Titus 1:1 - Abun Scripture

¹ Ji gato gum do Paulus anato krom surat ré wa nan, Titus, gato ji bi pa. Ji anato Yefun Allah bi pakwerut. Ji anato Yesus Kristus bi yerasul. Yefun Allah bes ji, ete syogat ji mu duno yé gato Yefun Allah fro suga nyim wa An nai sok mo An bi rus-i ne. Ji mu duno án subere án jam sukdu gato sangge, subere án onyar kem mo Yefun Allah, subere án ben Yefun bi suk-i.

Titus 1:1 Referans Kwoze

Roma 1:1

Ji gato gum do Paulus anato krom surat ré wa nin yé gato onyar kem mo Yefun Yesus gato kem mo kota Roma. Yefun Allah bi sukjimnut sye kas subot nin. Yefun nai nin gum sok mo An bi rus-i it. Yefun Allah bes ji gum yerasul subere ji mu ki sukdu subot os ndo gato Yefun Allah fro wa men yetu subere men ku os wa men gum sok mo An bi rus-i.

1 Timotius 6:3

Yé gato duno nje su sukduno daret gato siri kadit men bi Yekwesu Yesus Kristus bi sukduno-i gato sangge, yé gato duno nje su sukduno gato siri kadit Yesus Kristus bi sukduno-i gato kadum Yefun bi os-i nai men ne yo,

2 Timotius 2:25

Men duno nje gato duwer men it yo, men duno sisu njep sor. Men duno sisu njep, we men iwa kapyo tak Yefun Allah kak ye ne bi sukjimnut subere an kwet kadit os ibit, ete an jammo sukdu gato sangge.

2 Timotius 2:23

Nan me ye gato jimgon duwer yu mo sukdu daret it yo, nan si ye ne duwer yu mo sukdu ne nde, we nan jam do, kom mo rut bere ye maskwa ket yu mo sukdu ne or re.

2 Petrus 1:3

Yefun Allah dakai ben sukndo su men. Yefun ben An bi suk-i ndo wai o re anato An nai men tepsu An bi pá-i subere men jam An kom mo mit. Men jam An kom mo mit sane anato An ben men nggi su An dakai bi suktinggi, subere men ku suktinggi wa men kem not mo bur ré. Men ku suktinggi wa men ben Yefun bi suk-i mo suk mwa ne sino sor.

1 Timotius 3:16

Suk gato men krom ré suksangge, men bi sukduno gato nyim neya Yefun Allah gurik ne ndo wai o re, sato ré: Yefun Yesus ma mo bur re, An kaim tepsu yetu kaim. Yefun Allah Gen kadum do, Kristus sa, ben bi suk-i ne sangge sino. Malaikat mwa ne sino me An re. Yé ki sukdu subot An frekbot yetu wisyo-wisyo. Yé mwa mo bur ré iwedewe onyar kem mo An re. An it mo gu nim, mo pe gato ndo wai o re.

2 Petrus 3:11

Bere Yefun Allah ben suk mwa ré ibit or re, sane men yé gato kem mo bur ré yo, men ben men bi suk-i sa u ne? Men ben sare, men ben Yefun Allah bi suk-i su men mit dik si men onyar dik, men bi men nggwa mo Yefun wa men ben An bi suk-i sor.

1 Timotius 2:4

Yefun Allah iwa men yetu mwa ne sino si An kem ndo to kapyo mato kapyo. An iwa men sino jam An bi sukdu gato sangge.

Kolose 2:2

Suk mwa ré ji ben subere nin si án sino bi sukjimnut nggi, eteyo nin si án bi sukjimnut sye kas subot yu tepsu yedik. Ji ben suk mwa ne subere sukdu gato Yefun Allah gurik kadit men suga nyim tuya ne, nin si án sino jam wa pe kom mo brot marum kai. Sane ji ben suk mwa ne subere án jam do, Kristus gato Yefun Allah yo kadum bor wa men jam suga nyim tuya ne nde, su ré án jam do Kristus bor it.

