Yohanes 15:2 - Abun Scripture

² Ji bi Ai tot kwe anggur guk gato yo bo mo nde ne wé. Ji bi Ai me i-guk gato bo mó yo, An mbron i-nat napyo wé, subere i-guk ne ndo wa bo mwa o.

Yohanes 15:2 Referans Kwoze

Matius 3:10

Wo nin ré tepsu kwe gato yo bo ndo nde. Su ré yo, Yefun Allah fro bi mbam wa gwa kwe gato sane wé, Yefun Allah gwa mo i-brot kai. Yefun Allah fro wa syo sukye nai ye gato yo kwet nde, tepsu ye gwa kwe gato yo bo nde ne, orete ye syo bot git wé re.

Matius 15:13

Sane Yefun Yesus kibot Ye Farisi si bi sukdu-i sare do, ”Sukjan gato Ji bi Ai mo gu yo jan nde, bere An tik buk wé re.

Wahyu 3:19

Ye gato Ji bi sukjimnut sye kas subot ne yo, bere Ji ndantom yé ne, ete Ji kwam án mo sukibit gato án ben ne. Sane nin kwet kadit sukibit gato nin ben ne et. Nin ben Ji bi suk-i sisu nin mit dik si nin onyar dik et.

Yohanes 15:8

Nin do ben suk mwa gato ndo, tepsu bo mwa gato kom yo, nin tepsu Ji bi pakon gato sangge, ete bere yé bes Ji bi Ai gum kok sye wai o mone re.

Matius 13:12

Ye to bi sukjimnut kak, bere jam Yefun Allah bi sukdu mwa wai o re, sane bere an jam sukdu ne kom mo mit re. Sarewo ye to da jam sukdu ne wokgan, ete an misyar, sukwokgan gato an jam ne bere ges or kadit an re.

Matius 3:12

An fro nggwa wa An wat yé gato ben sukndo kadit yé gato ben sukibit, tepsu ye gato ben nggwe wat sugit dor kadit sukkwik. Sugit ne An grem mo pe gato ndo, wo sukkwik ne An syo bot git wé, mo bot gato yo te mo nde.”

Matius 21:19

An me kwe ara ke dik yo mo os de sa, An mu nai kwe ara bo ware, kwebo yo mo nde, wo kwenat sor re ana mó. Sane An ki nai kwe ne do, ”Kwe ara, nan yo bo o nde it anare.” Yefun Yesus dufo mo kwe ara ke, or kwe ne gu it anane.

Ibrani 12:15

Nin mewa yu sawe nin deyo mu brek dari tak Yefun Allah gato ben bi suk-i ne ndo wai su men dakai yi. Nin mewa yu sawe nin deyo gwat os ibit wa nin. Tepsu sukjan gato bi ri mó, ete ri ne waii tok sukjan yi mwa neya, bere te re, nin mewa yu kadit ye gato gwat os ibit gane ma, sawe os ne ben sukye wa nin sino, ete kom mo rut ben nin ibit o re.

Yohanes 15:16

Nin anato bes Ji gum Yekwesu wa nin nde, wo Ji anato bes nin gum pakon wa Ji. Ji bes nin, orete Ji syogat nin mu ben suk mwa gato ndo, tepsu kwebo bor mo kweguk. Ji syogat nin ben sukndo gato tepsu kwebo gato bere yo ibit nde, wo bo gato kem pe sor. Nin ben sukndo gato kem pe, sane bere suk to nin ndek mo Ji bi Ai, ete nin ki Ji gum mó yo, bere Ji bi Ai syo nai nin re.

Lukas 8:13

Mbet gro gato ges mo bur ka gato jok mwa ne anato tepsu yé gato jam Yefun bi sukdu ne ete án nai Yefun bi sukdu ne mo án mit. Diksim án iwa, sarewo sukdu ne yo kem pe mo án mit nde, tepsu mbet gro ne i-brot yo kom mo jok nde. Diksim án jammo sukdu ne, sarewo bergan sor suk yo do tik án mit wa án ges mo os ibit yo, án misyar sukdu ne or re.

1 Yohanes 2:19

Suga nyim ye gato sok mo yeko ne, án sisu men, orge án mu kadit men re. Ye gare da si men, sarewo án yo mit dik su men nde. Sato án mit dik su men yo, bere án yo mu kadit men nde, sarewo án mu kadit men, ete mone men jam do, án yo mit dik su men mo nde.

