Yohanes 15:5 - Abun Scripture

⁵ Ji anato tepsu kwe anggur ke, nin anato tepsu i-guk ne. Ye gato ut krat mo Ji tepsu dik, ete Ji waii ut krat mo ye ne yo, bere ye ne ben suk mwa gato ndo tepsu kweguk be. Nin wadigan kem dor kadit Ji yo, bere nin yo nggiwa ben suk yo mo nde.

Yohanes 15:5 Referans Kwoze

Filipi 4:13

Yesus Kristus anato ben ji nggiwa ji ben suk mwa ne sino re.

Kolose 1:10

Men ki suk su Yefun wa nin sane subere nin kem mo bur ré, nin ben nin bi suk-i tepsu Yefun Allah mit, nin ben suk gato An iwa nin ben ne petok sor. Nin ben sane yo, bere suk gato bor kadit suk mwa gato nin ben ne ndo sino, bere nin jam Yefun Allah sisu ndo wai o kadit nyim neya o re.

Yohanes 15:16

Nin anato bes Ji gum Yekwesu wa nin nde, wo Ji anato bes nin gum pakon wa Ji. Ji bes nin, orete Ji syogat nin mu ben suk mwa gato ndo, tepsu kwebo bor mo kweguk. Ji syogat nin ben sukndo gato tepsu kwebo gato bere yo ibit nde, wo bo gato kem pe sor. Nin ben sukndo gato kem pe, sane bere suk to nin ndek mo Ji bi Ai, ete nin ki Ji gum mó yo, bere Ji bi Ai syo nai nin re.

Galatia 5:22

Sarewo men nai sukjimnut dik do, suk gato Yefun Allah Gen kiwa men ben ne yo, bere men ben suk sato ré: Men bi sukjimnut sye kas subot ye yi e; men mit at wa suk gato ndo petok sor e; men si ye yi neya mit ndo su yu e; men yo maskwa kekro nde e; men jimnotku ye gato ku sukye e; men ben sukndo su nje e; suk gato men tom ne men benbot e;

2 Korintus 13:8

Men duno nin yo, men ben suk yo gato wai mo sukdu gato sangge ne nde, wo men werwa men ben men bi suk-i tepsu sukdu gato sangge sor.

Yohanes 5:19

Yefun Yesus ki suk su ye Yahudi bi yepasye sare do, ”Suk gato Ji ki ré suksangge anare, Ji gato Yefun Allah bi Gan, Ji wadigan yo nggiwa ben suk nde. Ji ben suk gato Ji me Ji bi Ai ben ne ko. Suk gato Ji bi Ai ben ne yo, bere An bi Gan to Ji ré waii benbot dom.

Yakobus 1:17

Suk mwa gato men ku kadit Yefun Allah ne ndo sino, suk gato ibit yo mo nde. Yefun Allah syo suk mwa ne nai men. Yefun Allah ne ut suk gato rer mo gu nim ne sato aina e, kam e bí e ne, sarewo Yefun Allah dakai yo win nggwa nde, suk mwa gato An ben kamdik-kamdik An ben tepsu yu sor, An yo gwat ndendu bi os-i nde.

2 Petrus 3:18

Men bi Yekwesu Yesus Kristus gato nai men kadit sukye ete jowa men yetu ne, An ben sukndo su men yetu dakai yi. Sane nin dom ben nin bi suk-i ne ndo mwa wai o kadit nyim ne sor. Nin jam Yesus Kristus sisu ndo o et. Men bes An gum kok su ré sor to kapyo mato kapyo. Sangge.

Yohanes 12:24

Suk gato Ji ki ré suksangge anare, men nai fas gro wa men jan, ete fas gro dik sor ye yo jan nde yo, gro dik anane sor re. Sarewo men nai fas gro dik ne, ete men jan, bere sukjan ne kom, ete bere syesyar i-gro mwa.

Roma 7:4

Sane, ji bi nji, ji bi nyanggon, tepsu yekra bi sukduno-i yo jom nggon gato bi ya kwop kadit ne o nde, ye Yahudi bi sukduno-i ben sato kwop kadit nin re, sukduno ne yo jom nin o nde, we nin si Yesus Kristus tepsu dik, ete nin si An sino kwop kadit sukduno ne re. Sane ye Yahudi bi sukduno-i yo jom nin o nde, wo nin jammo Kristus bi sukduno-i, we nin tepsu Kristus bi yetuge-i it. Nin jammo Kristus gato Yefun Allah sun kadit sukkwop ne bi sukduno-i subere sukndo gato Yefun Allah iwa men ben ne bor re.

Filipi 1:11

Ji ndek mo Yefun subere An ós nin subere suk mwa gato nin ben ne ndo sino tepsu Yefun Allah mit, sukibit yo mo nde, subere yé mwa un Yefun Allah ete bes An gum kok mo suk gato nin ben ne.

