Yohanes 7:12 - Abun Scripture

¹² Yé mwa gato sum wa simo kam sye ne, án tom apre nai yu subot Yefun Yesus. Deyo ki do, ”An Ye gato ben sukndo.” Deyo o ki do, ”Nde re! An gwat os ibit ben kidar yé mwa.”

Yohanes 7:12 Referans Kwoze

Yohanes 9:16

Ye Farisi ne deyo ki do, ”Ye gane yo ma kadit Yefun Allah nde, we An ben suk siri kadit men bi sukduno subot kam sye kam Sabat.” Sarewo ye Farisi deyo o ki do, ”Ben sa u anato Ye gato ben suk gato siri ne nggiwa ben suk gato kadum Yefun Allah bi suktinggi gato ben men yeket sare ne?” Orete ye Farisi duwer yu mo Yefun Yesus it anane.

Yohanes 7:47

Ye Farisi ki nai án do, ”Ye ne ben kidar nin dom bado?

Yohanes 7:32

Ye Farisi bok yo mone jam yé mwa ki suk apre nai yu subot Yefun Yesus. Sane ye Farisi si yekwesú mo Yefun Allah bi nu syogat ye gato mewa Yefun Allah bi nu ne mu wa but Yefun Yesus.

Filipi 2:14

Mo suk sino gato nin ben yo, nin nuk ye yi gum daret nde, nin da nyar ket ye yi ete nin dumu su nde, nin duwer yu nde.

Roma 5:7

Sarewo yetu ge dik yo gato iwa bi nggwa kwop win ye gato ben bi suk-i ndo tepsu Yefun Allah mit, men ku ye ga sane ndaf nde. Sane dom, ye gato ben bi suk-i ne ndo, bere yetu ge dik na sor ete fro nggwa wa kwop wa ye gane bayok.

Suk Gato Yerasul Ben Ne 11:24

Barnabas sa, an ye gato ben sukndo. Yefun Allah Gen bok nggwa mo an pe sor. An onyar kem pe mo Yefun Yesus. Sane Barnabas tik yé mwa mone mit anato yé mwa ne brek kadit os nyim, ete án jammo Yefun Yesus tepsu án bi Yekwesu.

Yohanes 7:52

Ye Farisi ki nai Nikodemus do, ”Sane nan dom si ye Galilea sino onyar kem mo Ye ne bado? Nan watbot Yefun Allah bi sukdu sisu ndo et! Bere nan jam mone do, yenabi yo ma kadit bur Galilea nde.” [

Yohanes 6:14

Yé mwa mone me Yefun Allah bi suktinggi bor mo suk gato Yefun Yesus ben mone sa, án ki do, ”Sangge yenabi gato Yefun Allah tom su men do, bere An syogat ma mo bur ré, ana gare it.”

Lukas 23:50

Yetu ge dik yo, an gum do Yusuf, an ontu mo kota Arimatea, mo bur Yudea. Yusuf ré, an gum sok mo ye Yahudi bi nu ari bi yekwesu. An ben sukndo, an ben an bi suk-i ri-roi. An eswa kam gato Yefun Allah ma jowa men tepsu men bi Yekwesu. An gum da sok mo ye Yahudi bi yekwesu, sarewo an yo simo yekwesu gato nai sukjimnut dik do, án gu Yefun Yesus kwop ne nde.

Lukas 23:47

Ye Roma bi yesukmise bi yesu dik yo me suk mwa gato bor mone sa, an un Yefun Allah, an ki do, ”Sangge, Ye ré ben suk gato ibit yo mo nde, An ye gato ben suk tepsu Yefun Allah mit sor.”

Lukas 18:19

Yefun Yesus ki nai ye ne do, ”Suma ben to nan ki do, Ji ben Ji bi suk-i ndo ne? Yetu gato ben bi suk-i ndo yo mo nde, wo Yefun Allah ka dik sor anato ben bi suk-i ndo.

Lukas 7:16

Yé mwa me suk gato Yefun Yesus ben ne, án sino yeket, án nyuwa, ete án un Yefun Allah. Yé mwa ne ki do, ”Yenabi gato gum kok sye dik yo anato ma kem su men it anare. Yefun Allah syogat yenabi dik yo ma wa ós An bi rus it anare.”

Lukas 6:45

Men yetu tepsu kwe mwa ne dom. Ye gato mit si onyar kwo ndo, ye ne tepsu kwe gato kom ndo. Sane kadit sukndo mwa gato an sum mo an mit ne, suk gato an ki ne ndo dom. Wo ye gato mit si onyar ibit, ye ne tepsu kwe gato kom ibit. Kadit sukibit mwa gato an sum mo an mit ne, suk gato an ki ne ibit dom re. Suk gato men ki ne bere syesyar kadit men mit si men onyar fe!”

Matius 27:63

Yekwesú mo Yefun Allah bi nu si ye Farisi ne ki do, ”Yenggras, men napakom yekidar gane kem mo bur ré tó, An ki do, ’Kam we rek, ete Ji sun wé kadit sukkwop.’

Matius 21:46

Sane án werwa án but Yefun Yesus, sarewo án nyuwa yé mwa gato sum mone gato nut do, Yefun Yesus anato tepsu yenabi.

Matius 10:25

Sane ye gato farkor sane sor an gum sye tepsu an bi yeguru yo, wai mó re. Sane dom, pakwerut gato ku gum tepsu an bi yenggras yo, wai mó re. Rus dik yo bi yesu gato gum do Beelzebul ben sukibit, sane yo, bere yé mwa mo an bi rus-i ne sino ku gum ibit wai kadit an o re.”