Yudas 1:3 - Abun Scripture

³ Ji bi nji ji bi nyanggon gato ji jimnotku, sangge ji da iwa krom surat wa nin subot os ndo gato Yefun Yesus kak wa men kem ndo to kapyo mato kapyo ne. Ji da iwa krom subot sukdu ne gato men sino jammo mó re, sarewo suk yo ben sato tik ji mit wa ji krom sukduno wa nin subere nin bes sukdu subot Yesus Kristus ne kok o et. Nin jammo suk gato ji krom ré et. Yefun Allah bi sukduno subot Yesus Kristus ne, An grem kem wam dik su men yé gato onyar kem mo Yesus Kristus. Sukdu ne kwa yo gwet mo nde. Sane nin werwa nin bes sukdu ne kok wai kadit sukdu yi neya et. Sane dom nin duwer yé gato ma wa duwer nin mo sukdu ne et. Ji syogat nin ben sane,

Yudas 1:3 Referans Kwoze

1 Timotius 6:12

Nan wergat nan dakai su nan mit dik nan onyar dik, subere nan ben nan bi suk-i tepsu ye gato onyar kem mo Kristus, subere nan kem ndo to kapyo mato kapyo, we kam gato nan ki rer mo yé mwa gwem do, nan onyar kem mo Kristus it, Yefun Allah anato nai nan wa nan si An kem ndo to kapyo mato kapyo mone.

Filipi 1:27

Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

Yudas 1:20

Sarewo sukdu subot Yesus Kristus anato ma kadit Yefun Allah dakai. Sukdu ne yo ma kadit yetu bi sukjimnut-i nde. Sane ji bi nji ji bi nyanggon, nin ós yu, nin duno yu su sukduno gato ndo wai subot Yesus Kristus ne petok sor, subere nin onyar kem mo Yesus Kristus nggi wai o et. Nin ki suk su Yefun su suktinggi gato Yefun Allah Gen syo nai nin ne et.

Wahyu 12:11

Domba Gan dé sye wa men yetu anato men bi nji mo Yefun bi rus-i ne nggi wai kadit biris bi yekwesu o re. Án ki subot Yefun Allah bi sukdu-i anato án nggi wai kadit biris bi yekwesu o re. Án yo nutbot án dakai nde, án bi án nggwa mo Yefun wa ben Yefun bi suk-i. Kapre án kwop o, án mbau o, án kibot suk gato Yefun ben ne sor.

Titus 1:4

Titus, sangge, nan anato ji bi pa, we nan si ji men ka we sino onyar kem mo Kristus re. Men bi Ai, Yefun Allah si Yesus Kristus men bi Yekwesu gato kak os ndo wa men kem ndo to kapyo mato kapyo, Yefun Allah si Yesus Kristus ete uttok nan petok sor.

Wahyu 2:10

Bere nin ku sukye, wo nin nyuwa nde. Ji ki sare do, bere biris bi yekwesu ben yetu ge bok yo but nin ge bok yo, ete sok nin mo sel. Sane bere biris bi yekwesu gato ben sukibit ne werwa gwat os wa nin subere nin misyar Yefun mone. Mo sel mit ne bere nin ku sukye sor kom mo kam musyu dik rek. Kapre karowa nin kwop rok mone, nin onyar kem mo Ji, nin ben Ji bi suk-i sane sor kom mo pe gato or mó yo, bere Ji bi os wa nin kem ndo to kapyo mato kapyo, tepsu ye gato nggi wai ku hadiah mo koirut.

2 Timotius 1:13

Sane nan simo sukdu gato sangge, gato ji duno nan su ne sor, nan simo sisu nan mit dik si nan onyar dik et. Nan simo sukdu ne yo, nan onyar kem mo Yefun Yesus, nan bi sukjimnut sye kas subot ye yi petok sor, tepsu Yesus Kristus ben ne.

1 Timotius 1:18

Timotius, ji bi pa mo Yefun bi de-i, ji ki sare do, nan benbot suk gato ji krom ré et, sare, nan jambot sukdu gato Yefun Allah tarubot yenabi mo nu ari wa nan sor. Nan jom suktaru ne subere nan nggiwa nan duwer yé gato ki bi sukduno gato siri.

