Yohanes 17:3 - Abun Scripture

³ Án jam Nan, Yefun Allah ka dik gato sangge, ye yo nggi tepsu Nan mo nde. Án jam Ji, gato Nan bi Gan, Yesus Kristus gato Nan syogat ma more anato án kem gesyos.

Yohanes 17:3 Referans Kwoze

1 Yohanes 5:20

Men jam o do, Yefun Allah bi Gan ma mo bur ré re, An ós men, An kak men bi sukjimnut, subere men jam Yefun Allah gato sangge ne. Men si Yefun Allah gato sangge ne tepsu dik. Men si An bi Gan Yesus Kristus ne tepsu dik it. An sor anato Yefun gato sangge re. An sor anato ós men kem ndo to kapyo mato kapyo re.

Yohanes 17:25

Ji bi Ai gato ben bi suk-i ndo petok sor, yé mo bur ré yo jam Nan nde, wo Ji sa, Ji jam Nan re. Ji bi pakon ré dom jam do, Nan anato syogat Ji ma mo bur ré.

Yohanes 3:17

We Yefun Allah yo bi An bi Gan ma mo bur ré wa syo sukye nai men mo bot gesyos nde, wo An bi An bi Gan ma mo bur ré wa An ós men yetu kem ndo to kapyo mato kapyo.

1 Yohanes 4:6

Sarewo men ré sok mo Yefun Allah bi rus-i, sane ye gato mit kem mo Yefun Allah, bere an jambot men bi sukdu-i. Wo ye gato jam nde Yefun Allah, bere an yo jambot men bi sukdu-i nde. Sane kadit ne men jam do biris gne pet moe ye ne. Men jam do Yefun Allah Gen bi sukdu-i ne sangge, tara kadit biris bi yewkesu bi sukdu-i gato gwat nje ges mo os ibit.

Yohanes 17:23

Ji si án tepsu dik, ete Nan si Ji tepsu dik subere án sino tepsu dik sisu sangge it. Sane bere yé mo bur ré jam do, Nan anato syogat Ji ma more. Sane dom bere yé mo bur ré jam do, Nan bi sukjimnut sye kas subot Ji bi pakon ne tepsu Nan bi sukjimnut sye kas subot Ji re.

Yohanes 17:21

Ji bi Ai, Ji ndek mo Nan subere án sino tepsu dik, tepsu Nan si Ji tepsu dik. Án ete si Men tepsu dik dom et, subere yetu mo bur ré jam do, sangge Nan anato syogat Ji ma mo bur ré re.

Yohanes 3:34

We, Ye gato Yefun Allah syogat ma mo bur ré, Yefun Allah syo Yefun Gen bok nggwa mo An, Yefun Gen bi suktinggi ne pe gato or mó yo mo nde. Sane Yefun Allah bi Gan ki Yefun Allah dakai bi sukdu-i ne rer wa men jam sor.

2 Korintus 4:6

Yefun Allah ki bi sukdu-i do, ”Nyot rer ku pe gato ndendu ne et,” sane Yefun Allah anato tepsu rer gato ku men mit re, anato men tepsu An bi pakwerut. Rer ne ku men mit, ete kak men bi sukjimnut subere men jam Yefun Allah bi suktinggi gato bor mo Yesus Kristus sugato An gwat os be ne ma.

2 Tesalonika 1:8

Bere Yefun Yesus si malaikat ne is ma, án gwat bot gato ru sye kadit gu ne ma wa án ben sukye nai yé ne. Án syo sukye nai yé gato misyar Yefun Allah. Án syo sukye nai yé gato bariwa simo os ndo gato men bi Yekwesu Yesus Kristus kak ne.

Yohanes 17:8

Sukdu gato Nan ki nai Ji, Ji waii ki nai án jam re, án iwa sukdu ne. Án jam do, sangge Ji anato ma kadit Nan, Ji bi Ai. Án jam do, sangge, Nan anato syogat Ji ma mo bur ré re.

Yohanes 14:26

Sarewo Yefun Allah Gen gato Ji bi Ai bere syo ma win Ji ne, bere Yefun Gen duno nin su suk mwa ne sino. Bere Yefun Gen ós nin napawa suk mwa gato Ji ki nai nin re.

Yohanes 8:19

Sane ye Farisi ne ndo mo Yefun Yesus do, ”Nan bi Ai mo u ne?” Yefun Yesus ki do, ”Nin jam nde Ji re. Nin jam nde Ji bi Ai dom re. Nin jam Ji su sangge it yo, nin jam Ji bi Ai dom it anane.”

1 Korintus 15:34

Su ré nin nai sukjimnut gato ndo et. Nin ben sukibit o nde. Nin deyo mone yo jam Yefun Allah nde tó, nin damen mone ete ndo.

1 Tesalonika 1:9

we yé mwa mo bur ré iwedewe ne nuk subot sukndo gato nin ben su men tomgato men ma si nin kem mo kota Tesalonika ne. Yé mwa ne nuk do, nin iwa men ma ku nin mone. Yé mwa ne nuk o do, nin misyar sukdaret mwa mo bur ré gato nin som daret, orete nin brek ma nin bi nin nggwa mo Yefun Allah gato sangge, ete nin ben Yefun Allah gato gesyos ne bi suk-i sor.

Yohanes 10:36

Sane Ji anato yefun digane dom. Ji anato yefun sor nde, wo Ji anato Yefun Allah bi Gan gato Yefun Allah bes ete syogat ma mo bur ré re. Sane ben sa u anato nin ki do, Ji kiket Yefun Allah gum ibit mone ne? Ji ki sukdu ne sangge sor.

