Yohanes 15:1 - Abun Scripture

¹ Yefun Yesus ki do, ”Ji dakai anato tepsu kwe anggur gato sangge. Ji bi Ai anato mewa nggwe anggur ne.

Yohanes 15:1 Referans Kwoze

1 Korintus 3:9

Men ka we si Yefun Allah ben suk sino mo An bi nggwe. Nin anato tepsu Yefun Allah bi nggwe. Nin anato tepsu Yefun Allah bi nu dik yo dom.

Yohanes 6:55

Ji ku anato sugit gato ben yetu mbau sisu sangge. Ji dé anato syur gato ben yetu mbau sisu sangge.

1 Yohanes 2:8

Nin da jam, sarewo sukduno gato ji krombot ré anato sukduno gato be dom. Sukduno be ré bor mo suk gato Yesus Kristus ben ne. Or o sukduno be bor mo nin dakai dom. Sane ndendu bi suk-i ne titi wé, ete sukru gato sangge rer ku men it. {Nin ben sukibit mo ndendu ne o nde, wo nin ben suk gato ndo mo pe gato rer mwa wai o.}

Markus 12:1

Orge Yefun Yesus gwat sukamno bok yo, An ki nai yekwesú mo Yefun Allah bi nu, yeguru agama si ye Yahudi bi padosye mone. Yefun Yesus ki nai án do, ”Yetu ge dik yo ben nggwe anggur, orete an gat ros wairi wa, ete an po bur wak wa yé jomuk anggur bo mó. Orete an nggo nu gwes kok wa yé ti mó subere yé mewa nggwe ne. Suk mwa ne fro orete yenggras syogat yetu ge bok yo mewa nggwe ne. An ki nai yé bok ne do, ’Anggur ré do bo it yo, nin wat i-we, napyo wa ji, napyo wa nin.’ Orete yenggras ne mu mo nat yi kadit.

Matius 21:33

Yefun Yesus gwat sukamno dik yo o. An ki nai yekwesú mo Yefun Allah bi nu si ye Yahudi bi yepasye do, ”Nin jammo sukamno dik yo o gare et. Wam dik yo, yenggras ge dik yo bi bur det. Mone yenggras ne jan bi nggwe anggur, an gat ros wairi wa, ete an po bur wak wa yé jomuk anggur bo mó. Orete an nggo nu gwes kok wa yé ti mó subere yé mewa nggwe ne. Suk mwa ne fro, orete yenggras syogat yetu ge bok yo mewa nggwe ne. An ki nai yé bok ne do, ’Anggur ré do bo it yo, nin wat i-we, napyo wa ji, napyo wa nin.’ Orete yenggras mu mo nat yi kadit.

Yohanes 6:32

Sane Yefun Yesus ki nai yé mwa mone do, ”Suk gato Ji ki ré suksangge anare, Musa anato syo sugit gato is kadit gu nai nin nde re. Sarewo Ji bi Ai anato syo sugit gato sangge kadit gu nai nin ne,

Lukas 13:6

Orge Yefun Yesus gwat sukamno dik yo sare do, ”Yetu ge dik yo jan nak ke dik mo nggwe gur mit. Kam dik yo ete ye ne ma me nak ne bo mó bado bo yo mo nde. An do ma sa, an yo ku nak bo yo mo nde.

Matius 20:1

”Yefun Allah nai yetu sok mo An bi rus-i ne yo, bere tepsu sukamno ré. Su nyotkwo gan, yetu ge dik yo gato bi nggwe anggur mu kendo yé bok yo ma wa ben suk mo an bi nggwe ne.

Yohanes 1:9

Ye gato rer sangge kai ne, ma mo bur ré, subere rer ne ku yé mwa mo bur ré sino.

Yohanes 1:17

Kam nyim tuya Yefun Allah taru An bi sukduno subot Musa, subere An kadum os wa ye Yahudi sok mo An bi rus-i. Sarewo gabere Yefun Allah syogat Yesus Kristus ma mo bur ré anato men jam Yefun Allah bi os-i sisu sangge. Yefun Allah ben sukndo su men dakai yi anato men me os ne bor mo suk gato Yesus Kristus ben ne.

Matius 15:13

Sane Yefun Yesus kibot Ye Farisi si bi sukdu-i sare do, ”Sukjan gato Ji bi Ai mo gu yo jan nde, bere An tik buk wé re.

Yohanes 15:2

Ji bi Ai tot kwe anggur guk gato yo bo mo nde ne wé. Ji bi Ai me i-guk gato bo mó yo, An mbron i-nat napyo wé, subere i-guk ne ndo wa bo mwa o.

Roma 11:17

Men ye Yahudi tepsu kwe zaitun guk gato ye tot wé. Orete ye gwat kwe zaitun gato dakai kom mo nden guk-i bok yo ma but dom kweke win kwe zaitun guk gato ye tot wé ne. Nin yewis yi tepsu kwe zaitun guk gato ye gwat kadit nden ne ma. Yefun Allah but nin yewis yi dom kweke ne subere nin waii ku suk mwa gato ndo kadit kwe zaitun ke ne, tepsu nin ku os wa nin sok mo Yefun Allah bi rus-i anane.