Wahyu 21:12 - Abun Scripture

¹² Kota ne bi ros sye gato ti syu kok. Ros syo ne musyu dik sop we mó. Malaikat musyu dik sop we mewa ros syo bok ne. Mo ros syo ne ye krom ye Israel wis musyu dik sop we ne gum mó.

Wahyu 21:12 Referans Kwoze

Wahyu 21:25

Kamdik-kamdik ros syo ne kak pe sor. Ye yo dom suk yo wa nde, we mone noru yo mo nde.

Suk Gato Yerasul Ben Ne 26:7

Suk gato Yefun Allah tom ne, men ye Yahudi yewis musyu dik sop we ne sino onyar kem mó, sane men werwa men ben Yefun Allah bi suk-i noru nombrak sor. Yenggras, ji kwabom kam mo suk gato Yefun Allah tom ne, sane anato ye Yahudi ki ji gum ibit mone.

Ibrani 1:14

Yefun yo ki sukdu bok ne subot malaikat nde, sane malaikat ne te suma gei ne? Malaikat ne anato suk gato da kridek yo mo nde, wo malaikat da gesyos sor ete mó. Yefun Allah yo bes malaikat tepsu An bi Gan gato Yekwesu si Yefun sino nde, wo Yefun syogat malaikat mu ós nje gato bere kem ndo to kapyo mato kapyo mo Yefun Allah bi nat-i ne sor re.

Lukas 16:22

Kom mo rut sa, Lazarus kwop re, ete malaikat ma kar an da gesyos mu mo pe gato Abraham kem mone, an we kem mo pe gato ndo ne. Sane yepasye ne waii kwop o, ete yé bi an mo bur.

Lukas 15:10

Sane dom yetu ge dik yo do kwet kadit sukibit gato an ben ne, ete an brek ma jammo Yefun it yo, Yefun Allah bi malaikat mwa ne mit at wa wai o re. Sangge!”

Matius 18:10

”Sane nin mewa nin nggwa subere nin gwat os ibit wa pa wokgan sato ré nde, we Ji ki sare do, malaikat gato mewa pa ré mu ku Yefun Allah mo gu petok sor. [

Wahyu 21:13

Ros syo gri yo mo kota tak de nim, gri yo o tak de ti, gri yo o tak de nden, gri yo o tak de ket.

Wahyu 21:15

Malaikat gato ki suk su ji gwat suk yo ka sato kwepu emas wa an nat suk mo kota ne. An nat kota bi ros e, an nat kota bi ros syo e ne.

Wahyu 22:14

Ye gato ben Yefun bi suk-i, ben sato án gu án bi san kwo ndo it anane. Ye gato gu án bi san kwo yo, bere án ku os wa án git kwebo mo kweke gato ben yetu kem gesyos. Bere án ku os wa án sok ket ros syo mu mo kota mit ne. Yé ne sa, án mit at wa, we bere Yefun ben sukndo su án re.