1 Timothy 3:16 - Sa Ugud Apudyus

¹⁶ Ḵad iniiggammu taḵu we ampatopatog pinati taḵu mipanggob ḵan Jesu Kristu. Adipun nipaigammu si awe yaḵon impaigammun Apudyus ḵan ditaḵu sinsadi. Nambalin aḵ tagu ya pinanoḵnoḵan ni Ispiritu Santu we siya Abeng Apudyus. Innilan da anghel, niwaḻagawag mipanggob ḵan siya'tta ḵinailin di ili. Namati da tagu'tte lubung ḵan siya woḵ nipangatu'd langit ta madaydayaw.

1 Timothy 3:16 Referans Kwoze

John 1:14

Sa Ugud, nambalin aḵ tagu woḵ inninggaw ḵan ditaḵu. Amod de ḵinabaḻuna ya ḵatuttuwaan da losane imbagabagana. Innilani ḵan siya nakaskasdaawe ugalin Apudyus te siya abus aḵ Abeng we naḻpu ḵan Amana.

Hebrews 1:3

Sa Abeng angil-an taḵu si ḵadayawan Apudyus ya miyiissu ḵinaapudyusna. Ḵad siya amagatup atta losane mipagapu si ḵabooḻan ni ugudna. Ginangputna ḵad pinapoḻḵas da tagu'tta basuḻda, nipauli'd langit woḵ tutuḵdu si madawinan Apudyus we ḵangatuwan ya maḵapangat ḵan siya.

Mark 16:19

Nagangput ḵad da imbagan Apu Jesus ḵan dida, nipangatu'd langit woḵ tummuḵdu'tte madawinan Apudyus.

Romans 16:25

Madayaw oḵyan aḵ Apudyus! Te anna ḵabooḻanae amapigsa'tta pammatiyu we nibatay si Ambaḻu we Damag mipanggob ḵan Jesu Kristu we iwaḻagawagḵu. Sa annae Ambaḻu we Damag nitataḻu we adipun nipaigammu si awe.

Luke 24:4

Sissiyada ḵade sintataag, nasaniḵad da duwae laḻaḵi si daḻnigdae sumilisiling da silupda.

Colossians 1:23

Yaḵon ḵasapuḻane pagatupanyu we amapigsa'tta pammatiyu ya adiyu ipyode mayugayug namnamayu we ginanabyu si nandongoḻanyu si Ambaḻu we Damag we niwaḻagawag si intero we lubung. Ḵad sana gapunae saḵon aḵ Paul, nambalinaḵ aḵ anserbi ḵan Kristu.

1 Peter 3:22

Nipauli'ḵ Kristu ad langit woḵ awad si madawinan Apudyus we maḵapangat ḵan siya ya ipangatana da losane anghel ya da udume adipun mailae ḵingwanae awad de saadda ḵan ḵabooḻanda.

1 Peter 1:12

Ḵad impaigammun Apudyus atta profetanae da sanae imbagada, daḵampun aḵ bumaḻuwanda yaḵon sa bumaḻuwanyu. Te sadi bos imbagabagan da nangiwaḻagawag sinsadi si Ambaḻu we Damag ḵan diḵayu mipagapu si Ispiritu Santu we nibuune naḻpu'd langit. Sana da banage taḵon ay da anghel, pionda maawatane ustu.

Colossians 2:2

ta masoḻgag oḵyan da somsomoḵyu ya an-os-ossaan ḵayu gapu si an-asiayat ḵayu ta adi ḵayu anduwaduwa yaḵon maawatanyu planun Apudyus we adipun nipaigammu'tte awe ye sa mipanggob ḵan Kristu.

Colossians 1:6

Ḵad sa annae Ambaḻu we Damag we dingngoḻyu, annae miwaḻagawag si intero we lubung. Pun da nandongoḻ naila bungana'tta nantataguda. Ḵaḵna isun ni naḵwa ḵan diḵayu si dingngoḻyu ya naawatanyu mipanggob si ḵatuttuwaan ni ḵinabaḻun Apudyus.

Luke 22:43

Pun nampaila ḵan siya anghel we naḻpu'd langit woḵ pinaḵosdoḻna.

