Ephesians 2:5 - Sa Ugud Apudyus

⁵ Taḵon ay nu isun di natoy taḵu gapu'tta basuḻ taḵu, innatodna baru we biyag gapu si niyossaanan taḵu ḵan Kristu. Pun sa ḵinabaḻun Apudyus gapun ni nataguwan taḵu'tte madusaan si basuḻ.

Ephesians 2:5 Referans Kwoze

Romans 3:24

Yaḵon gapu'tte libli ye atod Apudyus ḵan ditaḵu ya gapu'tte ḵinabaḻuna, ḵingwana ditaḵu'ḵ naun-unan mipagapu ḵan Jesu Kristu we nanubut ḵan ditaḵu'tte dusan da basuḻ taḵu.

Ephesians 2:8

Gapu'tte ḵinabaḻun Apudyus natagu taḵu mipagapu si pammati taḵu ḵan Kristu. Daḵampun atta ḵingwa taḵu yaḵon sa atod Apudyus.

Romans 5:10

Sa awe sissiyae ḵabusuḻ taḵu'ḵ Apudyus. Yaḵon sinsadi, nipaḻ-og naḵabuḻbuḻunan taḵu ḵan siya mipagapu'tte natoyan Jesu Kristu we abengna. Gapu ta buḻbuḻunna ditaḵu, amo dallu we taguwona ditaḵu gapu si ummuliyana.

Romans 5:8

Yaḵon aḵ Apudyus impailana amode ayatna ḵan ditaḵu si sissiyae ḵabasbassuḻan taḵu, natoy aḵ Kristu para ḵan ditaḵu.

Acts 15:11

Yaḵon amati taḵu we matagu taḵu mipagapu'tte ḵinabaḻun Apu Jesus we isuna bos ḵan dida.”

Ephesians 2:1

Sa daanyu amatiyan, isuyun nanattoy atte mipanggob ḵan Apudyus gapu'tta basuḻyu.

Romans 8:2

Gapu si niyossaanan taḵu ḵan Jesu Kristu, anturay Ispiritu Santu ḵan ditaḵu ya innatodna baru we biyag ḵan ditaḵu ya pinuḵayan ditaḵu'tte ḵabooḻan ni basuḻ ḵan ḵatoy.

Titus 2:11

Ḵaḵna oḵyan ugalin da namati te impailan Apudyus ḵinabaḻuna mipagapu'tte nangibuunana ḵan Jesus si annae luta ta taguwona oḵyan da losane tagu'tte madusaanda'tte basuḻ.

Ephesians 5:14

Ḵad pumadda da losan nu nasilawanda. Sadi piona ḵanan atte nigili ye Ugud Apudyus we ḵanana, “Bumangonḵae masusuyop, mataguḵae natoy, ta silawan Kristu somsomoḵnu.”

Romans 4:16

Pun sana gapunae mibatay atte pammati ta sa inkarin Apudyus mibatay si ḵinabaḻuna ya aaddi ye mituttuwa'tta losane mibelang aḵ ganaḵna, daḵampun aḵ abus da Judyu aḵ angigammu'tte lintog yaḵon da losane amati ye isun ni pammatin Abraham. Te siya ama taḵu losan.

2 Corinthians 13:14

Awad oḵyan ḵan diḵayu losan ḵinabaḻu we maḻpu ḵan Apu Jesu Kristu ya sa ayat Apudyus ya sa niyossaanan ni Ispiritu Santu.

Titus 3:5

tinaguna ditaḵu. Daḵampun aḵ gapu'tta naun-unane ḵingwa taḵu nataguwan taḵu, nu adi gapu si ḵummadaguwana. Tinaguna ditaḵu'tte namapoḻḵasana'tta basuḻ taḵu ḵad isun di niyanaḵ taḵu ḵasin ya naittan taḵu'ḵ baru we biyag gapu'tte ḵabooḻan ni Ispiritu Santu.

Romans 5:6

Sissiyae ippun ḵabooḻan taḵu we angwa si pinion Apudyus, natoy aḵ Kristu atte ustu we timpu para'tta ḵabasbassuḻan.

Romans 16:20

Adipun manunnuwan ya aḵ Apudyus we maḻpuwan ni lin-awa oḻgona'ḵ Satan we isun di gusgusdan taḵu. Awad oḵyan ḵan diḵayu ḵinabaḻu we maḻpu ḵan Apu Jesu Kristu.

John 6:63

Sa angitod atte biyag, sa Ispiritu Santu. Naippun lamog ni long-ag itton. Ḵad da inugudḵu ḵan diḵayu, naḻpuda'tte Ispiritu ḵad siya angitod si biyag aḵ inggana.

John 5:21

Te nu tinagun Amaḵ da natoy ya ittana dida si biyag, taguwoḵ ose Abengna ya ittaḵ os si biyag da pioḵ.

Revelation 22:21

Awad oḵyan ḵan diḵayu we losane tagun Apudyus ḵinabaḻun Apu Jesu Kristu. Amen.

Luke 15:24

Te sa annae abengḵu isun di natoy yaḵon annae natagu. Nataḻaḵ yaḵon annae naodasan.’ Pune sadi insaḻaddae nanggangganas.

Colossians 2:13

Sa naḻaḵpuse aḻgaw, isun di natoy ḵayu si mipanggob ḵan Apudyus gapu'tta basuḻyu ya gapu ta diḵayu we Gentil naippun igammuyu si mipanggob atte Lintog Apudyus. Yaḵon sinsadi, indogan Apudyus diḵayu'tte baru we biyage innatodna ḵan Kristu te pinakawanna da losane basuḻ taḵu.