Colossians 1:12 - Sa Ugud Apudyus

¹² Pasig ḵayu anggappiya ḵan Apudyus we Ama taḵu we nangitod ḵan ditaḵu si ḵaḻabbongane maḵatawid atta insaganana'tta losane taguna si ampaddae ampangatana.

Colossians 1:12 Referans Kwoze

Acts 20:32

“Sinsadi itaḻgodḵu diḵayu ḵan Apudyus ya sa ḵinabaḻuna. Siya maḵabooḻe amapigsa'tta pammatiyu ya angitod si impaḻaḵsunna'tta losane intotoḵḵonnae taguna.

Ephesians 1:11

Losane maḵwa, mibatay atte gagangaye planun Apudyus. Pinilina diḵani ye Judyu aḵ ambaline taguna gapu si niyossaananni ḵan Kristu. Te siya gagangaye planuna inggan ni lapuna,

Ephesians 1:18

Ḵodawoḵ ose silawan Apudyus da somsomoḵyu ta igammuwonyu namnamaon taḵu gapu si namiliyana ḵan ditaḵu ya maawatanyu ḵaadu ḵan ḵinabaḻun ni bindisyune inkarina'tta tagun Apudyus.

Acts 26:18

Ibuunḵu siḵa ḵan dida ta igammuwonda ḵatuttuwaan ta masilawan da somsomoḵda ya an-awidanda da lawweng ya ansagungda si padda. Ḵad an-awidanda ḵabooḻan Satan ḵad ansagungda si ḵabooḻan Apudyus ta amatida ḵan saḵon ḵad mapakawan da basuḻda ya mibelangda'tta intotoḵḵon Apudyus aḵ taguna.’

Ephesians 3:6

Annaya impaigammunae planuna. Gapu si namatiyanyu si Ambaḻu we Damag, nibelang ḵayu we Gentil aḵ abeng Apudyus we miyisu ḵan diḵani ye Judyu ya nibelang ḵayu bos atta losane namati aḵ ḵamangay ni long-ag Kristu. Maḵabillay ḵayu bos si inkarin Apudyus we ittona'tta losane niyossaan ḵan Jesu Kristu.

2 Corinthians 5:5

Aḵ Apudyus nangisagana ḵan ditaḵu si mipasaniyan ni baru we long-ag. Ḵad innatodna Ispirituna ta amanoḵnoḵ ḵan ditaḵu we ittona da losane inkarina.

Romans 8:17

Ḵad gapu ta abeng Apudyus ditaḵu, maḵatawid taḵu'tta ipaḻaḵsun Apudyus atta taguna ḵad maḵatawid taḵu'tta impatawidna ḵan Kristu. Nu midoga taḵu si ampaḵaḻaman Kristu, midoga taḵu bos si madayawana.

Hebrews 3:14

Te buḻun taḵu'ḵ Kristu nu gogomgoman taḵu pammati taḵu si inggan ni namatiyan taḵu inggana si anungus ni timpu.

John 14:6

Ḵanan Jesus, “Saḵon daḻan, ḵatuttuwaan ḵan biyag. Naippun maḵaoy ḵan Amaḵ nu adi angoy ḵan saḵon.

Revelation 21:23

Sa paddan ni init ḵan soḻag, adipun os ḵasapuḻan te sa silaw ni siyudad, sa ḵinapaddan Apudyus ya sa Ubbu we Karnero.

Hebrews 12:23

Umadani ḵani'tta losane namati ḵan Apudyus we mibelang aḵ panguḻu we abengnae andatdatong. Da nigili da ngadanda'd langit. Ḵad umadani ḵani ḵan Apudyus we anguwis atta losane tagu ya umadani ḵani'tta ḵalidodwan da naun-unane natoye da nambalinona'ḵ ippun angkuranganda.

Colossians 2:2

ta masoḻgag oḵyan da somsomoḵyu ya an-os-ossaan ḵayu gapu si an-asiayat ḵayu ta adi ḵayu anduwaduwa yaḵon maawatanyu planun Apudyus we adipun nipaigammu'tte awe ye sa mipanggob ḵan Kristu.

Ephesians 5:20

Ḵad pasig ḵayu anggappiya ḵan Apudyus we Ama atta losane banag atte ngadan Apu taḵu we Jesu Kristu.

1 Corinthians 8:6

Yaḵon ḵan ditaḵu, ossaan Apudyus we Ama taḵu. Siya nangwa'tta losane banag ya siya gapun ni mataguwan taḵu. Ossaan Apu we siya'ḵ Jesu Kristu. Naḵwa da losane banag mipagapu ḵan siya ya matagu taḵu mipagapu ḵan siya.

Romans 15:27

Simsimmoḵdae bummadang. Sa ḵatuttuwaan, labbongnae badanganda da ḵapus ad Jerusalem ta milaḵ-am da Gentil atta naispirituwane bindisyun da Judyu ḵad labbongna bose anserbi da Gentil atta Judyu.

James 3:9

Siya usaron taḵu we andayaw ḵan Apu taḵu ya Ama taḵu we Apudyus ya siya bos usaron taḵu we an-ugud aḵ lawweng atta asintatagu taḵu we naḵwa'ḵ ḵais-isun Apudyus.

Hebrews 3:1

Pun susunudḵu ḵan Kristu we da tagun Apudyus we da pinilinae midoga ḵan siya'd langit, sosomḵon taḵu we aḵ Jesus imbuun Apudyus ḵan ditaḵu ya siya ḵangatuwane padi taḵu sigun si pinati taḵu.

