Yohanes 10:1 - Abun Scripture

¹ Yefun Yesus ki do, ”Suk gato Ji ki ré suksangge anare, yé si suge gato gum do domba yo, yé gat ros wairi wa domba kem mo mit. Sane ye gato yo sokbot ros syo nde, wo an it ket ros mo nat yi ne yo, ye ne anato ye gato syimsi suk, ye ne ben sukibit.

Yohanes 10:1 Referans Kwoze

Matius 7:15

”Nin mewa nin nggwa kadit yenabi gato kidar nin. Yenabi ne ma ku nin, ete án brek nden we, án ben án nggwa sato domba mo de nden, wo án mit ne tepsu ndar krok.

Roma 16:18

Ye gato wat nin kadit yu e, ki bi sukduno-i siri kadit sukduno gato yeguru ki ne yo, ye ne yo ben suk wa men bi Yekwesu Yesus Kristus nde, wo án ben suk wa ben án dakai mit at mo koirut sor re. Án ki án bi suk-i ndo yé re, án bidek nai yé gato jam nde, subere án kidar yé ne.

1 Yohanes 4:1

Ji bi nji ji bi nyanggon gato ji jimnotku, yé mwa ki do, Yefun Allah Gen bok nggwa mo án, sane sukdu gato án ki ne ma kadit Yefun Gen. Sarewo nin jammo án bi sukdu-i kekro nde, nin watbot sukdu ne kom-kem et, subere nin jam do, án ku án bi sukdu-i kadit Yefun Allah Gen bado, án ku án bi sukdu-i kadit suk yi neya e? Sane nin watbot sisu ndo et, we su ré yenabi mwa gato kidar suk mu ki bi sukdu-i bot peyo-peyo mó re.

Ibrani 5:4

Yetu ge dik yo dakai bes nggwa tepsu yekwesu ne mo nde, wo Yefun Allah dakai bes an gum tepsu yekwesu, tepsu Yefun bes Harun ne.

2 Petrus 2:3

Yeguru ne gro sye wa án ku suk mwa wa án dakai. Sane án kidar nin su sukdu gato án dakai fro subere nin syo suk nai án. Sarewo nam it, Yefun Allah gato bere ndobot án fro wa syo sukye nai án. Yefun Allah fro wa bare án mo bot gesyos, Yefun Allah es ndek mo os koirut wa án re.

2 Petrus 2:1

Suga nyim tuya yenabi gato kidar Yefun Allah bi yetuge-i mó re. Sane, yeguru gato kidar suk bere bor mo nin bi nat-i ne dom. Yeguru gane iwa ki bi sukduno-i gato yo sangge nde. Yeguru bi sukduno-i ne napyo sye sangge wa tik yé mit, sarewo án bok sukduno siri fros Yefun bi sukduno-i gato sangge mone. Men jammo yeguru bi sukduno-i ne yo, bere sukduno ne ben men dakai ibit mo koirut. Men bi Yekwesu Yesus Kristus tot suktot wa men re, An nai men wé kadit sukibit subere sukibit yo jom men o nde, sarewo yeguru ne rewa Yefun Yesus. Yeguru bariket An o re. Yeguru kidar nje ket kwayo-kwayo, sane bergan sor re án dakai ben án dakai ibit mone re.

1 Petrus 1:10

Sukdu subot os ndo gato Yefun Allah fro wa nai men yetu ne anato yenabi bok yo suga nyim ne werwa jam kom mo mit. Yenabi bok ne mit iwa jam sukdu ne, án meret, án meret, án watbot suk mwa pare subere án jam sukdu subot os ndo gato bere Yefun fro dakai yi wa men, orete yenabi ki napyo nai men jam re.

Roma 10:15

Ye syogat nje mu ki sukdu ne nde tó, bere ye ki sukdu subot Kristus nai nje jam sa u ne? An jam sukdu mo nde. Ye krom mo Yefun Allah bi sukdu subot ye gato gwat sukdu ne do, ”Yé mit iwa ye gato ma ki sukdu subot os ndo gato Yefun Allah fro ne ma ku án et.”

Yohanes 3:3

Yefun Yesus ki do, ”Suk gato Ji ki ré suksangge anare, ye kem su nan satu o yo, nan gum sok mo Yefun Allah bi rus-i it anane.”

Titus 1:11

Nan duyawa yé gato ki bi sukdu-i sane, subere án yo ki sukdu sane o nde, we án duno nje su sukduno gato yo ri nde, anato án gwat rus bok yo mu ges mo os ibit mone. Án duno nje, án kidar nje sane, subere án ku suk mwa mone wa án dakai sor re.

Yohanes 10:7

Sane Yefun Yesus ki bi sukdu-i subot ye gato mewa domba wam dik yo o do, ”Suk gato Ji ki ré suksangge anare, Ji dakai anato tepsu ros syo wa domba sokbot.