Titus 2:14

Yesus Kristus bi An nggwa wa tot suktot mo sukibit mwa ne sino gato men ben ne wé, subere men tepsu nje gato ben sukibit o nde, ete men sok mo An dakai bi rus-i gato mit iwa ben suk gato ndo sor.

1 Korintus 13:1

Ji ki su yetu si malaikat bi a mwa neya, sarewo ji yo bi sukjimnut sye kas subot ye yi nde yo, suk mwa gato ji ki ne yo ós nje nde. Sane bere ji anato tepsu sukbo gato yé gwa ba sye daret sor re, wo bi sukjimnut yo mo nde.

Roma 8:28

Men yé gato bi sukjimnut sye kas subot Yefun Allah ne, men jam do, mo suk mwa ne sino gato bor mo men, bere kom mo rut, Yefun Allah fro suk mwa ne ndo wa men yé gato simo os ndo gato An fro ne.

Yohanes 17:12

Ji sisu án sa, Nan bes Ji gum-i kok tepsu Nan gum-i anato Ji yawa án kadit sukibit su Nan bi suktinggi gato Nan syo nai Ji re. Ji mewa án sane, dik yo gwet mo nde, mwa ne sino mó. Wo ge dik sor anato ges mo os ibit kadit men subere sukdu gato yé krom nyim mo Yefun bi sukdu ne bor mone it.

Matius 13:33

Yefun Yesus gwat sukamno dik yo o, An ki nai yé mwa mone do, ”Yefun Allah jowa men yetu tepsu men bi Yekwesu yo, bere tepsu sukamno ré, nggon ge dik yo nai bibit roti wokgan ete karwet su tepung sak dik sane sor, tepung mwa ne it sino.”

Matius 7:19

Kwe gato yo bo ndo nde, bere ye gwa wé, ete ye gre mo bot.

Matius 25:29

We sare, ye gato bi suk mó yo, bere an ku suk mwa yo o, ete an ku suk mwa wai o re. Ye gato mewa suk gato ye yi syo nai an sisu ndo yo, bere Yefun Allah bes ye ne jowa suk mwa wai o. Wo ye gato bi suk yo mo nde yo, wokgan gato mó yo, bere yé nai wé kadit an re.

Markus 4:20

Mbet gro gato ges mo bur ka gato ndo anato tepsu yé gato but sukdu ne ete jammo. Yé ne jamwa sukdu ne pe sane sor án ben suk gato ndo ne, deyo ben sukndo natgan, deyo o ben sukndo mwa gan, deyo o ben sukndo mwa wai, sato mbet gro gato syesyar i-bo, dik yo kom mo musyu gri e, dik yo o kom mo musyu mumat e, dik yo o kom mo wotin dik yo e ne.”

Yohanes 15:1

Yefun Yesus ki do, ”Ji dakai anato tepsu kwe anggur gato sangge. Ji bi Ai anato mewa nggwe anggur ne.

Yohanes 15:3

Nin jammo Ji bi sukdu gato Ji duno nin su ne, anato nin onyar kwo ndo re. Nin tepsu i-guk gato Ji bi Ai mbron i-nat napyo wé re.

Yohanes 15:6

Ye to yo ut krat mo Ji tepsu dik nde yo, ye ne tepsu kweguk gato yé tot, ete yé am wé. Bere kweguk ne gu, ete yé sum wa yé gre mo bot wé.

Roma 11:17

Men ye Yahudi tepsu kwe zaitun guk gato ye tot wé. Orete ye gwat kwe zaitun gato dakai kom mo nden guk-i bok yo ma but dom kweke win kwe zaitun guk gato ye tot wé ne. Nin yewis yi tepsu kwe zaitun guk gato ye gwat kadit nden ne ma. Yefun Allah but nin yewis yi dom kweke ne subere nin waii ku suk mwa gato ndo kadit kwe zaitun ke ne, tepsu nin ku os wa nin sok mo Yefun Allah bi rus-i anane.

Roma 11:22

Sane more men jam do, Yefun Allah ben An bi suk-i ndo yé, or o Yefun Allah ben An bi suk-i krat yé dom. An ben An bi suk-i krat nai yé gato ben sukibit, wo An ben sukndo su nin. Nin bi sukjimnut kem mo sukndo gato Yefun Allah ben su nin yo, bere nin kem ndo mone tó, wo nin bi sukjimnut yo kem mo sukndo ne o nde yo, bere Yefun Allah tot nin wé kadit kweke ne dom re.