Acts 24:14 - Sa Ugud Apudyus

¹⁴ Yaḵon awad de ibagaḵ ḵan siḵa. Sa unudoḵ sa tuttudun Jesus si andaydayawaḵ si Apudyus da danaḵḵoḻ taḵu ḵad ḵanandae tinutuli ye tuttudu. Yaḵon amatiyaḵ atta losane nigili ye lintog Moses ya da losane inggilin da profetan Apudyus si awe.

Acts 24:14 Referans Kwoze

Acts 9:2

woḵ nanḵodaw aḵ suḻat atta papangat da sinagogan da Judyu ad Damascus ta andoḵma'tta ngaimane odasanae laḻaḵi baḵon nu bubai ye angunud atta tuttudun Jesus ḵad iyoyna dida ibaḻud ad Jerusalem.

Romans 3:21

Yaḵon sinsana, impaigammun Apudyus inonae angwa'tta tagu'ḵ maun-unane daḵampun aḵ mipagapu si anuttuwaanda'tte lintog. Taḵdoḻan ni lintog Moses ya da inggilin da profetan Apudyus mipanggob si anna.

Acts 28:23

Pun imbagada aḻgawe andaḵdaḵnganda. Dummatong ḵad sadi ye aḻgaw, aduadu da tagu we ummoy si inggawan Paul. Pun insaḻadna'tte bigbigat inggana'ḵ lummabi ye nangipaḵaawat ya nangipanoḵnoḵ si mipanggob atte ampangatan Apudyus. Impadasna inawis dida ta amatida ḵan Jesus atte nangiwaḻagawaganna'tte lintog Moses ya da inggilin da udume profetan Apudyus.

Acts 3:13

Daḵampun ḵan diḵani yaḵon sa Apudyus da Abraham, Isaac, Jacob ya da losane danaḵḵoḻ taḵu. Siya namataddaḻan si laḻaḵi ta maila ḵinaapudyus Jesus we nanserbi ḵan siya si annae lubung. Aḵ Jesus, siya impuḻangyu'tta papangat ya indiyanyu si sinagung Gobernor Pilate atte simsimmoḵnae piona puḵayan.

Acts 26:22

Inggana sinsadi binadangan Apudyus saḵon, pun annaaḵ sinae tataḵdoge anaḵdoḻ atta losane tagu, nababa man ḵan nangatu. Ḵad naippun udum aḵ dam-oḵ ibaga yaḵon da imbagan Moses ya da udume profetan Apudyus si awe ye mituttuwa'tte umali ye aḻgaw.

Acts 24:5

“Te indasanni annae tagu we gugulu te dam-on nanggulu'tta losane Judyu si annae lubung. Siya osa'tta pangat da grupun da mituntun-ud atte iNazareth.

2 Timothy 1:3

Anggappiyaaḵ ḵan Apudyus we anserbiyaḵe ampoḻḵas somsomoḵḵu we isun ni nanseserbin da danaḵḵoḻ taḵu. Alluwaḻuwaḵ ḵad ḵan Apudyus atte inaḻgaw ḵan nilabi, adiḵpun maliwatane anggappiya ḵan Apudyus gapu si pammatim.

Acts 26:27

Ari Agrippa, patiyom ḵamman imbagan da profetan Apudyus? Igammuḵe patiyom.”

Revelation 19:10

Sa nangugudan ni anghel atte sadi, nanalluḵuwaḵe andayaw ḵan siya. Yaḵon ḵanana, “Adipun ḵasapuḻane ḵoom ḵaḵnat! Aḵ Apudyus abuse andayawam! Saḵon ḵad, anserserbiyaḵ ose isum ḵan Apudyus ya da susunudnu ḵan Kristu we sissiyae amati'tta impaigammun Jesus. Te da impaibagan ni Ispiritu Santu atta profeta, naḻpuda si impaigammun Jesus.”

1 Peter 1:11

Inniggada ḵabooḻandae an-imus nu ḵamaan ni maḵwaana ya ngai inonae mituttuwa, impaigammun ni Ispiritun Kristu ḵan dida mipanggob atte ampaḵaḻamana ya madayawana'tte ampangatana.

Titus 3:10

Nu awad tagu'ḵ angituttudu si tinutuli ye angisina'tta namati, bagbagaam ta iginoḵna. Nu amigwae bagbagaam ya adinapun paat tuttuwaon, adim os paat buḻbuḻunon,

Galatians 5:20

Daydayawonda da sinan-apudyus, ambubuyun, andadawaḵ, sasangngaanda da asintataguda, subboganda, an-aḵ-aposda, mabusutda, ansoḵaḻda, adidapun an-asiinnawat ya ansisinada.

1 Corinthians 11:19

Te ḵasapuḻan daddasig ḵan diḵayu ta mimatunan da gattoḵ da pammatida.

Acts 26:6

Ḵad annaaḵ sinsadi ye tataḵdoge masumaḻya, gapu si namnamaoḵe mituttuwa inkarin Apudyus atta danaḵḵoḻ taḵu si awe ye taguwona da natoy.

Acts 24:22

Ḵad aḵ Gobernor Felix, adu inigammuna mipanggob atta angunud atta tuttudun Jesus, impaginoḵna ḵasus Paul woḵ ḵanana, “Nu dumatong aḵ kumander Lysias, saḵon asi ḵigad atte ḵasusnu.”