Galatia 2:5

Sarewo men yo iwa jammo án bi sukdu-i wokgan yo dom nde. Men wergat men nggwa subere men yo fros sukdu rok si sukdu gato sangge subot os ndo gato Yesus Kristus kak ne nde, subere sukdu gato men duno nin su ne sangge sor, kwa wokgan gato siri yo mo nde.

Ibrani 13:22

Ji bi surat ré, ji yo krom syu teker nde, sane ji kiwa nin nutbot ji bi sukduno mwa ré sisu ndo et.

Suk Gato Yerasul Ben Ne 9:22

Kamdik-kamdik, Saulus faiya nggi o, nggi o, nggi o mone sor, ye Yahudi mone jam rer do, sangge, Yefun Allah syogat Yesus Kristus ma mo bur ré wa nai men yetu kadit sukye ete jowa men. Ye Yahudi mo kota ne yo ku os wa duwer Saulus mo sukdu ne nde.

1 Tesalonika 2:2

Men yo ba ku nin mo Tesalonika nde tó, yé ben sukye nai men, yé kabor men ket kwayo-kwayo mo kota Filipi wé re, nin dakai jam re. Sarewo kapre yé mwa duwer men kete sane, men bi Ai, Yefun Allah syo suktinggi nai men anato men nggiwa men ki sukdu subot os ndo gato Yesus Kristus kak wa men yetu, gato Yefun Allah fro ne, men ki nai nin jam re.

1 Korintus 15:3

Sukdu gato ji ki nai nin ne anato sukdu gato ye yi duno ji su mó re, orete ji waii duno nin su o. Sukdu kwa gato sye ne, ye krom mo Yefun Allah bi sukdu sare do, Kristus kwop wa tot suktot mo sukibit gato men ben ne wé re.

Suk Gato Yerasul Ben Ne 4:12

Yefun Yesus ka dik sor anato kak os ndo wa nai men wé kadit bot gesyos, subere men kem ndo to kapyo mato kapyo. Yetu yi yo mo nde, kadit yetu mwa ne sino, Yefun Yesus An ka dik sor anato nggiwa kak os ndo wa men kem gesyos.”

Suk Gato Yerasul Ben Ne 18:28

Apolos ós nje mone, we Apolos ki bi sukdu-i ne nggi. An duwer ye Yahudi mo bi sukdu-i ne nggi mo yé mwa gwem. An nai sukdu mo Yefun Allah bi sukdu, ete an ki subot sukdu ne subere yé jam rer kom mo mit do, Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men.

Suk Gato Yerasul Ben Ne 17:3

Paulus nai Yefun Allah bi sukdu kwa wokgan, orge an ki rer subot sukdu ne, an ki do, ”Yefun Allah bi sukdu ré kadum nai men do, Ye gato Yefun Allah syogat ma mo bur ré wa nai men yetu kadit sukye ete jowa men ne, An ku sukye ndo nde nyim, orete Yefun Allah sun An kadit sukkwop. Sane ji bi sukdu-i wa nin anare: Ye gato Yefun Allah syogat ma ne gum do Yesus. Ye gato gum do Yesus anato Yekwesu gato Yefun Allah tom mo An bi sukdu ne do, bere An syogat Yekwesu dik yo ma mo bur ré wa nai men yetu kadit sukye ete jowa men. Yekwesu ne anato Kristus.”

Yudas 1:17

Sarewo ji bi nji ji bi nyanggon gato ji jimnotku, men bi Yekwesu Yesus Kristus bi yerasul bi sukdu-i gato yerasul bok ne ki suga nyim ne yo, nin jammo, nin napawa pe et.

2 Petrus 1:1

Ji gato gum do Simon Petrus anato krom surat ré wa nin. Ji anato tepsu Yesus Kristus bi pakwerut. Yesus Kristus bes ji gum yerasul. Ji krom sukdu ré wa nin yé gato si men sino onyar kem mo Yesus Kristus. Yesus Kristus gato kak os wa men kem ndo kadit bot gesyos ne, Yesus Kristus gato tepsu Yefun Allah gato jom men ne, An ben An bi suk-i ri-roi su men sino anato nin onyar kem mo An tepsu men re.

