḵ nauḻauḻat.

Matthew 12:20

An-anggom atta tagu we anḵuya pammatidae isun ni adinapun putton naḻupaḵe loda baḵon nu badangana da aḵit pammatidae isun ni adinapun ḵospon anḵusḵusyope silaw. Pagatupanae an-anggom atta tagu we isun ni sana inggana'ḵ ḵoona da tagu'ḵ maun-unan si antotollong Apudyus.

Matthew 4:1

Pune sadi, impuyut ni Ispiritu Santu aḵ Jesus atte bumbummaaw ta padason Satan sulisugon.

Romans 8:3

Sa lintog daḵampun aḵ lamogna ditaḵu puḵayan atte ḵabooḻan ni basuḻ te tagu taḵu we abuse aditaḵupun lamog tuttuwaon da imbilin ni lintog. Yaḵon ḵingwan Apudyus adimpun ni lintog lamog ḵoon. Imbuunna abengnae isun da tagu we ḵabasbassuḻan ta maḵoddongan aḵ madusa para'tta basuḻ taḵu. Ḵad sadi inon Apudyus we nangaan atte ḵabooḻan ni basuḻe anturay atta tagu.

Hebrews 9:28

Isuna bos ḵan Kristu, namingpingsane indatunna long-agna ta ḵaanona da basuḻ da adu we tagu. Ḵad nu umali ḵasin, daḵampun aḵ gapu'tta basuḻ yaḵon taguwona da anguuway ḵan siya.