Yohanes 1:14 - Abun Scripture

¹⁴ Sukdu ne ma mo bur ré ka tepsu yetu re. An ma si men kem mo bur ré sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o re. Yefun Allah anato An bi Ai, Yefun Allah bi Gan ge dik ne sor re, anato Yefun Allah bes An gum kok sye wai. {An anato Yefun Yesus.}

Yohanes 1:14 Referans Kwoze

1 Yohanes 4:9

Yefun Allah bi sukjimnut sye kas subot men yetu, An kadum nai men sare do, An syogat An bi Gan ka dik ne ma mo bur ré, subere men yetu ku os wa men kem ndo.

1 Timotius 3:16

Suk gato men krom ré suksangge, men bi sukduno gato nyim neya Yefun Allah gurik ne ndo wai o re, sato ré: Yefun Yesus ma mo bur re, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An re. Yé ki sukdu subot An frekbot yetu wisyo-wisyo. Yé mwa mo bur ré iwedewe onyar kem mo An re. An it mo gu nim, mo pe gato ndo wai o re.

Yohanes 1:1

Ji krom sukdu subot Yefun Yesus gato ye kendo do Sukdu, An Ye gato ki Yefun Allah bi suktaru nai men yetu jam. Suga ketke bur ré yo mo nde tó, Sukdu ne mó re. Sukdu ne anato tepsu Suktaru kadit Yefun Allah. Sukdu ne sisu Yefun Allah dom. Sukdu ne anato Yefun Allah dakai.

Galatia 4:4

Sarewo tepsu kam gato Yefun Allah fro ne, Yefun Allah syo An bi Gan ma mo bur ré. Nggon dik yo kem su An. An kem mo bur ré, An jammo ye Yahudi bi sukduno.

Ibrani 1:3

Yefun Allah dakai ben sato An rer-rik wai o re tepsu kam, ete An bi Gan ne ben sato An rer-rik wai o re dom tepsu kam yor gato gat men. Yefun Yesus gwat Yefun Allah bi rer ne ma wa men jam. Sane An bi Gan ré anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur ré si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o re, jom suk mwa ne sino.

Yohanes 6:51

Ji dakai anato tepsu sugit gato is kadit gu ma ré. Sugit ré ben yetu mbau. Ye to git sugit ré yo, ye ne kem gesyos it, an mbau to kapyo mato kapyo. Sugit gato Ji bi wa ben yetu mo bur ré mbau anato Ji dakai ku.”

Kolose 1:19

Yefun Allah dakai mit iwa suk mwa gato An ki ne, si, suk mwa gato An ben ne sino, An bi Gan waii ki ete ben sane petok dom.

1 Korintus 15:47

Adam doketke ne Yefun Allah ut kadit bur, wo Adam kedowe ma kadit gu.

Roma 8:3

Sukjimnut gato tik men mit wa ben sukibit ne jom men yetu. Sane anato ye Yahudi bi sukduno-i yo nggiwa ós men nde. Sane Yefun Allah fro bi os-i tara re. Yefun Allah syo An bi Gan ma mo bur ré su kaim ka sa men yetu kaim. Yefun Allah syo An bi Gan ma wa bi nggwa tepsu suktot wa men subere kak sukjimnut ibit ne wé kadit men re.

1 Yohanes 4:14

Men dakai me Yefun Allah bi Gan su men gro re, ete men ki sukdu subot An frekbot nje subere ye jam do, Yefun Allah syogat An bi Gan ma mo bur ré wa An nai men kadit sukye, ete kak os ndo wa men kem ndo to kapyo mato kapyo.

Kolose 2:9

Nin jambot sukdu sane nde, we sukdu gato sangge bor mo Yesus Kristus gato ma mo bur ré su kaim tepsu men yetu. Yesus Kristus, anato tepsu Yefun Allah dakai mo suk mwa ne sino, kwa yo gwet mo nde. Suk mwa gato An ben si An bi suktinggi ne, suk mwa ne tepsu Yefun Allah dakai.

2 Yohanes 1:7

Yé mwa gato kidar suk frekbot bur ré iwedewe mó re. Ye gane ki bi sukdu-i sare do, ”Yesus Kristus ma mo bur ré yo, An yo ma su kaim tepsu yetu nde.” Ye gato ki sukdu sane, an kidar, an ki bi sukdu-i tepsu yekwesu mo yeko wa Kristus.

