Yudas 1:1 - Abun Scripture

¹ Ji gato gum do Yudas, gato Yesus Kristus bi pakwerut, gato bi nji mo Yakobus, ji anato krom surat ré wa nin yé gato men bi Ai, Yefun Allah nai sok mo An bi rus-i. Yefun Allah bi sukjimnut sye kas subot nin. Yesus Kristus mewa nin.

Yudas 1:1 Referans Kwoze

1 Petrus 1:5

Yefun Allah grem suk mwa ne kem mo gu wa men. Bere men ku mone tó, wo men kem mo bur ré tó, men onyar kem pe mo Yefun Allah, sane An mewa men su An bi suktinggi ne sane sor, An nai men wé kadit bur ré, ete An gwat men mu sok mo An bi nat-i su kam gato bur ré kru re.

1 Tesalonika 5:23

Yefun Allah gato ós men kem ndo su yu, Yefun dakai ete kak nin bi sukjimnut subere nin ben An bi suk-i sisu nin mit dik nin onyar dik petok sor. Yefun Allah ete mewa nin da kridek si nin da gesyos sino sane sor subere nin ben nin bi suk-i ibit yo mo nde, kwa dik yo dom nde, subere men bi Yekwesu Yesus Kristus satu ma mo bur ré it yo, ye yo ku os wa ki nin gum ibit mo suk yo mo nde.

2 Timotius 1:9

Yefun Allah fro os ndo wa nai men wé kadit bot gesyos, subere men kem ndo to kapyo mato kapyo. Yefun Allah kiwa men brek ma kadit os ibit gato men muket ne, ete men tepsu An bi rus-i ben An bi suk-i gato ndo petok sor. An yo me mo sukndo gato men ben ne nde, wo An dakai fro An bi os-i, An dakai bi sukjimnut sye kas subot men yi sor, men yo ben suk yo nyim wa An nde. Sane anato An yo ut bur ré nde tó, An fro os ndo ne su Yesus Kristus nyim wé re, subere ri ma Kristus ma wa kak os ne wa men re.

Yohanes 14:22

Yudas, gato Yudas Iskariot nde, wo Yudas doyi, an ndo mo Yefun Yesus do, ”Yenggras, men bi Yekwesu, ben sa u anato Nan kadum Nan nggwa nai men sor re, wo Nan yo kadum Nan nggwa nai yetu sino mo bur ré nde ne?”

1 Petrus 2:9

Wo nin sa, Yefun Allah nai nin tepsu An dakai bi rus-i it. Nin anato tepsu yewis gato Yefun Allah bes tepsu yesu mo Yefun Allah bi nu wa nin ben suk wa Yefun gato gum kok wai o re. Nin anato yewis gato Yefun Allah fro tepsu An bi rus-i wa nin ben An bi suk-i sor. Yefun Allah kiwa nin mu kadit pe gato ndendu ma mo An bi pe gato rer ndo yé. Sane nin ki subot suk gato An ben ndo wai ne nai ye yi jam.

Roma 1:1

Ji gato gum do Paulus anato krom surat ré wa nin yé gato onyar kem mo Yefun Yesus gato kem mo kota Roma. Yefun Allah bi sukjimnut sye kas subot nin. Yefun nai nin gum sok mo An bi rus-i it. Yefun Allah bes ji gum yerasul subere ji mu ki sukdu subot os ndo gato Yefun Allah fro wa men yetu subere men ku os wa men gum sok mo An bi rus-i.

Yohanes 17:15

Ji yo ndek mo Nan subere Nan nai án wé kadit bur ré nde. Sarewo Ji ndek mo Nan subere Nan mewa án kadit biris bi yekwesu gato jom nje mo bur ré.

2 Petrus 1:1

Ji gato gum do Simon Petrus anato krom surat ré wa nin. Ji anato tepsu Yesus Kristus bi pakwerut. Yesus Kristus bes ji gum yerasul. Ji krom sukdu ré wa nin yé gato si men sino onyar kem mo Yesus Kristus. Yesus Kristus gato kak os wa men kem ndo kadit bot gesyos ne, Yesus Kristus gato tepsu Yefun Allah gato jom men ne, An ben An bi suk-i ri-roi su men sino anato nin onyar kem mo An tepsu men re.

1 Petrus 5:10

Nin ku sukye mone bergan sor re, orete yo, Yefun Allah dakai nai nin wé kadit sukye subere nin kem ndo kadit sukye gato nin ku ne o re. Yefun Allah ben An bi suk-i ndo su men dakai yi sor, sane bere Yefun ben nin onyar kem mo An nggi wai o. Bere Yefun ben nin bi sukjimnut kem mo An nggi wai o. Bere Yefun ben nin bi sukjimnut yo kas ram kadit An o nde, wo kem pe mo An sor. Nin tepsu Kristus bi yetuge-i ne anato Yefun Allah fro nin subere nin ku suk gato ndo wai mo Yefun bi nat-i to kapyo mato kapyo.