1 Petrus 5:12

Silas anato ós ji krom surat wokgan ré wa nin. Ji nut do, an sa, ye Kristen gato ben an bi suk-i ri-roi tepsu Kristus mit. Ji iwa ji frot sukdu bok ré subere nin jam do, sangge, kapre nin yo ben suk yo nyim wa Yefun Allah nde, An dakai bi sukjimnut sye kas subot nin sor. Ji krom sukdu subot sukndo gato Yefun Allah ben dakai yi su nin subere nin bi sukjimnut kem pe mo An. Sane nin bi sukjimnut ut krat mo sukdu ne {tepsu jam biro kom krat mo kweguk et.}

Filipi 1:1

Ji gato gum do Paulus, ji si Timotius, men ka we gato Yesus Kristus bi pakwerut anato krom surat ré wa nin. Men ka we krom sukdu ré wa nin yé gato onyar kem mo Yesus Kristus gato sum mo nu ari mo kota Filipi. Men ka we krom surat ré wa nin yé gato gum yekwesú mo nu ari si yé gato ós yekwesú mo nu ari ne sino.

Efesus 1:1

Ji gato gum do Paulus, gato Yefun Allah bes gum yerasul wa ben Yesus Kristus bi suk-i, ji anato krom surat ré wa nin. Ji krom sukdu ré wa nin yé gato Yefun Allah nai sok mo An bi rus-i mo kota Efesus. Ji krom surat ré wa nin yé gato onyar kem mo Yefun Yesus mone.

Galatia 6:11

Nin me ré, huruf gato ji krom sye ré. Sukdu gato wari ré, ji dakai anato krom.

Suk Gato Yerasul Ben Ne 28:28

Orete Paulus ki do, ”Ji iwa nin jam do, os ndo gato Yefun Allah fro wa nai men yetu wé kadit sukye subere men kem ndo to kapyo mato kapyo, ye Yahudi misyar or re. Sane su ré yé gwat sukdu ne mu ki frekbot yewis yi neya jam re. Yewis yi bere iwa jammo sukdu ne.” [

Suk Gato Yerasul Ben Ne 20:27

we, ji anato kibot Yefun Allah bi sukdu-i ne or sino nai nin jam re, ji yo misyar wa nde, ji yo gurik sukdu ne wokgan yo dom nde.

Galatia 3:28

Sane ye Yahudi e, ye Yunani e, pakwerut e, ye gato dakai ti mo an dakai e, yebris e, nggon e ne, men sino yo tara kadit yu nde, wo men sino si Yesus Kristus tepsu yedik, men sino si Yesus Kristus sok mo rus dik it.

Suk Gato Yerasul Ben Ne 6:7

Sane yerasul kibot Yefun Allah bi sukdu subot Yesus Kristus frek mu kom mo peyo-peyo. Yé sok tó ye gato onyar kem mo Yefun Yesus mo Yerusalem mwa gat o. Yesu mwa gato ben suk mo ye Yahudi bi nu ari sok tó ye gato onyar kem mo Yefun Yesus dom.

Suk Gato Yerasul Ben Ne 9:13

Ananias ki do, ”Sarewo Yefun, ji jam ye nuk sukdu subot ye ne. An ben sukye nai ye gato onyar kem mo Nan mo kota Yerusalem.

Ibrani 6:9

Sarewo ji bi nji ji bi nyanggon gato ji jimnotku, men da ki sukdu subot ye gato bariket Yefun, sarewo men bi sukjimnut kem mo nin sare do, nin sa, nin ben nin bi suk-i ne ndo wai kadit ye gane o re. Men nut do, sangge, nin ben nin bi suk-i ndo tepsu ye gato Yefun nai sok mo An bi rus-i wé kadit bot gesyos ne re.

2 Petrus 2:21

Sa ndo sa, án jam nde Yefun Allah bi os-i gato ri-roi ne anato ndo wai kadit án jam Yefun bi os-i, orete ri ma án brek án dari ket Yefun Allah bi sukdu-i gato yé duno án su ne. Ye gato jam Yefun bi os-i, orete an brek an dari ket Yefun it yo, bere an ku sukye wai o re.

Yudas 1:1

Ji gato gum do Yudas, gato Yesus Kristus bi pakwerut, gato bi nji mo Yakobus, ji anato krom surat ré wa nin yé gato men bi Ai, Yefun Allah nai sok mo An bi rus-i. Yefun Allah bi sukjimnut sye kas subot nin. Yesus Kristus mewa nin.