Yohanes 8:12 - Abun Scripture

¹² Yefun Yesus ki nai yé mwa mone o do, ”Ji dakai anato tepsu sukru gato rer ku nje mo bur ré. Ye gato simo Ji it yo, an yo mu su ndendu o nde, wo rer ku ye ne anato an kem ndo.”

Yohanes 8:12 Referans Kwoze

Yohanes 12:46

Ji ma mo bur ré tepsu rer ku nje mo bur ré subere yé bok ne sino gato onyar kem mo Ji it yo, án yo kem mo ndendu o nde.

Yohanes 9:5

Ji mo bur ré tó, Ji anato tepsu sukru gato rer ku nje mo bur ré.”

Yohanes 12:35

Yefun Yesus ki nai án do, ”Su ré, rer ku nin mó tó. Yo nam nde ge, rer yo ku nin o nde. Sane su kam gato rer sisu nin more tó, ndendu nde tó, nin ben nin bi suk-i mo pe gato rer ku nin ne sor. Wo nin mu su ndendu yo, bere nin jam nde pe gato nin muket ne re.

Matius 5:14

Nin anato tepsu sukru wa yé mwa mo bur ré sino. Bere yé mwa me nin tepsu yé mwa me kota gato yé nggo mo bobuk.

Yohanes 3:19

Yefun Allah nutbot or re. Ye yi yo iswen An mone o nde. Yefun Allah bi sukdu gato sangge ma mo bur ré re. An bi sukdu ne tepsu rer gato ku nje mo bur ré. Sarewo yetu iwa ndendu bi suk-i wai kadit rer bi suk-i, we yetu ben bi suk-i ibit wai o re.

2 Petrus 2:4

Bere Yefun Allah syo sukye nai án mo sukibit gato án ben ne, we suga nyim tuya Yefun syo sukye nai malaikat si nje mwa neya mo sukibit gato yé ben ne re. Malaikat gato ben sukibit, Yefun Allah yo misyar nde, wo Yefun syo sukye nai malaikat ne it. Yefun bare malaikat ne mo pe gato yé wai o re. Yefun Allah rai án ete bok án mo pe gato ndendu yut mo bur desnak kret kam gato Yesus Kristus satu ma ndobot men yetu si malaikat sino. Tepsu kam gane bere An syo sukye nai malaikat ne dom.

Suk Gato Yerasul Ben Ne 13:47

we, Yefun Allah syaugat men, An ki nai men do, ’Ji ben nan tepsu sukru wa yewis yi, subere an jam Ji bi sukdu ne rer, tepsu sukru rer ku yetu. Sane bere nan gwat Ji bi sukdu gato ós yetu brek kadit os ibit subere án kem ndo to kapyo mato kapyo. Ji bes nan subere nan gwat sukdu ne mu mo pe mwa mo bur ré iwedewe sino.’ ”

Suk Gato Yerasul Ben Ne 26:23

Kristus gato Yefun Allah tom su men bi amui do, An syogat ma mo bur ré wa nai men yetu kadit sukye ete jowa men, Yefun Allah bi ma re, ete yé ben sukye nai Kristus, yé gu An kwop wé. Orge Yefun Allah sun An kadit sukkwop re. An anato ye gato sun su futmo ne. An kwop or, An sun o subere An kak os ndo wa An dakai bi yewis-i si yewis yi neya sino dom.”

Yohanes 14:6

Yefun Yesus ki nai an do, ”Ji dakai anato tepsu os gato mu mo Yefun Allah. Ji anato tepsu os gato sangge. Ji anato kak os wa yetu kem ndo mone. Yetu yo ku os wa an mu kom mo Ji bi Ai nde, wo an sibot os gato Ji kak ne sa, bere an kom mo Ji bi Ai re.

Yohanes 7:17

Ye gato iwa ben suk tepsu Yefun Allah mit ne yo, bere ye ne jam rer do, sukduno ne ma kadit Ji dakai, ondeyo sukduno ne ma kadit Yefun Allah, bere ye ne jam.

Wahyu 21:24

Kota ne bi sukru bere rer ku yewis mwa ne sino tep wa án mu ben án bi suk-i su. Yeraja mo buryo-buryo bere gwat án bi sukrok mwa ma mo kota ne.

Lukas 2:32

Bere Pa ré tepsu sukru gato rer ku os wa yewis yi gato jam nde Yefun, Pa ki rer subot Nan, Yefun Allah bi os-i, subere yewis yi ne jammo Nan. Bere Pa ré ben Nan bi rus-i, gato ye Israel ne, subere án gum kas mo yé mwa neya re.”

Yudas 1:13

Án tepsu sem nap sye wai gato sam sukkwik si i-bre mu bare mo nden. Sukkwik ne tepsu sukibit gato án ben ne, án nutbot sisu ndo yo, bere án damen mone, wo án yo nutbot sukibit gato án ben ne nde. Án tepsu bí gato waiyu muya-muma mo gu nim ne, sarewo án mu siri kadit pe gato Yefun Allah fro wa án muket ne. Sane anato bere Yefun Allah fro nat gato ndendu yut wa án kem mó to kapyo mato kapyo.

2 Petrus 2:17

Yeguru gato kidar suk anato tepsu syur nggrup gato sá re. Men nut do, án syo suk gato men mitmo nai men ne ware, án yo ós men wokgan yo dom nde. Yeguru ne tepsu nyotem gato ndu gato gwat nogi ma ware, nofuf krat gwat mu re. Men nut do, án ós men su sukduno gato ndo wa men ware, án yo ós men mo nde, suk yo mo nde. Yefun Allah fro nat gato ndendu yut wa bere yé ne kem mó.

Yudas 1:6

Sane dom, suga nyim tuya, malaikat gato ben bi suk-i tara kadit suk gato Yefun Allah fro wa án ben ne sor án mu kadit án bi nat-i ne sa, Yefun Allah rai án su bus gato kem krat to kapyo mato kapyo, ete Yefun Allah grem án mo pe gato ndu mo bur desnak re. Án kem mone sor kom mo kam sye gato Yefun Allah ma ndobot yetu mwa ne sino, ete su kam ne bere Yefun Allah bare malaikat gane mo bot gesyos re.

Yohanes 12:36

Rer ku nin mó tó yo, nin nai sukjimnut dik wa nin onyar kem mo rer ne et. Ji anato tepsu rer ne. Nin onyar kem mo Ji it yo, nin tepsu Ji bi pá, nin jam suk gato rer kom mo mit.” Yefun Yesus ki sukdu ne, orete An mu kadit pe ne. An gurik dik kadit yé mwa ne re

1 Yohanes 1:6

Men ben sukibit kamdik-kamdik tepsu ye gato kem mo ndendu tó, ete men ki do, men si Yefun tepsu dik, sane it yo, men kidar kone. Sane o, suk mwa gato men ben ne yo tepsu Yefun Allah mit dom nde.