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

Roma 8:30

Sane Yefun Allah kendo ye gato An dakai fro suga nyim tuya ne. Ye gato Yefun Allah kendo sok mo An bi rus-i ré, Yefun Allah ki mo yé ne do, yé ne sa, tep wa Yefun nai yé ne gum sok mo An bi rus-i ne. Ye gato Yefun Allah nai gum sok mo bi rus-i yo, Yefun bes yé ne gum kok sye wai tepsu Yefun o re.

Roma 6:22

Sarewo su ré, Yefun Allah sombok nin wé kadit sukjimnut ibit gato jom nin ne it. Nin tepsu Yefun Allah bi pakwerut it. Mone nin ku suk gato ndo anato Yefun Allah nai nin wa nin ben Yefun Allah dakai bi suk-i sor, ete kom mo rut sa, bere nin kem ndo to kapyo mato kapyo.

1 Petrus 1:2

Yefun Allah ete mewa nin tep yi sor nde, wo wai o re. Sane dom, Yefun Allah ete uttok nin mo suk mwa ne sino petok sor. Men bi Ai, Yefun Allah nai nin gum sok mo An bi rus-i sagato An fro suga nyim tuya wé re. Yefun Allah Gen bok nggwa mo nin anato nin bi nin nggwa mo Yefun Allah wa nin ben Yefun bi suk-i sor. Sane anato nin jammo Yesus Kristus, ete Yesus Kristus dé gato sye ne ben sato ye dar mo nin mo sukibit gato nin ben ne subere tot sukibit ne or wé kadit nin re.

Yakobus 1:1

Ji gato gum do Yakobus, ji ben suk wa Yefun Allah si men bi Yekwesu Yesus Kristus. Ji anato krom surat ré wa nin yé gato sok mo Yefun Allah bi rus-i mo bur ré or sino. Ndo mo nin sino.

2 Timotius 4:18

Sane dom, yé da syeret os wa futma gu ji ket kwayo-kwayo, sarewo Yefun Yesus ós ji kadit yé mwa ne sane sor kom mo kam gato An gwat ji mu mo An bi nat-i mo gu re. Sane men bes An gum kok to kapyo mato kapyo. Sangge.

1 Tesalonika 2:12

Men duno nin, men ós nin ben suk tepsu suk gato men duno nin su ne. Men wergat nin subere nin ben suk tepsu Yefun Allah mit sor, we Yefun Allah nai nin sok mo An bi rus-i, subere nin si An kem mo pe gato ndo wai o re.

Efesus 5:26

Kristus bi An nggwa wa nai sukibit wé kadit men. An bi sukduno tepsu syur gato An de mo men wa rus sukibit wé kadit men re. Sane An fro men wa men sok mo Yefun Allah bi rus-i.

1 Korintus 6:11

Suga nyim nin ge bok yo mone ben suk sane re, sarewo su ré, nin brek kadit os ibit gato nin ben suga nyim ne re. Yefun Allah nai nin sok mo An bi rus-i wa nin ben An bi suk-i sor. Men bi Yekwesu Yesus Kristus kak os wa nin subere Yefun Allah yo ben sukye nai nin tepsu sukibit gato nin ben ne nde, wo An ki do, nin sa, tep wa sok mo An bi rus-i. Yefun Allah gato jom men ne, An Gen ós nin onyar kem mo Yefun Yesus anato nin ku os wa sok mo Yefun Allah bi rus-i ne it.

1 Korintus 1:2

Men ka we krom sukdu ré wa nin yé gato onyar kem mo Yefun Allah mo kota Korintus. Men ka we krom surat ré wa nin yé gato sok mo Yefun Allah bi rus-i mo gato nin onyar kem mo os ndo gato Yesus Kristus kak ne. Men ka we krom surat ré wa nin yé gato Yefun Allah fro dor wa ben An bi suk-i sor. Men ka we krom surat ré wa nin sor nde, wo men krom wa yé mwa ne sino mo bur ré iwedewe gato mit kem mo men bi Yekwesu Yesus Kristus ne. Yesus Kristus ne anato men si yé mwa ne sino bi Yekwesu.

Roma 16:18

Ye gato wat nin kadit yu e, ki bi sukduno-i siri kadit sukduno gato yeguru ki ne yo, ye ne yo ben suk wa men bi Yekwesu Yesus Kristus nde, wo án ben suk wa ben án dakai mit at mo koirut sor re. Án ki án bi suk-i ndo yé re, án bidek nai yé gato jam nde, subere án kidar yé ne.

Roma 9:24

Men ré anato yé gato Yefun Allah fro wa ku suk gato ndo yé ne, men ye Yahudi sor nde, wo yewis yi neya dom re.

Suk Gato Yerasul Ben Ne 27:23

Noru gado, Yefun Allah gato jom ji ne, Yefun Allah gato ji gum kwerut wa ne, An bi malaikat ge dik yo ma ti mo ji de.

Lukas 6:16

Yudas gato Yakobus bi pa, si Yudas Iskariot gato ri ma meret os wa gwat yeko ma wa but Yefun Yesus.