Wahyu 21:3

Orete yé jam Yefun Allah mo An bi kursi sye ne ki sye sare do, ”Ré yo, Ji, Yefun Allah, ma kem sisu yetu it! Bere Ji ma sisu yetu kem mo nat dik sino re. Yetu ne tepsu Ji bi rus-i re. Ji dakai sisu Ji bi rus-i kem mo nat dik sino tepsu yetu bi Yekwesu ne o re.

Ibrani 5:5

Sane dom, Yefun Allah bes Kristus. Kristus dakai yo bes nggwa tepsu yekwesu gato gum kok wai mo Yefun Allah bi nu nde, wo Yefun Allah bes An ete ki nai An do, ”Nan anato tepsu Ji bi Gan. Su kam ré it, Ji anato tepsu Nan bi Ai it.”

Ibrani 10:5

Sane anato Kristus ma mo bur ré sa, An ki nai Yefun Allah sare do, ”Yé gu suge ete i-dé sye wa tot suktot mo sukibit gato yetu ben ne yo, Nan yo iwa nde. Sane dom, Nan yo iwa yé syo suksom bok yo daret nai Nan wa yé som Nan su nde, wo Nan dakai fro Ji kaim tepsu suktot ne o re.

Yohanes 11:40

Yefun Yesus ki nai Marta do, ”Tomga u Ji ki nai nan sare do, nan onyar kem mo Ji yo, bere nan me Yefun Allah bi suktinggi gato sye bor mo bur ré re.”

Yohanes 3:16

Yefun Allah bi sukjimnut sye kas subot men yetu mo bur ré ndo nde anato An syo An bi Gan ge dik ne ma. An bi Gan ne ma wa kwop win men mo sukibit gato men ben ne, subere ye to onyar kem mo An bi Gan yo, bere ye ne yo ges mo bot gesyos nde, wo ye ne si Yefun Allah kem ndo to kapyo mato kapyo.

Yohanes 2:11

Yefun Yesus ben syur tepsu nau anggur rom ne mo kota Kana mo bur Galilea. Yefun Yesus ben suk doketke gato ben yetu yeket mone. Yefun Yesus kadum An bi Ai bi suktinggi bor wa yetu jam mone. Sane anato An bi pakon onyar kem mo An.

Yohanes 14:6

Yefun Yesus ki nai an do, ”Ji dakai anato tepsu os gato mu mo Yefun Allah. Ji anato tepsu os gato sangge. Ji anato kak os wa yetu kem ndo mone. Yetu yo ku os wa an mu kom mo Ji bi Ai nde, wo an sibot os gato Ji kak ne sa, bere an kom mo Ji bi Ai re.

Ibrani 1:5

we, Yefun Allah ki sukdu ré nai malaikat dik yo dom nde, wo An ki nai An bi Gan sor re, sare do, ”Nan anato Ji bi Gan. Su kam ré it, Ji anato tepsu Nan bi Ai it.” Sane dom, Yefun Allah ki sukdu ré subot malaikat dik yo mo nde, wo An ki subot An bi Gan sor re, sare do, ”Ji anato Pa ne bi Ai, Pa ne anato tepsu Ji bi Pa-i,” Yefun Allah yo ki sukdu kwa we ne subot malaikat yo mo nde.

Yohanes 14:9

Yefun Yesus ki nai Filipus do, ”Ji sisu nin nam it. Filipus, nan jam Ji yo ri nde tó bado? Ye to me Ji it yo, ye ne me Ji bi Ai dom anane it. Sane suma ben anato nan ki do, Ji kadum Ji bi Ai wa nan me ne?

Lukas 9:32

Sugane Petrus si bi yesyim we ne sem mit re. Sarewo an ka gri sun, an ka gri gensu Yefun Yesus kaim rer-rik. An ka gri gensu yetu ge we gato si Yefun Yesus ti mone.

Yohanes 17:22

Yé gato onyar kem mo Ji ne, Ji bes án gum kok, tepsu Nan bes Ji gum kok, subere án sino tepsu dik, tepsu Ji si Nan tepsu dik dom.

