1 Peter 1:22 - Sa Ugud Apudyus

²² Te pummoḻḵas ḵayu we ustu si tummuttuwaanyu gapu si namatiyanyu'tte ḵatuttuwaan, gattoḵe ayatonyu da susunudyu ḵan Kristu we namati. Pun pagapagatupanyu we an-asiayat atta losane somsomoḵyu.

1 Peter 1:22 Referans Kwoze

1 Timothy 1:5

Yaḵon sa panggob ni sanae bilin, an-asiayat ḵayu we maḻpu si ampoḻḵas ya ambaḻu we somsomoḵ ya sa gattoḵe pammati.

Hebrews 13:1

Pagatupanyu we an-asiayate isun di ansusunud ḵan Kristu.

1 John 4:12

Ippun paat tagu'ḵ nangila ḵan Apudyus. Yaḵon nu an-asiayat taḵu, iinggaw aḵ Apudyus ḵan ditaḵu ḵad maila si biyag taḵu ayat Apudyus we naippun kurangna.

1 John 4:7

Ay-ayatoḵe buḻbuḻun, an-asiayat taḵu te sa ayat naḻpu ḵan Apudyus. Pun sa angayat atta bubuḻunna, siya abeng Apudyus ya igammuna'ḵ Apudyus.

1 Peter 3:8

Annaya mungimung ni ibagabagaḵ. Ḵasapuḻane an-os-ossaan ḵayu losan atte somsomoḵ ḵan maḵagiḵna ḵayu'tta buḻunyu. An-asiayat ḵayu we isun di mismu we ansusunud, an-asiḵadagu ḵayu ya ipakumbabayu da long-agyu.

James 4:8

Umadani ḵayu ḵan Apudyus woḵ umadani bos ḵan diḵayu. Diḵayu we ḵabasbassuḻan, papoḻḵasonyu da antataguyu ya diḵayu bose anduwaduwa, isisimoḵyu we angunud ḵan Apudyus.

1 John 3:23

Pun annaya imbilinna ḵan ditaḵu: Amati taḵu oḵyan ḵan Jesu Kristu we Abengna ya an-asiayat taḵu te siya imbilin Kristu ḵan ditaḵu.

2 Thessalonians 1:3

Susunudḵu ḵan Kristu, ḵasapuḻane patilayun ḵani anggappiya ḵan Apudyus gapu ḵan diḵayu, ḵad mibagay nu ḵoonni ḵaḵna te pumigsapigsa da pammatiyu ḵad amo madog-adog-an ayat ni sin-ossaossa ḵan diḵayu we an-asiayat.

1 Thessalonians 3:12

Dog-an oḵyan Apu ayatyu ta lumay-as atta buḻunyu ya losane tagu we isun ni ayatni ye lummay-as ḵan diḵayu.

1 John 4:20

Nu awad osa'ḵ ḵananae ayatona'ḵ Apudyus yaḵon sasangngaana asintataguna, tuliyan sanate tagu. Te nu adinapun os ayaton da asintatagunae mamaḵ-ila, adipun maḵwae ayatona'ḵ Apudyus we adinapun innila.

1 Peter 2:17

Patganyu oḵyan da losane tagu, ay-ayatonyu da susunudyu ḵan Kristu ya isipogyu'ḵ Apudyus ya patganyu bos ari.

Acts 15:9

Ippun laḵsigon Apudyus ḵan ditaḵu ya dida te pinapoḻḵasna somsomoḵda mipagapu'tte pammatida.

1 John 3:11

Sa tuttudu we dingngoḻyu si inggan ni namatiyanyu, ḵasapuḻane an-asiayat taḵu.

2 Peter 1:7

Losan atta sanat, sa naapudyusane antatagu dog-anyu ayat atta susunudyu we namati ya sa ayat os atta ngaimane tagu.

Philippians 1:9

Annaya da iluwaḻuḵ ḵan Apudyus. Ḵodawoḵe pumigsapigsa oḵyan ayatyu ḵan siya ya da buḻunyu, ḵad madog-an oḵyan igammuyu si mipanggob ḵan Apudyus ya sa ḵabooḻanyu we angigammu nu ngai da ustu we ḵoonyu,

Ephesians 4:3

Ipapatiyu an-ossaanon ansosomsomoḵyu we maḻpu'tte Ispiritu Santu mipagapu si pagapagatupanyu allin-awae maḵabuḻbuḻunanyu.