Matthew 3:16

Naabus ḵad aḵ Jesus nabonyagan, daguse tummoḵwaḻ si danum woḵ baag-en nabuḵtan ad langit. Pun innilana Ispiritu Santu we dumoḻadoḻae isunan kalapati woḵ nansap-oy ḵan siya.

1 John 3:5

Igammuyu we ummali'ḵ Kristu ta ḵaanona da basuḻ te siya ḵad naippun paat basuḻna.

Hebrews 12:2

Isisimoḵ taḵu'ḵ Jesus te siya puun ḵan magangputan ni pammati taḵu. Ḵad adinapun imbaine natoy atte kros para ḵan ditaḵu gapu si gangganase anguuway ḵan siya. Pun sinsadi, awade tutuḵdu si madawinan Apudyus we maḵapangat ḵan siya.

1 Timothy 3:9

Ḵasapuḻane ampoḻḵas somsomoḵdae angogomgom si ḵatuttuwaane pammati ye impaigammun Apudyus ḵan ditaḵu.

John 20:12

innilana da duwae anghel we nansilup aḵ itaḵe tutuḵdu si nibadongan ni ladag Jesus, sa osa si nan-uḻuwana ya sa osa si nan-uyadana.

Matthew 1:23

“Baag-en, mabugi babaḻasange ippun natnattoḵana. Umanaḵ aḵ laḻaḵi ḵad mangadanan aḵ Emmanuel.” Sa piona ugudon, “Anna ḵan ditaḵu'ḵ Apudyus.”

Revelation 7:9

Naabus ḵad sadi, innilaḵ os da amoamode tagu we adidapun mabelange naḻpu'tta losane ili ya da losane tribu ya da tagu we nansabasabali gingada ḵan naḻpuwanda. Sumisiḵadda'tte sinagung ni trono ya sa Ubbu we Karnero. Nampassilupda'ḵ itaḵe langgoyod ya nampaḵ-odonda'ḵ tubu we isun di baing ta angipail-anda si layadda.

1 Peter 1:20

Sa daan ni lubung maḵwaan, pinilin Apudyus aḵ Jesu Kristu aḵ anubut ḵan ditaḵu yaḵon nipaigammu si anungus ni aḻgaw para si bumaḻuwanyu.

Hebrews 7:7

Igammu taḵu we nangatngatu ambindisyun nu sa mabindisyunan.

Ephesians 6:19

Iluwaḻuwanaḵ ud os ta ituttudun Apudyus da ustu we ibagaḵ nu isaḻadḵu we an-ugud ya tumuḻodaḵe angipaigammu si Ambaḻu we Damag we adipun nipaigammu si awe.

Ephesians 1:9

Ḵad allaylayade nangipaigammu ḵan ditaḵu si pinionae adipun nipaigammu si awe ye asi mituttuwa ḵan Kristu.

Galatians 4:4

Yaḵon dummatong ḵad ustu we timpu we inḵoddong Apudyus, imbuunna abengna ta miyanaḵ atte bubai. Niyanaḵe Judyu we paituray atte lintog.

1 Corinthians 15:47

Sa ummunae tagu iluta te luta naḻpuwana. Yaḵon sa naudi ye tagu ad langit naḻpuwana.

1 Corinthians 2:7

Te sa nilimode ḵinalaing Apudyus we ibagabagani, siya simsimmoḵna si daan ni lubung maḵwaan ta midoga taḵu si ḵabaḻuwane antatagu ḵan Apudyus ad langit.

Romans 10:18

Yaḵon imusoḵ ud ḵan diḵayu, tuttuwa ḵad aine adimpun da Judyu dingngoḻ mipanggob ḵan Kristu? Dingngoḻda te ḵanan ni nigili ye Ugud Apudyus, “Niwaḻagawag atta ḵinailin di ili ya nandinongoḻ atta losane ili si annae lubung.”

Acts 20:28

“Pun ummanyu ayyuwanan da long-agyu ya da losane tagu we ipaayyuwan ni Ispiritu Santu ḵan diḵayu te sanat biyangyu we angipangpangu. Ayyuwananyu we ustu da magimugimunge namati ḵan Apudyus te sinubutna dida si daḻan ni mismu we abengna.

