Wahyu 12:7 - Abun Scripture

⁷ Orete suk mwa neya mo gu ne gu yu, suk mwa ne ben sukndi su yu mone. Malaikat bi yekwesu ge dik yo gato gum do Mikhael si bi malaikat-i ben sukndi su naga ne. Naga si bi malaikat-i waii futma wa gu Mikhael si bi malaikat-i.

Wahyu 12:7 Referans Kwoze

Yudas 1:9

Án ben sane, sarewo malaikat bi yekwesu dik yo gato gum do Mikhael yo kiket malaikat saga yeguru bok ne kiket nde. Suga nyim ne Mikhael si biris bi yekwesu duwer yu mo Musa mukri. Biris bi yekwesu ki do, ”Ji ana nai et,” wo Mikhael ki do, ”Nde re, ji ana nai et.” Sugane Mikhael yo nai sukjimnut wa kiket biris bi yekwesu nde, wo Mikhael ki sare do, ”Bere Yefun sor ete ki nan gum ibit mo sukibit gato nan ben ré.”

2 Petrus 2:4

Bere Yefun Allah syo sukye nai án mo sukibit gato án ben ne, we suga nyim tuya Yefun syo sukye nai malaikat si nje mwa neya mo sukibit gato yé ben ne re. Malaikat gato ben sukibit, Yefun Allah yo misyar nde, wo Yefun syo sukye nai malaikat ne it. Yefun bare malaikat ne mo pe gato yé wai o re. Yefun Allah rai án ete bok án mo pe gato ndendu yut mo bur desnak kret kam gato Yesus Kristus satu ma ndobot men yetu si malaikat sino. Tepsu kam gane bere An syo sukye nai malaikat ne dom.

Efesus 6:12

Yeko gato ma wa gu men ne, án yetu nde, wo yeko ne anato suk gato i-mok mó gato werwa jom yetu mo bur ré sato: yerom e, aboksye e, malaikat ibit gato bi suktinggi mo gu nim ne si bur ré e ne. Biris mwa ne sino iwa meret os wa ben men brek wé kadit Kristus bi os-i.

Wahyu 20:2

Malaikat but naga, gato ben bi suk-i tepsu kwis kadit nyim tuya gato biris bi yekwesu, gato ye kendo gum do Iblis ne. {Naga ne ka sa nggor bin, sarewo kaim ne sye wai o re.} Malaikat but naga ne ete rai su bus sor kom mo tahun ribu dik.

Wahyu 12:9

Mikhael si bi malaikat-i am naga sye ne wé kadit gu re. Naga gane anato tepsu kwis kadit nyim tuya gato gum do biris bi yekwesu. Yé kendo biris bi yekwesu ne gum do Iblis dom. Naga gane ben kidar yetu mwa mo bur ré ges mo os ibit. Orete Mikhael si bi malaikat-i am naga sye ne si bi malaikat-i sino mu is kadit gu ma mo bur ré re.

2 Tesalonika 1:7

Sane su kam gato men bi Yekwesu Yefun Yesus si malaikat gato nggi is ma kadit gu kadum nggwa nai men yetu, sugane Yefun nai nin si men sino wé kadit sukye gato yé gane ben nai men ne.

2 Korintus 12:7

Sarewo ji ku sukye mo ji kaim tepsu jak gato wai ji ete ngga mo ji ku ne it, subere ji yo bes ji nggwa kok teker mo suk mwa gato ndo wai gato Yefun Allah kadum rer nai ji ne nde. Sukye gato ji ku ne tepsu biris bi yekwesu bi kwesukwam gato an kwam ji su ne, subere ji mit at teker eta nde.

Wahyu 13:7

An ku suktinggi wa futma gu yé gato onyar kem mo Yefun Yesus mo bur ré kwop wé. An nggi wai kadit yé mwa ne re. Yetu mwa ne sino mo buryo-buryo e, wisyo-wisyo e, yeyo-yeyo e, ayo-ayo e ne, yetu mwa ne sino jammo an sor.

Matius 16:27

We sare, Ji, gato Yetu bi Pa, bere Ji si Ji bi malaikat si Ji bi Ai bi suktinggi ne ma, ete syo suk gato ndo nai nje tepsu sukndo gato án ben ne.

Matius 13:41

Bere Yetu bi Pa syogat An bi malaikat mubot Yefun Allah bi rus-i subere malaikat ne nai yé mwa gato ben ye yi ges mo os ibit si yé mwa ne sino gato ben bi suk-i ibit.

Matius 26:53

Ji nggiwa Ji kendo Ji bi Ai bi yesukmise malaikat pasukan musyu dik sop we ma su ré it. Nan jam nde bado?

Matius 25:41

Sane o, bere Ji ki nai yé gato tak Ji de syim jam ne do, ’Nin mu kadit Ji. Yefun Allah dufo mo nin it. Nin mu ngga mo bot gesyos gato Yefun Allah fro wa biris bi yekwesu si bi rus-i ne et.

Matius 24:31

Malaikat dik yo fuf trompet ba sye yo, bere Ji syogat Ji bi malaikat mubot bur ré iwedewe nai yé gato Yefun Allah fro suga nyim wa An nai sok mo An bi rus-i ne. Malaikat ne bere nai yé ne kadit nobu nim, kadit nobu ket, kadit nobu sem, kadit nobu nden. Malaikat nai yé mwa ne sor kadit bur ke kom mo bur naprut ne.”

Ibrani 2:10

Yefun Allah sa, ben bi suk-i tep sino. Yefun gato ut suk mwa ne sino wa An dakai, An misyar yé ben sukye mwa nai Yefun Yesus subere kadum do, Yefun Yesus gum ndo wai o re, kwa yo gwet mo nde, sane Yefun Allah bes Kristus wa kak os ndo wa men yetu. Yefun Yesus ku sukye ket kwayo-kwayo ete An bi An nggwa subere An kak os wa Yefun Allah kar bi pa mwa si Yefun Yesus sino kem mo bi nat-i gato ndo wai o re.

Wahyu 12:8

Sarewo naga yo nggi nde. Sane naga si bi malaikat-i yo ku os wa kem mo gu o nde.