Colossians 2:19 - Sa Ugud Apudyus

¹⁹ Pun nisinada ḵan Kristu we isun di siya uḻu taḵu we namati. Ditaḵu ḵad, niyossaan taḵu ḵan siya te ditaḵu isun di long-agna. Pun sa uḻu asi ḵigad atte losane ḵamangay ni long-ag ta awaton ni sin-ossaossa da ḵasapuḻana ya miyustu-ustu uḻnus da losan. Pun siya dumaḵoḻan taḵu gapu'tte pigsae itton Apudyus ḵan ditaḵu.

Colossians 2:19 Referans Kwoze

2 Peter 3:18

yaḵon pagatupanyu oḵyan padason amode ḵinabaḻun Jesu Kristu we Apu taḵu ya Anagu ḵan ditaḵu ḵad dogdog-anyu bos inigammuyu ḵan siya. Madaydayaw oḵyan aḵ Kristu sinsana ya aḵ inggainggana. Amen.

1 Peter 3:8

Annaya mungimung ni ibagabagaḵ. Ḵasapuḻane an-os-ossaan ḵayu losan atte somsomoḵ ḵan maḵagiḵna ḵayu'tta buḻunyu. An-asiayat ḵayu we isun di mismu we ansusunud, an-asiḵadagu ḵayu ya ipakumbabayu da long-agyu.

Colossians 2:2

ta masoḻgag oḵyan da somsomoḵyu ya an-os-ossaan ḵayu gapu si an-asiayat ḵayu ta adi ḵayu anduwaduwa yaḵon maawatanyu planun Apudyus we adipun nipaigammu'tte awe ye sa mipanggob ḵan Kristu.

1 Thessalonians 4:10

Ḵad tuttuwa te ayatonyu da losane susunud ḵan Kristu atte intero we probinsiya'd Macedonia. Yaḵon amo bilibilinonni diḵayu susunud ta amo pumigsa ayatyu.

1 Thessalonians 3:12

Dog-an oḵyan Apu ayatyu ta lumay-as atta buḻunyu ya losane tagu we isun ni ayatni ye lummay-as ḵan diḵayu.

2 Thessalonians 1:3

Susunudḵu ḵan Kristu, ḵasapuḻane patilayun ḵani anggappiya ḵan Apudyus gapu ḵan diḵayu, ḵad mibagay nu ḵoonni ḵaḵna te pumigsapigsa da pammatiyu ḵad amo madog-adog-an ayat ni sin-ossaossa ḵan diḵayu we an-asiayat.

Colossians 1:18

Siya isun di uḻu taḵu we namati, ḵad ditaḵu isun di long-agna. Ḵad siya bos maḻpuwan ni mataguwan taḵu te siya panguḻu we Abeng Apudyus we ummuli ta ambalin aḵ ḵangatuwan atta losan.

Colossians 1:10

Te nu ḵatti, maḵwae unudonyu antatagu we mibagay atte ḵinabaḻun Apu ya pasigyu ḵoon da amalayad ḵan siya. Ḵad ambaḻu ibungan da losane ḵoonyu ya madog-an igammuyu mipanggob ḵan Apudyus.

Philippians 1:27

Yaḵon taḵon ay nu ngai maḵwa, ilanyu ta mibagay antataguyu si Ambaḻu we Damag mipanggob ḵan Kristu ta umaliyaḵ ta iyyaḵ diḵayu ilan baḵon nu adiḵpun dongngon oḵyan mipanggob ḵan diḵayu, igammuwoḵ ose sissiyae ampigsa pammatiyu we os-ossaan panggobyu. Ḵad ḵasapuḻane an-os-ossaan os somsomoḵyu we angitaḵdoḻ si pammatiyu we mibatay si ḵatuttuwaan ni Ambaḻu we Damag,

Ephesians 5:29

Naippun tagu'ḵ sasangngaana long-agna yaḵon siya ḵoona ummana ayyuwanan. Ḵatti isun ni ḵingwan Jesu Kristu ḵan ditaḵu we namati,

Ephesians 4:3

Ipapatiyu an-ossaanon ansosomsomoḵyu we maḻpu'tte Ispiritu Santu mipagapu si pagapagatupanyu allin-awae maḵabuḻbuḻunanyu.

Ephesians 1:22

Impangatun Apudyus aḵ Kristu ta siya angipangat atta losane banag ya siya bos dinutuḵan Apudyus we pangat da losane namati.

1 Corinthians 3:6

Sa mipaniyana, isun di saḵon nangimuḻa si buḵoḻ ya aḵ Apollos nansilug yaḵon aḵ Apudyus namadaḵoḻ.

1 Corinthians 1:10

Susunudḵu ḵan Kristu, gapu'tte ngadan Apu taḵu we Jesu Kristu, an-uunud oḵyan da losane ugudonyu ya adi ḵayu magoggogwa yaḵon an-os-ossaanonyu somsomoḵyu ya sa panggobyu.

Romans 11:17

Da Judyu mipanida'tte ḵayu we olive we immuḻan Apudyus. Yaḵon simpaḵ Apudyus da udume pangana. Diḵayu we Gentil, mipani ḵayu'tta pangan ni ḵayu we olive we naippun nangimuḻa. Sa ḵingwan Apudyus, impasanina diḵayu'tta pangan ni ḵayu we immuḻana. Ḵad sinsana, midoga ḵayu maḵabillay atte lutae naḻpu'tte lamut ni sadi ye ḵayu we olive.

Acts 4:32

Losan atta namati nan-os-ossaan ḵasomsomḵanda. Adidapun ibelange ḵuwada da ḵuḵuwada yaḵon siya ḵoonda nan-aḵ-atodda.

John 17:21

Iluwaḻuḵe an-os-ossaanom dida losan. Ama, awadḵa ḵan saḵon ya awadaḵ ḵan siḵa ya awadda oḵyan os ḵan dita ta amati da tagu we siḵa nangibuun ḵan saḵon.

1 Corinthians 11:3

Yaḵon awad os osae pioḵe maawatanyu we aḵ Kristu isun di uḻun da losane laḻaḵi ḵad sa laḻaḵi isun di uḻun ni asawana. Ḵad aḵ Apudyus siya isun di uḻun Kristu.

Ephesians 1:23

Te ditaḵu isun di long-agna ya siya isun di uḻu taḵu. Ḵad ditaḵu we namati isun di wadawadan Kristu ya siya ḵad os, awad atta losane lugar ta siya anḵawadawadan da losane banag.

Ephesians 2:21

Siya aangdon ḵan amapagdot si losane partin ni templo ta magagaaman ḵopyana. Ḵad gapu si niyossaananyu ḵan Apu, nibelang ḵayu'tta losane namati ye usaron Apudyus aḵ antaḵad si templo we inggawana mipagapu'tte Ispiritu Santu.

Luke 5:38

Yaḵon ḵasapuḻane ibilung oḵyan inabuyu si baru we geddange bibillungan.