Yohanes 9:33

Sane Ye gane ma kadit Yefun Allah, ondesa An yo nggiwa ben suk yo mo nde.”

Filipi 4:17

Ji yo ki subot suk gato nin syo nai ji ré subere nin syo suk yo o nai ji nde. Wo sukndo gato nin ben ne, ji iwa nin ben mwa wai o subere Yefun Allah waii ben sukndo nai nin mwa wai o dom et.

Roma 6:22

Sarewo su ré, Yefun Allah sombok nin wé kadit sukjimnut ibit gato jom nin ne it. Nin tepsu Yefun Allah bi pakwerut it. Mone nin ku suk gato ndo anato Yefun Allah nai nin wa nin ben Yefun Allah dakai bi suk-i sor, ete kom mo rut sa, bere nin kem ndo to kapyo mato kapyo.

Suk Gato Yerasul Ben Ne 4:12

Yefun Yesus ka dik sor anato kak os ndo wa nai men wé kadit bot gesyos, subere men kem ndo to kapyo mato kapyo. Yetu yi yo mo nde, kadit yetu mwa ne sino, Yefun Yesus An ka dik sor anato nggiwa kak os ndo wa men kem gesyos.”

1 Korintus 12:12

Kapre men yetu kaim ne dik sor, mo men kaim ne, men gwes e, men syim e, men su e, men dabe e, men sugo e, men gro e, men syokwet e ne mó. Kapre suk mwa mó, men kaim ne dik sor. Kristus dom, An ka dik sor, wo yetu mwa sok mo An kaim.

1 Petrus 2:4

Sane nin karowa Kristus et. An anato tepsu jok gato mbau, wo yetu nut do, jok ne ibit, ete yé misyar An re. Wo Yefun Allah nai An tepsu jok gato ndo wai wa nggo Yefun bi nu su ne re.

1 Korintus 12:27

Sane men sino sok mo Kristus kaim ne it. Men kadik-kadik anato tepsu Kristus syim e, gwes e, su e, dabe si suk yi neya.

Efesus 5:9

Nin kem mo pe gato nden rer it yo, bere nin ben nin bi suk-i ne ndo bor wa nje me, tepsu kwe syesyar i-bo, bere nin ben suk sato ré: nin ben sukndo su nje, nin ben nin bi suk-i ndo tepsu Yefun Allah mit, nin ben nin bi suk-i ri-roi sor.

2 Korintus 9:10

Yefun Allah gato fro sukjan gro si sugit wa men, An dom syo sukjan gro mwa gato men mit mone, An ben sukjan ne kom ndo, ete men ku i-gro mwa o mo naprut. Sane dom, men ben men bi suk-i ne ndo, men iwa syo suk nai nje, bere Yefun Allah syo suk mwa gato ndo o nai men satu, tepsu sukjan bo gato ndo ne syesyar i-bo mwa o mo naprut.

Kolose 1:6

Sukdu subot os ndo gato Yesus Kristus kak ne, ye ki frekbot yé mwa jam mo bur ré iwedewe re, anato ye mwa ne napyo simo os ndo ete ku sukndo mo sukdu ne re. Sane dom, nin waii jammo sukdu ne. Kadit kam ketke gato sukdu ne frekbotnin sa, nin simo os ndo ete nin ku sukndo mone re. Nin jam rer do, kapre nin yo ben suk yo nyim wa Yefun Allah nde, An dakai bi sukjimnut sye kas subot nin sor. Sukdu ne nin jam kom mo mit re.

Roma 12:5

Sane dom, men yé mwa gato sok mo Kristus bi rus-i anato tepsu yetu kaim dik. Sane men ge dik yo bes men nggwa kok wai kadit ge dik yo nde, we men gedik-gedik mitmo yu, men ut mo yu tepsu suk mwa mo yetu kaim ut mo yu ne. Men sino yedik, men sino sok mo rus dik.

1 Korintus 10:16

Men ki ndo mo Yefun Allah, orete men da nau anggur, bi sukjimnut do, men sino tepsu dik mo gato men da Yesus Kristus dé ne sino, bado? Sane dom, roti gato men syat wa men git subere men napawa Yefun Yesus, men git roti ne yo, bi sukjimnut do, men sino tepsu dik mo Yesus Kristus bi rus-i, gato tepsu An kaim ne, bado?

Matius 13:21

sarewo sukdu ne yo kem pe mo án mit nde, tepsu mbet gro ne i-brot yo kom mo jok nde, bergan sor, ete án misyar or re. Diksim án jammo sukdu ne, sarewo án do ku sukye mo sukdu ne yo, ye kiket án mone yo, bergan sor, ete án misyar sukdu ne kekro re.