Yohanes 7:29

wo Ji sa, Ji jam An, we Ji ma kadit An. An anato syogat Ji ma more.”

Yohanes 6:57

Ji bi Ai gato ben yetu mbau syogat Ji ma more. Sane tepsu Ji mbau mo An, ye to git Ji ku, bere mbau mo Ji dom.

Yohanes 5:44

Nin bi sukjimnut sye wa ye yi un nin gum, ete nin bambrai wa Yefun Allah un nin gum ne yo, bere nin nai sukjimnut dik wa nin onyar kem mo Ji sa u ne? Yefun Allah, An ka dik ne sor, ye yi yo nggi wai kadit An nde. Sarewo nin yo werwa ben suk subere An un nin gum nde.

Yohanes 11:42

Ji jam do, Ji ndek suk mo Nan yo, bere Nan jam, ete Nan syo nai Ji re. Sarewo Ji ki sukdu ré subere yé mwa gato sum more jam do, sangge, Nan anato syogat Ji ma mo bur ré.”

Lukas 9:48

Orete Yefun Yesus ki nai An bi pakon do, ”Ye to mit kem mo Ji anato an kak an mit wa pa wokgan sato ré it yo, tepsu ye ne kak an mit wa Ji dom anane. Sane dom, ye to kak an mit wa Ji yo, ye ne kak an mit wa Yefun Allah gato syogat Ji ma more dom anane. Sane nin yé gato is an nggwa tepsu pa wokgan, bere Yefun Allah anato bes ye ne gum kok.”

Markus 9:37

”Ye to kak an mit wa pa wokgan sato ré, we an bi sukjimnut kem mo Ji yo, tepsu an kak an mit wa Ji dom anane. Sane dom, ye to kak an mit wa Ji yo, ye ne yo kak an mit wa Ji sor nde, wo ye ne kak an mit wa Yefun Allah gato syogat Ji ma more dom.”

1 Korintus 8:4

Sane ji bi sukdu subot sugit gato yé som sukdaret su ne anare, men sino jam do, suk gato yé som daret mo bur ré iwedewe ne, suk ne bi suktinggi yo mo nde. Men sino jam o do, Yefun Allah yo mwa nde re, wo Yefun Allah ne dik sor.

Yohanes 17:18

Nan syogat Ji ma mo bur ré wa ben Nan bi suk-i, sane Ji waii syogat án mu mo nje mo bur ré wa án ben Nan bi suk-i ne dom.

Filipi 3:8

Sane dom, suk mwa gato mo bur ré sino yo ós ji yo mo nde. Suk gato ndo wai o re anato ji jam Yesus Kristus, ji bi Yekwesu, kom mo mit, tepsu ji bi yesyim it. Yesus Kristus anato ndo wai o re. Sane suk mwa gato ji ben suga nyim neya, gato ji onyar kem mone, suk mwa ne ji bare wé re. Suk mwa ne ji nut do, tepsu sukkwik sor re, subere ji ku os wa ji sok mo Yesus Kristus bi rus-i,

Filipi 3:10

Kwa dik yo gato ji iwa wai o re anare, ji iwa ji jam Yesus Kristus kom mo mit. Sane dom, ji iwa ji jam Yefun Allah bi suktinggi gato An sun Yesus Kristus kadit sukkwop su ne, ji iwa ji jam suktinggi ne kom mo ji mit dom. Ji iwa yé ben sukye nai ji dom, tepsu yé ben sukye nai Yesus Kristus sane sor kom mo yé gu An kwop. Ji iwa yé ben sukye nai ji kom mo yé gu ji kwop mo gato ji ben Yesus Kristus bi suk-i,

Ibrani 3:1

Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

2 Petrus 1:2

Nin jam Yefun Allah si men bi Yekwesu Yesus Kristus kom mo mit anato Yefun Allah mewa nin tep yi sor nde, wo An mewa nin sisu ndo wai kadit ne o re. Sane dom, Yefun Allah ete uttok nin mo suk mwa ne sino petok sor.

2 Petrus 1:3

Yefun Allah dakai ben sukndo su men. Yefun ben An bi suk-i ndo wai o re anato An nai men tepsu An bi pá-i subere men jam An kom mo mit. Men jam An kom mo mit sane anato An ben men nggi su An dakai bi suktinggi, subere men ku suktinggi wa men kem not mo bur ré. Men ku suktinggi wa men ben Yefun bi suk-i mo suk mwa ne sino sor.

2 Petrus 1:8

Men ben men bi suk-i sane et. Men ben men bi suk-i sane mwa o yo, bere men jam men bi Yekwesu Yesus Kristus sisu ndo, ete bere suk mwa gato men ben ne kas sisu ndo, orete men nggiwa men ós ye yi dom.

1 Yohanes 1:2

Sukdu gato ós men kem ndo ne bor mó re, men me re, ete men waii ki nai ye yi jam dom. Sukdu gato ós men kem ndo to kapyo mato kapyo, ketke kem su men bi Ai, Yefun Allah. Sukdu ne bor, men me, sane men waii kibot nai nin jam o.

1 Yohanes 1:3

Suk gato men me si men jam ne, sukdu ne anato men waii ki nai nin jam subere nin si men tepsu yedik mo Yefun bi de-i. Men ki nai nin jam subere nin si men si men bi Ai, Yefun Allah sisu An bi Gan, Yesus Kristus sino tepsu dik.

1 Yohanes 2:23

Ye gato bariket Yefun Allah bi Gan, bere ye ne si Yefun Allah yo tepsu dik nde. Sarewo ye to ki do, an onyar kem mo Yefun Allah bi Gan yo, bere ye ne si Yefun Allah tepsu dik dom.