Filipi 1:1

Ji gato gum do Paulus, ji si Timotius, men ka we gato Yesus Kristus bi pakwerut anato krom surat ré wa nin. Men ka we krom sukdu ré wa nin yé gato onyar kem mo Yesus Kristus gato sum mo nu ari mo kota Filipi. Men ka we krom surat ré wa nin yé gato gum yekwesú mo nu ari si yé gato ós yekwesú mo nu ari ne sino.

2 Korintus 1:1

Ji gato gum do Paulus, gato Yefun Allah bes gum yerasul wa ben Yesus Kristus bi suk-i, ji si men bi nji, Timotius men ka we anato krom surat ré wa nin. Men ka we krom sukdu ré wa nin yé gato onyar kem mo Yefun Yesus mo kota Korintus. Men ka we krom sukdu ré wa nin sor nde, wo men ka we krom sukdu ré wa Yefun Allah bi rus-i mo bur Akhaya ne sino dom.

Suk Gato Yerasul Ben Ne 13:48

Yewis yi jam an we ki sane sa, án mit iwa, án un Yefun Allah mo sukdu subot men bi Yekwesu Yefun Yesus gato ye we ki ne. Ye gato Yefun Allah fro suga nyim wa sok mo An bi rus-i ne, wa kem ndo to kapyo mato kapyo, yé bok ne sino nai sukjimnut do, án brek kadit os nyim, ete án jammo Yesus Kristus tepsu án bi Yekwesu, án onyar kem mo Yefun Yesus it.

Efesus 2:8

Yefun Allah dakai bi sukjimnut sye kas subot men sye teker anato An nai men wa men si An kem ndo to kapyo mato kapyo. Men onyar kem mo Kristus anato An nai men sor. Men dakai yo ben suk yo subere men kem gesyos ne nde, wo Yefun Allah dakai kak os wa men yi sor.

1 Yohanes 2:23

Ye gato bariket Yefun Allah bi Gan, bere ye ne si Yefun Allah yo tepsu dik nde. Sarewo ye to ki do, an onyar kem mo Yefun Allah bi Gan yo, bere ye ne si Yefun Allah tepsu dik dom.

Lukas 18:7

Tepsu yepasye ne syogat ye ben sukye nai ye gato ben sukibit nai nggonna ne, bere Yefun Allah syo sukye nai ye gato ben sukibit nai Yefun bi rus-i gato ndekwa Yefun ós án noru nombrak sor. Bere Yefun Allah ki do, ’Ji me mo et’ bado?

2 Timotius 2:10

Sane sukye bok yo gato ji ku ne, ji misyar, ji duno nje gat sor, we ji bi sukjimnut mo yé gato Yefun Allah fro suga nyim wa An nai sok mo An bi rus-i ne. Ji duno án su sukdu subot Yesus Kristus, subere án kem ndo to kapyo mato kapyo mo os gato Yesus Kristus kak ne. Ji duno án subere án si Yefun Allah kem ndo su yu mo Yefun bi nat-i gato ndo wai o re.

Yakobus 1:1

Ji gato gum do Yakobus, ji ben suk wa Yefun Allah si men bi Yekwesu Yesus Kristus. Ji anato krom surat ré wa nin yé gato sok mo Yefun Allah bi rus-i mo bur ré or sino. Ndo mo nin sino.

Wahyu 1:1

Sukdu mo buku ré anato sukdu gato Yesus Kristus kadum rer nai Yohanes subot suk gato bere men yetu me bor su kam sari ne ma. Yefun Allah kadum suk bok ne nyim nai Yesus Kristus, subere Yesus Kristus waii kadum rer nai Yefun Allah bi pakwerut mwa ne sino jam. Yo nam nde ge, bere Yefun Allah ben suk bok ré bor re. Yesus Kristus syogat An bi malaikat ge dik yo mu ki sukdu subot suk gato bere bor ne rer nai An bi pakwerut gato gum do Yohanes.