Acts 21:20 - Sa Ugud Apudyus

²⁰ Dingngoḻda ḵad sadi, indaydayawda'ḵ Apudyus woḵ ḵananda ḵan siya, “Susunud taḵu ḵan Kristu, pionni ye sosomkome ḵalibulibu belang da Judyu we namati ḵan Jesus ya amo ipapatidae angunud si lintog Moses.

Acts 21:20 Referans Kwoze

Romans 10:2

Mataḵdoḻaḵe isisimoḵdae anserbi ḵan Apudyus yaḵon adidapun igammu ustu we inondae anserbi ḵan siya.

Galatians 1:14

Mipanggob ḵad os atte pammatini ye Judyu, intutuḻ-ayḵu'ḵ adayu'tta dogwasḵu te saḵon ḵapangogane nangunud ya nangitataḵdoḻ atta ugali ye tinawidni'tta daḵdaḵoḻni.

Acts 22:3

“Saḵon ḵad, Judyuwaḵ we niyanaḵ ad Tarsus we osae siyudad atte Cilicia yaḵon dummaḵoḻaḵ sina'd Jerusalem. Aḵ Gamaliel mistuluḵ, ummana intuttudu ḵan saḵon da losane lintog da danaḵḵoḻ taḵu. Impapatiḵ ose nanserbi ḵan Apudyus we isuyu sinsadi.

Acts 15:1

Pun inninggaw da laḻaḵi ye dummatong ad Antioch we naḻpu'tte probinsiya'd Judea we ummoy nantuttudu'tta susunud ḵan Kristu. Ḵananda, “Adiḵayupun matagu nu adi ḵayu pasogyat sigun si intuttudun Moses.”

Acts 11:18

Dingngoḻda ḵad sana, ingginoḵdae nanamḵuy ḵan siya woḵ ḵanandae nangidaydayaw ḵan Apudyus, “Innatod os Apudyus atta Gentil ta ambabawida'tta basuḻda ya agaydae angwa ta awad ḵan dida biyag aḵ inggana.”

Acts 15:5

Yaḵon inninggaw da udume namati ye naḻpu'tte grupun da Pharisee ye summiḵadda woḵ ḵananda, “Ḵasapuḻane pasogyat da Gentil ya ibilin taḵu we tuttuwaonda da lintog Moses.”

2 Thessalonians 1:10

Sa aḻgaw ḵad ose umaliyanae sa madayawana'tta taguna, mataagda losane namati'tte ḵinaapudyusna. Ḵad mibelang ḵayu bos ḵan dida te pinatiyu Ugud Apudyus we tinaḵdoḻanni ḵan diḵayu.

Acts 15:24

Dingngoḻni ye annat da udume grupuni ye ummoy sinat nantuttudu ḵan diḵayu ḵad da intuttududa nasaliduduwan da somsomoḵyu. Yaḵon ippun innatodni ḵan dida'ḵ ḵaḻabbongane angwa'tte ḵatti.

Acts 6:7

Pun amo nandinongoḻ Ugud Apudyus ya amo nadog-an belang da namati'd Jerusalem. Inggaw da adu we papadi ye inunudda ustu we pammati.

Acts 4:21

Nagangput ḵade ḵinoḻḵog da ḵuḵunsisaḻ dida, pinaoyonda dida te adidapun maḵaḵasḵasmoḵ nu ngai inondae anusa ḵan dida te adu da tagu we nandaydayaw ḵan Apudyus gapu'tte nakaskasdaawe naḵwa.

Acts 4:4

Yaḵon adu da nandodongngoḻ atte inugudda woḵ namatida. Sa belang da laḻaḵi umoye limallibu.

Acts 2:41

Pun da nangawat si ugudna, nampabonyagda. Umoye tuḻullibu belang da nidoga.

John 12:24

Ibagaḵ ḵan diḵayu ḵatuttuwaan, sa ossaane buḵoḻ nu adi maottag si luta ya matoy, umoossaan. Yaḵon nu matoy, amunga'ḵ adu.

Luke 15:32

Yaḵon ḵasapuḻane anggangganas taḵu te sa annae sunudnu isun di natoy yaḵon natagu. Nataḻaḵ yaḵon naodasan.’ ”

Luke 12:1

Sa naḵwaan da sadi, ḵalibulibu da tagu we nadagup ḵan Jesus woḵ magusgusdan da suḵin da udum. Pun ummunae tinuttuduwan Jesus da disipuluna woḵ ḵanana, “Ummanyu ta adi ḵayu maalisan atte yeast da Pharisee te ḵapappailada!

Galatians 1:24

Pun indaydayawda'ḵ Apudyus gapu ḵan saḵon.

Matthew 9:8

Innilan ḵad da losane tagu we ḵinaan Jesus saḵitna, naḵimtanda woḵ indaydayawda'ḵ Apudyus we nangitod si ḵaḻabbongane isun ni sanat atte tagu.