Yohanes 10:16 - Abun Scripture

¹⁶ Ji si domba yi yo o gato kem mo nat ré nde. Domba ne kem mo nat tara re. Ji mu gwat domba yi ne si Ji bi domba ré sok mo nat dik sor. Bere domba yi ne jam Ji ké, ete domba ne ma si domba ré kem mo pe dik. Sane bere Ji ka dik sor anato mewa domba mwa ne sino mone.

Yohanes 10:16 Referans Kwoze

1 Petrus 2:25

Suga nyim neya nin jam nde os gato sangge sato domba gan gato muri, wo su ré sa, Yefun Allah kar nin satu, subere nin jammo Yefun Yesus gato mewa nin, tepsu suksi jammo ye gato mewa suksi ne sisu ndo ne. Yefun Allah kar nin satu ma mo Kristus subere Kristus uttok nin petok sor.

Yohanes 11:52

Yefun Yesus kwop wa yewis ye Yahudi sor nde, wo Yefun Yesus kwop subere An sum Yefun Allah bi pá gato kem mo peyo-peyo, subere án sino sum mo nat dik, subere án sino tepsu dik it.

Yohanes 6:37

Yé mwa gato Ji bi Ai syo nai Ji, bere án sino ut mo Ji. Ye to ma ut mo Ji yo, Ji yo syun ge dik yo wé dom nde.

Yohanes 10:27

Ji ké yo, Ji bi domba ne bere jamwa Ji. Ji jam domba ne, ete domba ne simo Ji.

Yohanes 10:11

Ji anato tepsu ye gato mewa an bi suksi sisu ndo. Ji mewa Ji bi domba sisu ndo. Ji bi Ji nggwa kwop wa Ji bi domba mwa ne sino.

Wahyu 3:20

Nin jammo suk gato Ji ki ré et. Ben sato Ji ma ti mo nusyo de nden ete Ji ké. Ye to jam Ji ké, ete kak nusyo wa Ji yo, bere Ji sok mu ku ye ne mo nu mit re. Bere Ji si ye ne git sugit sino mone tepsu yedik.

1 Petrus 2:10

Suga nyim nin yo tepsu Yefun Allah bi rus-i nde, wo su ré sa, nin tepsu An bi rus-i it. Suga nyim Yefun Allah dakai jimnotku nin ndo nde, sarewo nin jam nde re. Wo su ré sa, nin jam rer it. Yefun Allah dakai jimnotku nin anato An nai nin sok mo An bi rus-i it.

2 Tesalonika 2:13

Men bi nji, men bi nyanggon gato Yefun Yesus jimnotku, Yefun Allah fro nin su ketke subere nin kem ndo to kapyo mato kapyo mo Yefun Allah bi nat-i. Sane men ki ndo mo Yefun noru nombrak sor. Yefun Allah Gen kak nin bi sukjimnut anato nin jambot Yefun Allah bi sukdu gato sangge. Yefun Allah Gen kak nin bi sukjimnut anato nin brek kadit os ibit, ete nin tepsu Yefun Allah bi rus-i gato ben Yefun bi suk-i petok sor. Sane anato nin kem ndo to kapyo mato kapyo it anare.

Matius 17:5

Petrus ki suk saresa, duk gato rer-rik is ma kewa án sino, ete án jam Yefun Allah ki sukdu kadit duk mit ne do, ”Ji bi Gan gato Ji jimnotku anare. Suk gato An ben ne Ji mit iwa. Nin jammo An ne sor.”

Suk Gato Yerasul Ben Ne 22:14

Orge an ki do, ’Yefun Allah gato jom men bi amui ne anato bes nan, subere nan jam suk gato tepsu An mit. Yefun Allah bes nan subere nan ku Yefun Yesus, gato ben sukndo tepsu Yefun Allah mit. Yefun Allah bes nan subere nan jam sukdu kadit Yefun Yesus dakai syokwet.

Suk Gato Yerasul Ben Ne 18:10

Ji anato sisu nan, bere Ji mewa nan kadit nje gu nan mo kota ré. Nan ki gat sor, we yé mwa mo kota ré anato tepsu Ji bi nje-i.”

Suk Gato Yerasul Ben Ne 15:14

Simon Petrus nukbot sukdu ne rer wa men jam do, su wam futmo gare, Yefun Allah kadum do, An bi sukjimnut sye kasbot yewis yi, we An nai yetu mwa kadit yewis yi neya sok mo An bi rus-i it.

Ibrani 13:20

Yefun Yesus kwop, An dé sye anato An kak os be gato gesyos, os be ne kem su men kadit kam ne sor to kapyo mato kapyo. Sane Yefun Allah sun men bi Yekwesu Yesus Kristus satu kadit sukkwop, ete An bes Yesus Kristus gum kok wai wa mewa men yé gato sibot os be ne. Kristus mewa men tepsu yetu mewa bi suksi sato domba ne sisu ndo.

Yohanes 10:2

Sarewo ye gato sokbot ros syo yo, ye gato mewa bi suksi anane.

1 Petrus 5:4

Sane bere, Kristus gato gum kok sye wai kadit yekwesu mwa ne sino ma ne, Kristus gato mewa Yefun Allah bi rus-i sisu ndo ne do bor mo bur ré it yo, bere An syo suk gato ndo wai nai nin yekwesu mo nu ari mo suk gato nin ben ne o re. Bere, ri ma, suk gato nin ku ne, kem ndo gesyos sor, suk yo ben ibit wokgan dom nde.

Yohanes 10:3

Ye gato mewa bi suksi kom mo ros syo ne yo, ye gato mewa ros syo kak wa ye gato mewa bi suksi ne sokbot. Ye gato mewa bi domba ne sok mo ros mit sa, an kendo an bi suksi gedik-gedik gum, sane an bi suksi jam an ké, ete an bi suksi syesyar. An mu nyim mo nden, ete an bi suksi mu boribot an mu mo nden.

Yohanes 10:4

An si an bi domba syesyar mo nden sa, an mu nyim, an bi domba boribot an, we an ké, ete an bi domba jamwa an re.

Yohanes 10:5

Ye yi ké yo, bere suksi ne yo simo ye ne nde re, wo domba ne titi wé kadit ye ne, we domba ne jam nde ye ne re.”

Yohanes 17:20

Ji ndek mo Nan wa án sor nde, wo Ji ndek mo Nan wa yé gato bere onyar kem mo Ji mo sukdu gato Ji bi pakon ré ki nai án jam ne.

Roma 11:25

Ji bi nji, ji bi nyanggon, ji iwa nin jam subot suk yo gato Yefun Allah gurik kadit men yetu kom more. Nin jam sukdu ré subere nin dakai bes nin nggwa daret nde. Sukdu ne sare: ye Yahudi ne bere su krat sor kom mo kam gato yewis yi onyar brek ma kem mo Kristus, tepsu Yefun Allah nut do, tep mone it, orete yo, ye Yahudi yo su krat o nde.

Lukas 15:8

Yefun Yesus gwat sukamno dik yo o, An ki do, ”Nggon ge dik yo grem sugum det musyu dik mo mom bi nu. Sugum det dik yo do ges yo, bere mom ben suma ne? Bere nggon ne ndum kak, mom fre nu ne er, mom meret mo nu ne sane sor mom ku et.