Suk Gato Yerasul Ben Ne 20:32

Sane, ji syo nin mo Yefun Allah syim-i, bere An mewa nin tepsu sukdu gato An ki ne. Nin jammo An bi sukdu ne sa, bere sukdu ne ós nin onyar kem mo Yefun Yesus nggi wai o, ete bere An syo sukndo nai nin si yé mwa ne sino gato sok mo An bi rus-i ne.

Suk Gato Yerasul Ben Ne 1:13

Án mu kom mo Yerusalem, án mu mo nu gato án kem mone. Án it mo gumwak mo nim. Yerasul gato kem mone gum do, Petrus, Yohanes, Yakobus, Andreas, Filipus, Tomas, Bartolomeus, Matius, Yakobus (gato Alfeus bi pa), Simon (gato sok mo yekweke), si Yudas (gato Yakobus bi pa).

Yohanes 17:19

Ji bi Ji nggwa wa Ji ben Nan bi suk-i wa án, subere án waii bi án nggwa wa án benbot Nan bi sukdu-i gato sangge petok sor.

Yohanes 17:17

Nan bi sukdu anato sangge. Nan bi sukdu ete ben án subere án bi án nggwa wa án ben Nan bi suk-i ne sor.

Yohanes 15:16

Nin anato bes Ji gum Yekwesu wa nin nde, wo Ji anato bes nin gum pakon wa Ji. Ji bes nin, orete Ji syogat nin mu ben suk mwa gato ndo, tepsu kwebo bor mo kweguk. Ji syogat nin ben sukndo gato tepsu kwebo gato bere yo ibit nde, wo bo gato kem pe sor. Nin ben sukndo gato kem pe, sane bere suk to nin ndek mo Ji bi Ai, ete nin ki Ji gum mó yo, bere Ji bi Ai syo nai nin re.

Yohanes 12:26

Ye gato bi nggwa mo Ji wa an ben Ji bi suk-i ne yo, ye ne si Ji mu sino. Pe gato Ji mó, Ji bi pakon ne sisu Ji mone dom. Ye gato bi nggwa mo Ji wa an ben Ji bi suk-i yo, bere Ji bi Ai bes ye ne gum kok.”

Yohanes 6:39

Ji bi Ai gato syogat Ji ma more, An mit i do, yé sino gato An syo nai Ji ne, Ji mewa subere ge dik yo ges mo nde, ge dik yo gwet nde, wo Ji jom án pe sor, ete su kam gato bur ré kru yo, bere Ji sun án sino.

Markus 3:18

Andreas, Filipus, Bartolomeus, Matius, Tomas, Yakobus gato Alfeus bi pa, Tadeus, Simon gato sok mo yekweke,

Matius 10:3

Filipus, Bartolomeus, Tomas, Matius gato nai sugum kadit nje wa pemerintah; Yakobus gato Alfeus bi pa, Tadeus;

Matius 13:55

Ye ré anato bi ai ye gato jam ben suk su kwe sato meja e, kursi e ne bado? An bi im gum do Maria, bado? An bi nji gum do Yakobus e, Yusuf e, Simon si Yudas bado?

Markus 6:3

Ye ré, An ye gato jam ben suk su kwe sato meja e, kursi e ne. An jam sukduno mwa ne sa u ne? Ye ré, An Maria bi gan, fe! An bi nji anato Yakobus e, Yoses e, Yudas si Simon fe! Anga bi nyanggon ge bok ne si men kem more sino fe! Ye ré, An nut do An bes An nggwa tepsu yepasye ete An ma more, ete An duno men bado?” Sane yé mwa mone bariket Yefun Yesus re.

Roma 1:6

Sane nin ye Roma dom sok mo yewis dik yo gato ji mu duno ne. Yefun Allah nai nin ma sok mo Yesus Kristus bi yetuge-i.

Yudas 1:3

Ji bi nji ji bi nyanggon gato ji jimnotku, sangge ji da iwa krom surat wa nin subot os ndo gato Yefun Yesus kak wa men kem ndo to kapyo mato kapyo ne. Ji da iwa krom subot sukdu ne gato men sino jammo mó re, sarewo suk yo ben sato tik ji mit wa ji krom sukduno wa nin subere nin bes sukdu subot Yesus Kristus ne kok o et. Nin jammo suk gato ji krom ré et. Yefun Allah bi sukduno subot Yesus Kristus ne, An grem kem wam dik su men yé gato onyar kem mo Yesus Kristus. Sukdu ne kwa yo gwet mo nde. Sane nin werwa nin bes sukdu ne kok wai kadit sukdu yi neya et. Sane dom nin duwer yé gato ma wa duwer nin mo sukdu ne et. Ji syogat nin ben sane,

Yudas 1:21

Nin eswa men bi Yekwesu Yesus Kristus ma ben bi suk-i ne ndo bor su nin sor. Bere An yo ben suk su nin tepsu sukibit gato nin ben ne nde, wo bere An gwat nin mu mo pe gato ndo wa nin si An kem ndo mone to kapyo mato kapyo. Nin eswa suk ne bor yo, nin ben nin bi suk-i, nin napawa pe do, Yefun Allah bi sukjimnut sye kas subot nin sor.