Galatians 2:8

Naawatandae aḵ Apudyus nangitod si ḵabooḻan ḵan Peter we anserbi ye an-apostol atta Judyu, siya bos nangitod ḵan saḵon si ḵabooḻane anserbi ye an-apostol atta Gentil.

Romans 9:5

Ḵad dida bos ganaḵ da ampapatoge tagun Apudyus si awe. Dida da iyIsrael we naḻpuwan Kristu. Siya angipangat atta losan ya siya Apudyus we madaydayaw aḵ inggainggana! Amen.

Acts 10:34

Pun insaḻad Peter we nan-ugud woḵ ḵanana, “Tuttuwae maawataḵe aḵ Apudyus ippun laḵlaḵsigona'ḵ tagu,

Romans 8:3

Sa lintog daḵampun aḵ lamogna ditaḵu puḵayan atte ḵabooḻan ni basuḻ te tagu taḵu we abuse aditaḵupun lamog tuttuwaon da imbilin ni lintog. Yaḵon ḵingwan Apudyus adimpun ni lintog lamog ḵoon. Imbuunna abengnae isun da tagu we ḵabasbassuḻan ta maḵoddongan aḵ madusa para'tta basuḻ taḵu. Ḵad sadi inon Apudyus we nangaan atte ḵabooḻan ni basuḻe anturay atta tagu.

Acts 14:27

Dummatongda ḵad ad Antioch, nandaḵdaḵngonda da losane namati woḵ imbagada da losane ḵingwan Apudyus ḵan dida ya sa inonae nangitod si gundaway da Gentil ta amatida.

John 16:28

Naḻpuwaḵ ḵan Amaḵ ya ummaliyaḵ si annae lubung. Sinsadi, tenaḵ annae lubung ya iyyaḵ ḵan Amaḵ.”

John 13:3

Yaḵon inigammun Jesus we impuḻang Amana ḵan siya da losan ya inigammuna bose naḻpu ḵan Apudyus ḵad mipauli bos ḵan siya.

Luke 24:51

Sissiya ḵade ambindisyun, tinenana dida woḵ nipangatu'd langit.

Revelation 17:7

Yaḵon ḵanan ni anghel ḵan saḵon, “Ngaipaḵa mataag? Ibagaḵ ḵan siḵae adipun maigammu piona ḵanan sadi ye bubai ya sa ḵaog-ogyate ayame nangabayuwanae pitu uḻuna ya simpuḻu sakkudna.

Revelation 17:5

Sa ngadanna ḵade nigili'tte ḵidayna, adipun maigammu piona ḵanan. Ḵanana, “Babylon we nandindinamage inan da puta ya maḻpuwan da losane ḵaissawe naḵwa'd luta.”

Hebrews 8:1

Annaya pionni ye ibaga: Awad de ḵangatuwane padi taḵu we tutuḵdu si madawinan ni tronon Apudyus we ḵangatuwan ad langit ya maḵapangat ḵan siya.

2 Thessalonians 2:7

Te sa nalimode ḵabooḻan ni ḵaḻawengan, nagangpute impasullagina'tta tagu'ḵ Apudyus yaḵon aditaḵupun yan igammu ḵoona si umali ye aḻgaw inggana'ḵ maḵaan anutuppod ḵan siya.

2 Thessalonians 1:10

Sa aḻgaw ḵad ose umaliyanae sa madayawana'tta taguna, mataagda losane namati'tte ḵinaapudyusna. Ḵad mibelang ḵayu bos ḵan dida te pinatiyu Ugud Apudyus we tinaḵdoḻanni ḵan diḵayu.

Acts 1:19

Inigammun ḵad da umili'd Jerusalem da naḵwa ḵan siya, nginadananda sadi ye luta'ḵ Akeldama, sa piona ḵanan, Lutae Nadimoḵ.

John 17:5

Sinsadi Ama, mipauliyaḵ ḵan siḵa ya ipailam ḵinaapudyusḵu we isun ni nangipail-am si awe atte inninggawaḵ ḵan siḵa si daan ni lubung maḵwaan.

