Hebrews 11:25 - Sa Ugud Apudyus

²⁵ Siya piona midoga ampaḵaḻam atta tagun Apudyus nu sa maḵagangganas si sin-aḵitane gangganase maḵabasuḻan.

Hebrews 11:25 Referans Kwoze

2 Corinthians 5:17

Pun ngaimane niyossaan ḵan Kristu, nambalinon Apudyus aḵ baru we naḵwa. Naippun ogon dadaane ḵinatataguna te napasantan si baru we biyag.

Revelation 18:7

Sa ḵinaadun ni ḵinabaḵnangna ḵan ḵinasoḵaḻna, ḵaḵnat os isun ni lopong ni ampaḵaḻamana ya sa domdomna. Te ḵanana'tte somsomoḵna, ‘Saḵon de queen we ampangat. Andomdomaḵ ḵammane isun di baḻu?’

1 Peter 2:10

Sa awe, daḵampun aḵ tagun Apudyus diḵayu. Yaḵon sinsana, taguna diḵayu. Sa awe, adiyupun os inawat ḵadaguna yaḵon sinsana inawatyu ḵadaguna.

James 5:5

Amod de lam-ay ḵan ganas ni biyagyu sina'd luta. Ḵad isuyun baḵae tummabae madam-an misid-ana.

James 1:20

Te sa sangan ni tagu adinapun paat idaḻan ditaḵu si naun-unane biyage pinion Apudyus.

Hebrews 11:37

Nabatubatu da udum inggana'ḵ natoyda, nalagadi da udume nanḵagwada. Natoy da udum si ispada. Nansilupda'tta ḵublit da karnero ḵan kalding. Ḵapusda, nampaḵapaḵaḻamda ya naam-amesda.

Hebrews 10:32

Yaḵon iḵagasmoḵyu ḵasasaadyu'tte ḵesane timpu si nasilawan da somsomoḵyu'tte ḵatuttuwaan mipanggob ḵan Kristu, inaattomanyu ummamdane nampaḵaḻamanyu yaḵon adiyupun iyyunude paḵḵog ḵayu.

Hebrews 4:9

Pun sissiyae awad de maḵaillongan da tagun Apudyus we isun ni ummillongana'tte miḵapitu we aḻgaw.

2 Timothy 1:8

Pun adiḵa mabaine angipanoḵnoḵ si mipanggob ḵan Apu. Adiḵa bos mabain gapu ḵan saḵone nibaḻud gapu'tte nanserbiyaḵ ḵan siya yaḵon anusam attoman ampaḵaḻamam gapu si angiwaḻagawagan taḵu'tte Ambaḻu we Damag. Attomam te papigsaon Apudyus siḵa.

Colossians 1:24

Sinsadi allaylayadaḵ atta ampaḵaḻamaḵ te igammuḵe bumaḻuwanyu te da sanae ampaḵaḻamaḵ dogan ni ampaḵaḻamane nilaḵ-am Kristu para'tta losane namati ye isun di long-agna.

Romans 5:3

Daḵampun aḵ abus da sadi'ḵ allaylaydan taḵu yaḵon allaylayad taḵu'tta ampaḵaḻaman taḵu te igammu taḵu we sa ampaḵaḻaman siya ibungana ḵan ditaḵu ḵinaattom.

Luke 16:25

“Yaḵon ḵanan Abraham, ‘Abengḵu, iḵagasmoḵnu timpun ni nataguwame allin-awa biyagnu. Ḵad aḵ Lazarus, nampaḵaḻam. Yaḵon sinsadi, annae allaylayad sina ya siḵa ḵad, annate ampaḵapaḵaḻamḵa.

Matthew 13:21

Yaḵon adipun lummamut atta somsomoḵda. Amatida'ḵ sin-aḵitan, ḵad nu dumatong ampaḵaḻaman baḵon nu mapadasda gapu'tte amatiyanda si Ugud Apudyus, daguse iwaḻangda pammatida ḵan Apudyus.

Acts 7:34

Innilaḵe mapaḵapaḵaḻam da taguḵ ad Egypt ya dingngoḻḵu bos ayuwongda. Pun annae ummaliyaḵ ta iyyaḵ dida puḵayan. Umaliḵa ta ibuunḵu siḵa'd Egypt.’