Acts 22:14

Pun ḵanana, ‘Sa Apudyus da danaḵḵoḻ taḵu, pinilina siḵa ta igammuwom da piona ya ilam naun-unane Abengna we nanserbi ḵan siya ya dongngom gingana.

Acts 19:9

Yaḵon inninggaw da udum ḵan didae tummungitong da somsomoḵda woḵ adidapun tummuttuwa gapu si adidapun namatiyan ya pinaḻawengdae nangugud si mipanggob atta angunud atta tuttudun Jesus atte sinagung da tagu. Pun tinenan Paul ya da namati dida woḵ ummoyda'tte uswilaan Tyrannus. Ḵad inaḻgawe nantuttudu'ḵ Paul sidi,

Acts 13:15

Nagangput ḵad nibasa lintog Moses ya sa inggilin da profetan Apudyus, nangibuun da papangat ni sinagoga aḵ umoy angibaga ḵan da Paul ḵan Barnabas we ḵananda, “Susunudni ye ganaḵ Israel, nu awad ugudonyu'ḵ masoḻgagan da annae tagu, ibagayu ḵappos.”

Acts 10:43

Da losane profetan Apudyus si awe, tinaḵdoḻanda mipanggob ḵan Jesus ta ngaimane amati ḵan siya mapakawan da basuḻda mipagapu'tte ngadanna.”

Acts 7:32

‘Saḵon aḵ Apudyus we Apudyus da Abraham, Isaac ya aḵ Jacob.’ Dingngoḻ ḵad Moses sadi, namilpil si ḵimutna woḵ adipun maḵatuḻode angitollong.

Acts 5:30

Sa Apudyus da danaḵḵoḻ taḵu tinaguna'ḵ Jesus we gingngatyu si nangipattoḻanyu'tte kros.

John 1:45

Pune sadi, indasan Philip aḵ Nathanael woḵ ḵanana ḵan siya, “Indasanni tagu we inggilin Moses si lintog ya da profetan Apudyus atte awe. Siya'ḵ Jesus we abeng Joseph we iNazareth.”

Luke 24:44

Pun ḵanana ḵan dida, “Da annae naḵwa, ustuustu'tta imbagaḵ si sissiyaaḵ ḵan diḵayu: Losan atta nigili ye lintog Moses ya da profetan Apudyus ya da losane nigili'tte Psalm atte mipanggob ḵan saḵon ḵasapuḻane mituttuwada.”

Luke 24:27

Pun impaḵaawat Jesus ḵan dida da losane nigili'tte Ugud Apudyus mipanggob si long-agna, nisaḻad atte umunae iblun Moses inggana'tta losane inggilin da profetan Apudyus.

Luke 16:29

“Yaḵon ḵanan Abraham, ‘Nu mipanggob atta susunudnu, awad de inggilin Moses ya da profeta we anuttudu ḵan dida. Ḵad dongngonda oḵyan ya tuttuwaonda da sanae nigili.’

Luke 16:16

“Sa lintog Moses ya sa inggilin da profeta, siya tinuttuwan da tagu inggana si timpun John we Ambobonyag. Inggan ni sadi ye timpu, niwaḻagawag Ambaḻu we Damag mipanggob si ampangatan Apudyus ḵad da losane tagu ipatutdae midoga.

Luke 1:70

Siya impaibagan Apudyus atta profetanae nanserbi ḵan siya si awe

Matthew 22:40

Da losane lintog Moses ya da inggilin da profeta, nibatayda'tta sanae duwae bilin Apudyus.”

Matthew 10:32

Pinagatupan Jesus woḵ ḵanana, “Pun ngaimane amigbig ḵan saḵon si sinagung da tagu, bigbigoḵ os atte sinagung Amaḵ ad langit.

Matthew 7:12

“Pun ḵoonyu'tta udum da pionyu we ḵoonda ḵan diḵayu te sana mungimung ni lintog Moses ya da intuttudun da profeta.”

Acts 19:23

Sa sadi ye timpu, inggaw ampaḵimute gulu'd Ephesus mipanggob atta angunud atta tuttudun Jesus.

Acts 15:5

Yaḵon inninggaw da udume namati ye naḻpu'tte grupun da Pharisee ye summiḵadda woḵ ḵananda, “Ḵasapuḻane pasogyat da Gentil ya ibilin taḵu we tuttuwaonda da lintog Moses.”

Acts 25:8

Pun ḵanan Paul we nanaḵdoḻ si long-agna, “Ippun nilisalisḵu'ḵ lintog taḵu we Judyu baḵon nu dinadailḵu templo taḵu baḵon nu naḵabasuḻaḵ atte Emperor ad Rome.”

Acts 26:4

“Igammun da losane ḵailiyaḵe Judyu nantataguḵ inggan ni ḵaban-ogḵu te inninggawaḵ ḵan dida'd Jerusalem.

Acts 28:22

Yaḵon pionni ye dongngon ḵasomsomḵam te igammuni ye da tagu'tta ḵinailin di ili an-ugudda'ḵ misullagi'tte nidog-am atta angunud ḵan Jesus.”

Romans 1:9

Aḵ Apudyus anaḵdoḻe pasigḵu diḵayu iḵagasmoḵ si alluwaḻuwaḵ. Siya anserbiyaḵ atte losane ḵabooḻaḵ atte angiwaḻagawagaḵ si Ambaḻu we Damag mipanggob si Abengna.