Colossians 3:17

Ngaimane ḵoonyu ḵan ugudonyu, ḵoonyu mipagapu si ngadan Apu Jesus ḵad anggappiya ḵayu ḵan Apudyus we Ama mipagapu ḵan siya.

Colossians 3:15

Pasig oḵyan lin-awa ya sa timpuyuge innatod Kristu angituray atta somsomoḵyu te sana gapun ni namiliyan Apudyus ḵan diḵayu ta an-os-ossaan ḵayu we long-ag Kristu. Ḵad pasig ḵayu anggappiya ḵan Apudyus.

Ephesians 5:4

Adipun os mibagay ḵan diḵayu ḵaissaw an-uugudyu ya dinodong-og an-uugudyu we ippun anuna yaḵon siya oḵyan ḵoonyu anggappiya ḵayu ḵan Apudyus.

Ephesians 4:6

Os-ossaan os Apudyus we losan taḵu Ama. Siya angipangat ḵan ditaḵu losan, anḵewaaḻ mipagapu ḵan ditaḵu losan ta mituttuwa da piniona ya iinggaw ḵan ditaḵu losan.

1 Corinthians 9:23

Ḵooḵ losan da sana gapu'tte Ambaḻu we Damag ḵad maḵabillayaḵ atta bindisyune itton Apudyus ḵan dida.

Romans 11:17

Da Judyu mipanida'tte ḵayu we olive we immuḻan Apudyus. Yaḵon simpaḵ Apudyus da udume pangana. Diḵayu we Gentil, mipani ḵayu'tta pangan ni ḵayu we olive we naippun nangimuḻa. Sa ḵingwan Apudyus, impasanina diḵayu'tta pangan ni ḵayu we immuḻana. Ḵad sinsana, midoga ḵayu maḵabillay atte lutae naḻpu'tte lamut ni sadi ye ḵayu we olive.

Romans 9:23

Te piona ipailae ippun miyisuwan ni ḵinangatuna ya ḵadaguna'tta tagu we pinilina ḵan inggallapuna insagana'ḵ midoga si ḵabaḻuwane antatagu ḵan Apudyus ad langit.

John 20:17

Ḵanan Jesus, “Adim yan onnan saḵon te daanaḵpun mipauli ḵan Amaḵ. Yaḵon inḵa'tta susunudḵu we namati ya ibagam ḵan didae mipauliyaḵ ḵan Amaḵ we Amayu ya Apudyusḵu we Apudyusyu.”

John 4:23

Yaḵon dummatong timpu we da tuttuwae andayaw ḵan Apudyus we Ama, ḵasapuḻane andayawda ḵan siya si Ispiritu ya mibatay si ḵatuttuwaan. Te sanat da singsington Apudyus we andayaw ḵan siya.

Matthew 25:34

“Pun saḵone Ari, asiḵ ḵanane angibaga'tta tagu we awad si madawinanḵu, ‘Awwayyu, diḵayu we binindisyunan Amaḵ ta gangganasonyu da laḵsunyu we midog-anyu si ampangatan Apudyus we nisaganae inggawanyu inggan ni naḵwaan ni lubung.

Revelation 22:14

“Pian da tagu we anaḵsaḵ atta langgoyode silupda te awad de ḵaḻabbongandae lumnoḵ atte lewangan ni sadi ye siyudad ḵan angan atte bungan ni ḵayu we angitod si biyag.

Revelation 22:5

Ḵad naippun ogon labi, adidapun ogon masapuḻ paddan ni silaw baḵon nu sa init te mismu we aḵ Apudyus we Apu allangḻang ḵan dida. Ḵad maḵapangatda ḵan siya'ḵ inggainggana.

1 John 1:3

Da sanae innilani ya da dingngoḻni, siya sanae iwaḻagawagni ḵan diḵayu ta midoga ḵayu'tte maḵabuḻbuḻunanni ḵan Apudyus we Ama taḵu ya aḵ Jesu Kristu we Abengna.

1 Peter 5:1

Awad de pioḵ ibaga ḵan diḵayu we angipangpangu'tta namati te osaaḵ ose angipangpangu. Osaaḵ ose nangila si nampaḵaḻaman Kristu ya midogaaḵ si ḵabaḻuwane antatagu ḵan Apudyus ad langit si umali ye aḻgaw.

Titus 2:14

Siya nangitod si long-agna'ḵ matoy para ḵan ditaḵu ta mapuḵayan taḵu'tta losane ḵabooḻan ni basuḻ ya papoḻḵasona ditaḵu'tta basuḻ taḵu aḵ mitotoḵḵone tagunae sillalaylayade angwa'tta ambaḻu.

2 Corinthians 11:14

Ḵad adi taḵu oḵyan mataag si sana te taḵon ay aḵ Satan maḵwa gay ipailana long-agna'ḵ isun di ambaḻu we anghel Apudyus.

Ephesians 2:18

Ḵad mipagapu ḵan Kristu, maḵwae umadani taḵu losan ḵan Apudyus we Ama taḵu te ossaan Ispiritu we iinggaw ḵan ditaḵu.

Ephesians 5:8

Te diḵayu ḵad, isun di anggiḵbot somsomoḵyu si awe yaḵon sinsana nasilawanda gapu si niyossaananyu ḵan Apu. Pun matagu ḵayu oḵyane isun da tagu we iinggaw atte padda.

Ephesians 5:11

Adi ḵayu maḵaḵwa'tta banage ḵababbain ḵan ippun anunae ḵoḵoḵḵon da tagu we awad si giḵbote nililimod. Siya oḵyan ḵoonyu ipaḵaawatyu ḵan didae lawwelawweng da ḵoonda taḵon ay nu ḵababbain aḵ ugudon da sanae banag.