Galatians 5:5

Yaḵon ditaḵu ḵad, namnamaon taḵu we aḵ Apudyus angwa si maun-unan taḵu ya sa Ispiritu Santu bumadang ḵan ditaḵu we anguuway si mituttuwaana gapu'tte pammati taḵu.

Revelation 2:4

“ ‘Yaḵon awad de adiḵpun pion ḵan diḵayu, adiyupun ogon saḵon ay-ayaton ya da buḻunyu we isun ni damu.

1 Peter 4:17

Te dumatong timpu we anguwisan Apudyus atta losane tagu ḵad isaḻadna ḵan ditaḵu we tagun Apudyus. Ḵad nu isaḻadna ḵan ditaḵu we anḵuwis, ngai maḵwa'tta adipun tumuttuwa gapu si adidapun amatiyan si Ambaḻu we Damag we naḻpu ḵan Apudyus?

1 Peter 4:8

Sa ḵapatogane ḵoonyu, papigsaonyu an-asiayatanyu te nu an-asiayat ḵayu, adiyupun sosomḵon da amode basuḻ da buḻunyu yaḵon an-asianus ḵayu ya an-asipakawan ḵayu.

Hebrews 11:8

Gapu si pammatin Abraham, tinuttuwana'ḵ Apudyus si nangayagana ḵan siyae umoy si ili ye inkarin Apudyus ḵan siyae tawidona. Tinenana mismu we ilina taḵon ay nu adinapun igammu nu dinu ayana.

Hebrews 9:14

Sindumallu we pummoḻḵas taḵu si daḻan Kristu si nangidatunana si long-agna mipagapu'tte annanayune Ispiritu Santu. Ippun basuḻna ya mipagapu'tte natoyana pummoḻḵas somsomoḵ taḵu'tta ippun anunae ḵoon taḵu ta anserbi taḵu si matattagu we Apudyus.

Hebrews 6:10

Naun-unan aḵ Apudyus, adinapun maliwatan da ambaḻu we ḵingwayu ya sa ayatyu ḵan siyae impailayu si bummadanganyu'tta buḻunyu we tagun Apudyus ya sissiyae badanganyu dida.

2 Corinthians 6:6

Ipailani anserbiyanni ḵan Apudyus gapu'tte ampoḻḵase antataguni'tte nangigammuwanni si ḵatuttuwaan, gapu'tte ḵinaanusni'tta nampaḵaḻamanni. Mipaila bos ḵabooḻanni ye itton ni Ispiritu Santu ya sa gattoḵe ayatni'tta asintataguni.

John 15:17

Pun sa bilinḵu ḵan diḵayu, an-asiayat ḵayu.”

1 Peter 3:1

Diḵayu we bubbubai ye naasaw-an, ḵasapuḻane paituray ḵayu'tta asawayu ta awad ḵad ḵan dida da adipun tumuttuwa gapu si adidapun amatiyan atte Ugud Apudyus, maawisdae amati gapu si ambaḻu we ugaliyu taḵon ay nu adi ḵayu an-ugud

Hebrews 5:9

Ḵingwana ḵad da losane ḵasapuḻane ḵoona, nambaline siya anagu'tta losane tagu we anuttuwa ḵan siya'tte angittana ḵan dida si biyag aḵ inggana.

2 Timothy 1:14

Mipagapu'tte ḵabooḻan ni Ispiritu Santu we iinggaw ḵan ditaḵu, ayyuwaname ustu ampatoge tuttudu we intaḻgod Apudyus ḵan siḵa.

1 Timothy 5:2

Da anḵamad-an ḵad, ibelangnu bos didae isun di iniinnam ya da babaḻasang, ibelangnu dida'ḵ isun di sinusunnudnu we ampoḻḵas somsomoḵnu.

1 Timothy 4:12

Adim iyunude potogonda siḵa gapu'tte ḵinaabengnu. Yaḵon iggam ḵabooḻame ambalin aḵ unudon da namati'tte an-uugudnu, sa ambaḻu we antatagum, sa an-aayatnu, sa angogomgomam atte pammatim ya sa ḵinapoḻḵasnu.

1 Timothy 1:3

Timothy, adim maliwatan imbagaḵ ḵan siḵa si ayonaḵ ad Macedonia. Ḵodawoḵ ḵan siḵae inggawḵa'd Ephesus ta bilinom da udume tagu sinat ta agaydae angituttudu si tinutuli ye tuttudu.