Yohanes 3:18

Ye to onyar kem mo An bi Gan yo, ye ne yo ku sukye mo bot gesyos nde. Sarewo ye to yo onyar kem mo An bi Gan nde yo, ye ne gum sok mo ye gato bere ges mo bot gesyos it, we ye ne yo onyar kem mo Yefun Allah bi Gan ge dik ne nde.

Lukas 2:11

Su kam ré, mo Daud bi nat-i ne, nggon dik yo kem su Pa gato bere ós men. Pa ne anato Yekwesu gato Yefun Allah syogat ma mo bur ré wa nai men yetu kadit sukye ete jowa men. Yefun Allah bes Pa ne gum Kristus.

Ibrani 2:11

Yefun Yesus gato tot sukibit gato men yetu ben ne or wé kadit men, An si men yé gato onyar kwo ne sino bi Ai dik sor. Sane anato Yefun Yesus nut mo men do, men tepsu An bi nji, An bi nyanggon, An yo damen wa men nde.

2 Korintus 12:9

ware, Yefun Allah yo nai nde, wo Yefun ki do, ”Bere Ji dakai mewa nan sor, tep it anane. Mo sukye gato nan ku sane sor nan yo nggi o nde yo, bere Ji bi suktinggi bor sye kas subot nan mone o re.” Sane ji iwa ji ki subot pe gato ji yo nggi nde, we ji jam do, bere Kristus bi suktinggi bor sye kas subot ji mone o re.

Kolose 2:3

Kristus anato kadum suk mwa gato Yefun Allah gurik suga nyim tuya ne, ete An ki bor wa men jam, subere kak men bi sukjimnut ko ete ós men jam suk mwa.

Efesus 3:8

Kadit yé mwa gato sok mo Yefun Allah bi rus-i ne sino, ji ré anato gum wok teker mu bur, sarewo Yefun Allah dakai bes ji wa ji mu ki sukdu subot os ndo ne. Ji mu frot sukdu subot Kristus gato ndo wai o re nai yewis yi jam.

Roma 9:5

Men ye Israel anato bi amui mo yepasye sato Abraham e, Isak si Yakub. Men bi amui ne anato pe Kristus. Kristus anato Yefun gato jom suk mwa ne sino, men sino un An to kapyo mato kapyo. Sangge.

Lukas 2:7

Orete Maria kem su Pa yebris, Maria bi Pa dofutmo. Maria nggwot Pa ne su san det, orete mom grem Pa ne sem mo suk gato ka sa ndurbe, gato sagana yé grem suksi bi sugit mó. Maria si Yusuf sem mo suksi bi dur, we nu mwa ne sino mo Betlehem buk wa an we re, nu yo wa yekam gato ma ne sem mo nde, nu mwa ne ses sino.

Suk Gato Yerasul Ben Ne 13:33

An ben wa men it. An sun Yefun Yesus kadit sukkwop, ete bes Yefun Yesus ne tepsu Ye gato ós men. Yeraja Daud krom sukdu mo Mazmur kedowe subot suk gato Yefun Allah ki nai An bi Gan, Yefun Yesus ne, sare do, ’Nan anato Ji bi Gan. Su kam ré it, Ji anato tepsu Nan bi Ai it.’

Yohanes 8:32

Sane yo, bere nin jam Yefun Allah bi sukduno-i gato sangge, ete sukduno gato sangge ne bere sombok nin subere nin gum pakwerut o nde.”

Yohanes 17:24

Ji bi Ai, Nan syo Ji bi pakon nai Ji re. Ji iwa án si Ji kem mo nat gato bere Ji kem mone, subere án me do Ji anato gum kok sye wai o re. Nan yo ut bur ré nde tó, Nan bi sukjimnut sye kas subot Ji, Nan bes Ji gum kok sye wé re.

Yohanes 18:37

Pilatus ki nai Yefun Yesus do, ”Sane Nan anato yeraja e?” Yefun Yesus ki nai an do, ”Nan dakai ki do, Ji anato yeraja. Sangge. Ji bi im pe Ji mo bur ré. Ji ma wa Ji ki rer subot suk dik yo sor re. Ji ma wa Ji ki rer subot suk gato sangge. Ye to iwa sukdu gato sangge, bere án jammo Ji bi sukdu-i.”

Wahyu 19:13

An it san gato ye ras mo yetu dé. An gum do, ”Yefun Allah bi Sukdu.”