1 John 4:6 - Sa Ugud Apudyus

⁶ Yaḵon ditaḵu da abeng Apudyus. Pun da buḻun taḵu we angigammu ḵan Apudyus, piondae andongoḻ atta ituttudu taḵu. Yaḵon da daḵampun aḵ abeng Apudyus, adidapun pione andongoḻ. Sanat angimatunan taḵu'tta mituttudu nu naḻpu si Ispiritu Santu we puun ni ḵatuttuwaan baḵon nu aḵ Satan we puun ni tuli.

1 John 4:6 Referans Kwoze

John 14:17

Siya Ispiritu Santu we angituttudu ḵan diḵayu si ḵatuttuwaan mipanggob ḵan Apudyus. Da tagu we adipun amati ḵan saḵon, adidapun awaton te adidapun igammu ya immatunan. Yaḵon ḵan diḵayu, igammuyu te awad ḵan diḵayu ya iinggaw ḵan diḵayu.

John 10:27

Te da karneroḵ dongngonda gingaḵ. Ḵad igammuḵ dida ya tun-udonda saḵon.

John 15:26

Ḵanan Jesus atta disipuluna, “Ibuunḵu Ispiritu Santu we siya Bumadang ḵan diḵayu we maḻpu ḵan Apudyus we Ama. Sa Ispiritu Santu angituttudu'tte ḵatuttuwaan ya taḵdoḻana mipanggob ḵan saḵon.

1 John 4:1

Ay-ayatoḵe buḻbuḻun, adi ḵayu amati'tta losane angibagae sa Ispiritu Santu naḻpuwan da ituttududa. Yaḵon ummanyu panoḵnoḵan nu tuttuwae naḻpu ḵan Apudyus te adu da sinan profeta we lummoswae ummoy nantuttudu'tta ḵinailin di ili'tte lubung.

1 John 4:4

Aabengḵu, diḵayu da abeng Apudyus ya illogyu da sinan profeta te adidapun lamog inallelaw diḵayu. Te sa Ispiritu Santu we awad ḵan diḵayu, amo maḵabooḻ nu aḵ Satan we angipangat atta tagu we adipun namati.

John 18:37

Ḵanan os Pilate, “Pun siḵa Ari?” Summongbat aḵ Jesus woḵ ḵanana, “Tuttuwa sadi ye ḵanam. Te niyanaḵaḵ ya ummaliyaḵ si annae lubung ta taḵdoḻaḵ ḵatuttuwaan. Ḵad da ngaimane angipatog atte ḵatuttuwaan, tuttuwaonda da ibagaḵ.”

1 Corinthians 14:37

Pun nu awad osa ḵan diḵayu'ḵ ḵananae naittan aḵ ḵabooḻane angipaigammu si pinion Apudyus baḵon nu awad ḵabooḻana'ḵ innatod ni Ispiritu Santu, ḵasapuḻane bigbigona annae insuḻatḵu ḵan diḵayu we imbilin Apu.

2 Thessalonians 1:8

Ḵad dusaona'tte apuy ta bumaḻos atta adipun angigammu ḵan Apudyus ya da adipun tumuttuwa gapu si adidapun amatiyan atte Ambaḻu we Damag mipanggob ḵan Jesus we Apu taḵu.

John 16:13

Nu umali Ispiritu Santu we angituttudu si ḵatuttuwaan mipanggob ḵan Apudyus, idaḻanna diḵayu ta maawatanyu da losane ḵatuttuwaan te adipun an-ugud atte ḵuwanae ḵaḻabbongan yaḵon ngaimane dongngona siya ugudona. Ḵad ipaigammuna ḵan diḵayu da maḵwa si umali ye aḻgaw.

1 John 4:8

Yaḵon sa ippun ayatna'tta buḻunna, adinapun os igammu'ḵ Apudyus te aḵ Apudyus pasig naayat.

1 Timothy 4:1

Nalawag imbagan ni Ispiritu Santu we sa umali ye aḻgaw, an-awidan da udume tagu ustu we pammatida. Ḵad siya patiyonda umallelawe ispiritu ya sa tuttudun da aḻan.

John 13:20

Ibagaḵ ḵan diḵayu ḵatuttuwaan, ngaimane angawat atta ibuunḵu, saḵon awatona. Ḵad sa angawat ḵan saḵon, awatona bos nangibuun ḵan saḵon.”

John 8:19

Pun ḵanandae nan-imus, “Dinu ḵad ain aḵ Amam?” Ḵanan Jesus, “Naippun igammuyu ḵan saḵon baḵon nu aḵ Amaḵ. Nu igammuyu oḵyan saḵon, igammuyu bos aḵ Amaḵ.”

Luke 10:22

Pun ḵanan Jesus atta tagu, “Innatod Amaḵ we Apudyus ḵan saḵon da losane ḵabooḻan ḵan ḵinalaing. Iniiggammuna saḵone Abengna ya naippun udum aḵ nangigammu ḵan saḵon. Ḵaḵna bos aḵ Amaḵ. Naippun angigammu ḵan siya, abusaḵ ya da ngaimane tagu we pioḵe angipaigammuwan.”

Jude 1:17

Yaḵon ḵan diḵayu we ay-ayatoḵe buḻbuḻun, ḵasapuḻane adiyu maliwatan da imbagan da apostol Jesu Kristu we Apu taḵu.

2 Peter 3:2

Pioḵe iḵagasmoḵyu da impadtun da profeta we nanserbi si awe ya da bilin Apu taḵu ya sa Anagu we impaigammuna ḵan diḵayu mipagapu'tta apostol we nantuttudu ḵan diḵayu.

2 Corinthians 10:7

Itollongyu ḵad da mailan da atayu, ippun ḵamman mailayu'tta naḵwa ḵan diḵayu? Nu ḵanandae dida da ustu we tagun Kristu, siya oḵyan sosomḵonda ḵan maawatanda tagun os Kristu diḵani ye isuni dida.

Romans 11:8

Ḵaḵnat ḵanan ni Ugud Apudyus, “Innatod Apudyus ḵan dida naliwonge somsomoḵ ḵad da atada adidapun maḵaila ya da ingada adidapun maḵadongoḻ inggana sinsadi.”

Romans 1:1

Saḵon aḵ Paul we osa'tta sammilun Jesu Kristu. Pinilin Apudyus saḵon aḵ osa'tta apostolna ya dinutuḵana bos saḵon aḵ umoy angiwaḻagawag si Ambaḻu we Damag we naḻpu ḵan Apudyus.

John 20:21

Pun ḵanan os Jesus ḵasin ḵan dida, “Lin-awa awad ḵan diḵayu. Ibuunḵu diḵayu we isun ni nangibuunan Amaḵ ḵan saḵon.”

John 10:16

Awad da udume karneroḵe naippun atte annae puḵuḵan. Ḵasapuḻane ayagaḵ dida ta dongngonda gingaḵ. Ḵade sadi ambalinda'ḵ ossaane grupu ya ossaan antangḵon.

John 8:23

Ḵanan os Jesus, “Diḵayu we adipun namati, sa somsomoḵyu nainlubungan. Yaḵon ḵan saḵone naḻpu'd langit, sa somsomoḵḵu nainlangitan.

John 10:3

Buḵatan ni guwaḻda onob ni lewangan nu angoy antangḵon atta karnero. Dongngon da karnero gingana nu poḵawana da ngadanda ḵad ipuyutna dida'ḵ lasin.

1 John 5:19

Sa ḵumagwa, igammu taḵu we abeng Apudyus ditaḵu taḵon ay nu impangatan Satan da losane tagu we adipun amati.