Yohanes 8:6 - Abun Scripture

⁶ Yeguru si ye Farisi ndo oror Yefun Yesus. Yeguru si ye Farisi meret os subere án ku os wa án ndak Yefun Yesus mo bi yekwesu gwem, subere yekwesu ne ben sukye yo nai Yefun. Sarewo Yefun Yesus ka, ete An krom suk mo bur su An sopkwa.

Yohanes 8:6 Referans Kwoze

Lukas 10:25

Orete yeguru agama ge dik yo gato owa duno nje su Musa bi sukduno-i ne meret os wa Yefun Yesus. An ma ti mo Yefun Yesus gwem, ete an ndo mo Yefun Yesus do, ”Yeguru, ji ben suma subere ji kem ndo to kapyo mato kapyo ne?”

Matius 19:3

Ye Farisi ge bok yo ma ku Yefun Yesus subere yé bok ne werwa meret os wa Yefun Yesus. Yé bok ne ndo mo Yefun Yesus do, ”Men simo Musa bi sukduno-i ne yo, yekra ku os wa an sombok an bi nggon wé tepsu pe gato an dakai imo bado?”

1 Korintus 10:9

Suk gato men bi Yekwesu Yefun Yesus duyawa men ben ne, men ben nde, we tomga nyim ne án deyo ben suk gato Yefun duyawa ne, orete kwis gu ye gane kwop or.

Markus 10:2

Ye Farisi ge bok yo ma ku Yefun Yesus subere yé bok ne werwa meret os wa Yefun. Ye Farisi ne ndo mo Yefun Yesus do, ”Men simo Musa bi sukduno-i ne yo, yekra ku os wa an sombok an bi nggon wé, bado, nde e?”

Markus 8:11

Ye Farisi ge bok yo ma ku Yefun Yesus, ete Ye Farisi ndo mo Yefun Yesus subot suk bok yo. Án werwa meret os wa Yefun Yesus, sane án ki nai Yefun Yesus do, ”Nan ben suk yo gato ben men yeket et, subere Nan kadum nai men do, Nan ku suktinggi kadit Yefun Allah.”

Matius 26:63

Sarewo Yefun Yesus not sor. Yekwesu ne ki nai Yefun Yesus o do, ”Ji syogat Nan ki suk gato sangge tepsu Nan ki mo Yefun Allah gato gesyos ne gwem. Nan ki rer nai men jam et, Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men, bado? Te nan anato Yefun Allah bi Gan ne bado?”

Matius 22:35

Ye Farisi ge dik yo gato owa duno nje su Yefun bi sukdu ne meret os wa Yefun Yesus. An ndo Yefun Yesus subot sukduno kwa yo.

Matius 22:18

Yefun Yesus jam yé bok ne meret os wa An, subere yé maskwa An mo sukdu gato An ki satu ne. {Sato Yefun Yesus ki do, men bi pajak nde, bere Kaisar maskwa An. Wo An ki do, men bi pajak yo, bere ye Yahudi mwa ne maskwa An.} Sane An ki do, ”Nin yé gato kidar do, nin onyar kem mo Yefun, sarewo nin mit tara ne te, suma ben anato nin meret os wa Ji ne?

Matius 16:1

Ye Farisi si ye Saduki ge bok yo ma ku Yefun Yesus. Án werwa meret os wa Yefun Yesus, sane án ki nai Yefun Yesus do, ”Nan ben suk yo gato ben men yeket et, subere Nan kadum Yefun Allah bi suktinggi ne bor wa men me et.”

Matius 15:23

Sarewo Yefun Yesus yo ki sukdu kwa yo nai nggon ne nde. Sane Yefun Yesus bi pakon ma wergat Yefun do, ”Nan syogat nggon ne mu kadit men et, we mom boribot men ete saiye gat men petok sor, men bari it.”

Matius 10:16

”Nin jammo suk gato Ji ki ré et, Ji syogat nin mu, nin tepsu jot gan gato yo nggi nde mu mo ndar krok miten. Sane nin kem fra tepsu kwis bam, nin ben suk-i njep tepsu ndabu.

Yohanes 8:2

Bi ik sidu, Yefun Yesus satu mo Yefun Allah bi nu de mo ros de mit. Yé mwa ma sum mone. Sane Yefun Yesus kem, ete An duno yé mwa mone.

Lukas 11:16

Ye yi yo o meret os wa Yefun Yesus, sane án ndo mo Yefun Yesus do, ”Nan ben suk yo gato ben Yefun Allah bi suktinggi ne bor wa men me et.”

Markus 12:15

Sarewo Yefun Yesus jam yé bok ne meret os wa An, subere ye maskwa An mo sukdu gato An ki satu ne. {Sato Yefun Yesus ki do, men bi pajak nde, bere Kaisar maskwa An, wo An ki do, men bi pajak yo, bere ye Yahudi mwa ne maskwa An.} Yefun Yesus jam do, yé ne da ben nggwa tepsu ye gato onyar kem mo Yefun Allah, sarewo án mit tara re. Sane An ki do, ”Suma ben anato nin meret os wa Ji ne? Nin gwat ye Roma bi sugum det dik yo ma wa Ji me et.”

Markus 3:2

Ye deyo mone, yé ne iwa meret os wa ki Yefun Yesus gum ibit mo suk gato An ben su kam Sabat ne. Sane yé bok ne sokwa Yefun Yesus pe, án nut mo án syidem do, ”Te, Yefun Yesus ben ye yo ge su kam sye kam Sabat ne bado?” {Do Yefun Yesus ben ye ne ge yo, bere yé ne ndak Yefun Yesus do, An ben suk siri kadit sukduno subot kam Sabat.}