John 15:26

Ḵanan Jesus atta disipuluna, “Ibuunḵu Ispiritu Santu we siya Bumadang ḵan diḵayu we maḻpu ḵan Apudyus we Ama. Sa Ispiritu Santu angituttudu'tte ḵatuttuwaan ya taḵdoḻana mipanggob ḵan saḵon.

John 6:62

Ngai inona nu ilanyu saḵone Abeng di Tagu we ngumatuwaḵ si naḻpuwaḵ?

Luke 2:32

Isunan silawe allangḻang ta ipailana da pinion Apudyus atta Gentil. Gapu bos ḵan siya, midayaw da tagume ganaḵ Israel.”

Mark 16:5

Nillumnoḵda ḵad atte liyange libon, nataagdae nangila si babaḻu we tutuḵdu si madawinane nansilup aḵ itaḵ.

Mark 1:13

Inninggaw atte bumbummaaw aḵ opat puḻu we aḻgaw. Ḵad sadi timpu we pinadas Satan sinulisug. Awad os sidi da tanane ayam yaḵon inninggaw da anghel we bummadang ḵan siya.

Matthew 28:2

Pune sadi, baag-en inniggana ampigsapigsae lunig te nan-osog anghel Apudyus we naḻpu'd langit. Pun niligadna batu we onob ni libon woḵ tummuḵduwana.

Matthew 13:11

Ḵanan Jesus, “Diḵayu ḵad, nipaigammu da banage adipun nipaigammu si awe mipanggob atte ampangatan Apudyus. Yaḵon ḵan dida, adinapun impaigammu.

Matthew 4:11

Pune sadi, ummoyon aḵ Satan. Baag-en dummatong da anghel woḵ binadanganda'ḵ Jesus.

1 Peter 3:18

Te aḵ Kristu, namingpingsane nampaḵaḻam ya natoy gapu'tta basuḻ taḵu. Sa naun-unan, natoy para ḵan ditaḵu we adipun naun-unan ta iyadanina ditaḵu ḵan Apudyus. Gingngatda nainlubungane long-agna yaḵon ummuli ḵad, daguse naispirituwan long-agna.

Romans 10:12

Te naippun laḵsigon Apudyus taḵon ay Judyu baḵon nu Gentil te aḵ Jesu Kristu abus aḵ Apu taḵu we amindisyun atta losane anḵodaw aḵ ḵadagu ḵan Apu.

Romans 3:4

Naid! Te tuttuwa'ḵ Apudyus, taḵon ay nu tuliyan da losane tagu. Te sa nigili ye ugudna ḵanana, “Nu taḵdoḻam mismu we long-agnu, ipailame ustu da ḵingwam ḵan pasige oḻgom da losane amabasuḻ ḵan siḵa.”

Romans 16:26

Yaḵon sinsana, annae nipaigammu ya mipagapu'tta inggilin da profetan Apudyus nipaigammu'tta losane tagu we mibatay atte bilin Apudyus aḵ inggana ta tumuttuwada gapu si amatiyanda ḵan siya.

2 Corinthians 1:19

Te aḵ Jesu Kristu we Abeng Apudyus we iwwaḻagawagni ḵan da Silas ya aḵ Timothy ḵan diḵayu, adinapun baliwan ibagana nu adi pasige ituttuwana.

1 Peter 1:21

Mipagapu ḵan siya, antaḻgod ḵayu ḵan Apudyus we nanagu ḵasin ya nangipangatu ḵan siya. Ta sa pammatiyu ḵan namnamayu awad ḵan Apudyus.

1 John 3:8

Ḵad sa pagapagatupanae bumasubasuḻ, nidoga ḵan Satan te aḵ Satan ḵad bummasuḻ inggan ni laplapu. Pun siya gapun ni ummaliyan ni Abeng Apudyus sina'd luta ta dadailona da ḵoon Satan.

Luke 20:44

Pun nu ḵanan Ari David we aḵ Kristu Apuna, ngai inonae ganaḵna bos nu?”