2 Thessalonians 2:13

Yaḵon ḵan diḵayu susunudḵu ḵan Kristu we ay-ayaton Apu, ḵasapuḻane pagapagatupanni ye anggappiya ḵan Apudyus gapu ḵan diḵayu. Te inggana'tte damu, pinilin Apudyus diḵayu'ḵ matagu mipagapu'tte Ispiritu Santu we nangitotoḵḵon ḵan diḵayu'ḵ tagun Apudyus ta bumaḻu ugaliyu ya mipagapu'tte pinatiyu ḵatuttuwaan mipanggob ḵan Jesu Kristu.

Galatians 3:1

Nadongdong-ogan ḵayu we iGalatia! Ngai ḵad ain da nangallelaw ḵan diḵayu? Nalawag ḵad ose nipaila ḵan diḵayu we nipattoḻ aḵ Jesu Kristu atte kros!

Galatians 5:7

Ambaḻubaḻu sinaḻdanyu ḵingwa! Ngai ḵad ain namaginoḵ ḵan diḵayu we anuttuwa si ḵatuttuwaan? Ngai inonae nangawis ḵan diḵayu?

Romans 8:13

Te nu tuttuwaon taḵu da pipion da long-ag taḵu, matoy taḵu ḵad misina taḵu ḵan Apudyus aḵ inggana. Yaḵon nu an-awidan taḵu da pipion da long-ag taḵu mipagapu'tte ḵabooḻan ni Ispiritu Santu, matagu taḵu'ḵ inggana.

Romans 2:8

Yaḵon da tagu we siya sosomḵonda da pionda ya adidapun tuttuwaon gapu si adidapun amatiyan si ḵatuttuwaan ḵad siya ḵoonda lawweng, aaddi ye dida angipail-an Apudyus si ummamdane sangana'tte timpu we anusaana ḵan dida.

Romans 1:5

Mipagapu ḵan Jesu Kristu, impailan Apudyus ḵinabaḻuna ḵan saḵon woḵ nambalinaḵ aḵ apostol ta awisoḵ da tagu'tta losane ili ta tumuttuwada gapu si amatiyanda ḵan Jesus.

John 17:17

Itotoḵḵonnu ḵappos dida mipagapu'tte ugudnu we tuttuwa ta anserbida ḵan siḵa.

John 15:3

Pummoḻḵas ḵayu te tinuttuwayu ugude imbagaḵ ḵan diḵayu.

Acts 6:7

Pun amo nandinongoḻ Ugud Apudyus ya amo nadog-an belang da namati'd Jerusalem. Inggaw da adu we papadi ye inunudda ustu we pammati.

John 17:19

Gapu ḵan dida, itotoḵḵonḵu long-agḵu ḵan siḵa ta mitotoḵḵonda bose anserbi ḵan siḵa mipagapu'tte ḵatuttuwaan.

James 1:21

Pun an-awidanyu da losane ḵababbaine ugaliyu ya da amode ḵoḵoḵḵonyu. Ḵad ampakumbaba ḵayu ya awatonyu Ugude immuḻana'tta somsomoḵyu we maḵwae anagu ḵan diḵayu.

1 Peter 1:2

Pinilin Apudyus we Ama diḵayu mibatay si gagangaye inigammuna woḵ intotoḵḵon diḵayu'ḵ taguna ta bumaḻu ugaliyu mipagapu'tte Ispiritu Santu ta tumuttuwa ḵayu gapu si amatiyanyu ḵan Jesu Kristu ya pumoḻḵas ḵayu mipagapu'tte daḻana si natoyana. Awad oḵyan ḵan diḵayu amode ḵinabaḻu ḵan lin-awae maḻpu ḵan Apudyus.

1 Peter 3:20

Da sanae ḵalidodwae nibabaḻud, ḵalidodwan da tagu we adipun tummuttuwa gapu si adidapun namatiyan ḵan Apudyus si timpun Noah si awe. Sa nangwaan Noah si bapur, inan-anusan Apudyus we nanguuway si amatiyan da tagu ḵan siya yaḵon adidapun tummuttuwa gapu si adidapun namatiyan, abuse waḻu we tagu da tinagun Apudyus si timpu we nalitapan ni lubung.