Acts 17:13 - Sa Ugud Apudyus

¹³ Yaḵon inigammun ḵad da Judyu'd Thessalonica we iwwaḻagawag Paul Ugud Apudyus ad Berea, ummoyda sidi woḵ subsubonda da tagu ta angguluda.

Acts 17:13 Referans Kwoze

Acts 21:27

Anna ḵade madam-an magangput pitun aḻgaw, inggaw da Judyu we naḻpu'd Asia we nangila ḵan Paul si templo. Pun sinugsuganda da amode tagu woḵ dinoḵmaanda'ḵ Paul,

Acts 17:5

Yaḵon maapos da Judyu we adipun namati woḵ dinagupda da gugulu'tte lugar we andaḵdaḵngan da adu we tagu ta angguluda inggana'ḵ nagulu da losane umili. Pun ummoyda linnoḵ boḻoy da Jason te singsingtonda da Paul ḵan Silas ta ilawada dida iyoy atte nadagupan da adu we tagu.

Acts 14:2

Yaḵon da Judyu we adipun tummuttuwa gapu si adidapun namatiyan, sinubsubda da Gentil ta paḻawengonda da somsomoḵ da susunud ḵan Kristu.

Acts 6:12

Pun pinasangada da tagu, da pallakayon da Judyu ya da mimistulun ni lintog. Pun dinoḵmaanda'ḵ Stephen woḵ inniyoyda si sinagung da ḵuḵunsisaḻ.

Matthew 23:13

Pun ḵanan Jesus, “Ḵaddagu ḵayu, diḵayu we Pharisee ḵan mimistulun ni lintog. Ḵapappaila ḵayu! Te taḵon ay nu tuttuduwanyu oḵyan da tagu si inondae midoga si ampangatan Apudyus, adiyupun ḵoon anna ḵad isunan iyyonobyu sawange maḵwae lumnoḵanda. Taḵon ay diḵayu we mismu, adiyupun iyunude paipangat ḵan Apudyus ḵad adiyupun iyunud da udume maḻyad os paipangat ḵan siya.

Luke 12:51

Sa somsomoḵyu ḵad ain ummaliyaḵ ta palin-awaoḵ maḵabuḻbuḻunan da tagu'tta udum sina'd luta? Daḵampun, annaya ibagaḵ ḵan diḵayu te sa ummaliyaḵ, ansisinaan ḵan ansusubogan da tagu.

Acts 17:1

Nangoy ḵad da Paul ḵan Silas ad Amphipolis ya ad Apollonia, dummatongda'd Thessalonica we inggaw osae sinagogan da Judyu.

Acts 17:10

Lummabi ḵad, daguse pinaoyon da susunud ḵan Kristu da Paul ḵan Silas ad Berea. Dummatongda ḵad sidi, ummoyda si sinagogan da Judyu.

Acts 20:4

Binuḻunan da Sopater we abeng Pyrrhus we iBerea ya da Aristarchus ḵan Secundus we iThessalonica. Inggaw os aḵ Timothy, Gaius we iDerbe ya da Tychicus ḵan Trophimus we iyAsia.

2 Corinthians 11:26

Ippun adi naḵwa ḵan saḵone ḵaog-ogyat atta nambabbaataḵ, isun da dinaḵoḻ da tawwang ya da tulisan atta daḻan. Inggaw os da ḵaog-ogyate ḵingwan da ḵailiyaḵe Judyu ḵan saḵon ya taḵon ay os da Gentil. Ḵaog-ogyat os naḵwa ḵan saḵon atta siyudad ya sa bumbummaaw, sa baybay ya ḵaog-ogyat da ḵingwan da ḵapappailae susunud taḵu ḵan saḵon.