Acts 5:42 - Sa Ugud Apudyus

⁴² Ḵad inaḻgawe ummoyda'tte paway ni templo ya da boboḻoy ta pagapagatupandae angituttudu ya angiwaḻagawage aḵ Jesus siya Kristu.

Acts 5:42 Referans Kwoze

Acts 2:46

Inaḻgawe andatdatongda ya an-os-ossaandae andayaw atte templo we boḻoy Apudyus. Ḵad sillalaylayaddae anḵaḵaḵan atte tinapay atta boḻoyda ya sipupusu layadda.

Acts 20:20

Inigammuyu bose naippun adiḵ imbaga ḵan diḵayu'tta ngaimane bumaḻuwanyu si nangiwaḻagawagaḵ ḵan nantuttuduwaḵ ḵan diḵayu si sinagung da aduadu we tagu ya ummoyḵu bos binoḻoboḻoy.

2 Timothy 4:2

Iwaḻagawagnu Ugud Apudyus. Ḵasapuḻane pasigḵa maḵasagana, taḵon ay nu ambaḻu baḵon nu lawwenge timpu. Awisom dida ta amatida ḵan Jesus. Ḵad suppaḵam da angwa'ḵ lawweng ya soḻgagom dida ta ḵoonda ambaḻu ya anusam ose antuttudu.

Acts 8:35

Pun illawlawag Philip we insaḻadna'tta sadi ye nigili ye Ugud Apudyus woḵ imbagana Ambaḻu we Damag mipanggob ḵan Jesus.

Luke 21:37

Inaḻgawe ummoy aḵ Jesus nantuttudu'tte paway ni templo ya nilabi ye ummoy atte Beleg Olives.

Acts 17:3

Impaḵaawat Paul ḵan pinanoḵnoḵanae ḵasapuḻane ampaḵaḻam aḵ Kristu ya matoy ḵad umuli. Pun ḵanana, “Sa annae Jesus we iwaḻagawagḵu ḵan diḵayu, siya Kristu.”

Acts 9:20

Pun ummoy atta sinagogan da Judyu woḵ daguse insaḻadnae nangiwaḻagawage aḵ Jesus Abeng Apudyus.

Acts 4:29

Sinsadi Apu, dongngom da sanae iḵoḻḵogda ḵan diḵani ye sammilum. Ittam ud diḵani'ḵ tuḻode angibagabaga si ugudnu.

Galatians 6:14

Yaḵon ḵan saḵon, ippun udum aḵ isḵaḻḵu, abus natoyan Jesu Kristu we Apu taḵu'tte kros te gapu si sanate natoyana, da patpatgon da tagu we adipun amati ippun patogda ḵan saḵon ya ippun os patogḵu ḵan dida.

1 Corinthians 2:2

Te simsimmoḵḵu we sa inninggawaḵ ḵan diḵayu, naippun udum aḵ intuttuduḵ yaḵon abus mipanggob ḵan Jesu Kristu ya sa nipattoḻana'tte kros.

Acts 17:18

Inninggaw os da udume mimistulun da Epicurean ya da Stoic we naḵasossongbat ḵan siya. Ḵanan da udum, “Ngai ibagabagan ni annate aginlalaing?” Ḵanan os da udum, “Siya nin iwaḻagawagna sabali ye apudyus.” Imbagada ḵaḵna te iwwaḻagawag Paul mipanggob ḵan Jesus ya sa ummuliyana.

Acts 11:20

Yaḵon da udume namati ye iCyprus ḵan iCyrene, ummoyda'd Antioch woḵ iwwaḻagawagda Ambaḻu we Damag mipanggob ḵan Apu Jesus atta Gentil.

Acts 8:5

Aḵ Philip ḵade osa ḵan dida, ummoy atte osae siyudad ad Samaria woḵ iwwaḻagawagna mipanggob ḵan Kristu.

Acts 4:20

Te diḵani ḵad, adipun maḵwae iginoḵni ye angibagabaga'tta innilani ya da dingngoḻni.”

Luke 22:53

Inaḻgawe inninggawaḵ ḵan diḵayu'tte paway ni templo we antuttudu, adiyupun saḵon dinoḵmaan. Yaḵon sinsadi, annae dummatong timpuyu we inḵoddong Apudyus ya dummatong os timpun Satan we angipangat atte giḵbot.”

Acts 13:32

“Anna ḵani sina ta ibagani ḵan diḵayu Ambaḻu we Damag we inkarin Apudyus atta danaḵḵoḻ taḵu.

Galatians 1:16

Pun impailana ḵan saḵon abengna ta iwaḻagawagḵu mipanggob ḵan siya'tta Gentil. Naippun tagu'ḵ ummoyḵu nampatuttuduwan.