Lukas 6:45 - Abun Scripture

⁴⁵ Men yetu tepsu kwe mwa ne dom. Ye gato mit si onyar kwo ndo, ye ne tepsu kwe gato kom ndo. Sane kadit sukndo mwa gato an sum mo an mit ne, suk gato an ki ne ndo dom. Wo ye gato mit si onyar ibit, ye ne tepsu kwe gato kom ibit. Kadit sukibit mwa gato an sum mo an mit ne, suk gato an ki ne ibit dom re. Suk gato men ki ne bere syesyar kadit men mit si men onyar fe!”

Lukas 6:45 Referans Kwoze

Efesus 4:29

Nin ki subot sukdu yo, nin ki subot sukdu gato ibit su nje nde, wo nin ki subot sukdu gato ndo wa ós nje su et. Nin ki suk yo, nin ki sukdu gato ós yé gato ku sukye, subere án mit at mo sukdu gato nin ki ne.

Yohanes 7:38

Ye gato onyar kem mo Ji ne anato tepsu sukdu gato yé krom mo Yefun bi sukdu sare do, ’Kadit an mit syur it tepsu syur nggrup ete syesyar mu nden. Syur ne ben yetu mbau.’ ” (

Kolose 3:16

Kristus bi sukduno-i gato ndo wai ne, nin nai ma nin grem pe mo nin mit si nin onyar et. Nin grem Kristus bi sukduno-i ne pe mo nin mit or wé ete nin duno yu e, nin ki suknapa wa yu e ne. Nin do ki Kristus bi sukduno-i nai yu yo, nin nutbot suk ne pare et. Nin kos sukos mazmur e, nin kos sukos gato nin un Yefun su si sukos gato Yefun Allah Gen ben nin mit it wa nin kos ne. Nin kos, ete nin mit at wa Yefun Allah dom et.

Kolose 4:6

Nin ki suk su yé gato jam nde Yefun yo, nin ki nin bi sukdu-i njep, nin ki sukdu gato ben yé ne mit ndo, nin ki sukdu gato tik án mit sor. Nin fro nin nggwa subere án do ndo nin subot suk yo, nin owa nin ki sukdu gato ndo satu nai án.

Ibrani 8:10

Wo su ré yo, Ji kak os be su yewis ye Israel {gato tepsu Ji bi rus-i,} tepsu suk gato Ji tom ne. Yefun Allah ki do, su kam sari ne ma, Bere Ji bok Ji bi sukduno-i mo án bi sukjimnut, Bere Ji krom Ji bi sukduno-i mo án mit re. Bere Ji, Yefun Allah anato án bi yenggras gato jom án ne, Bere án anato Ji bi rus-i re.

Efesus 5:19

Nin ki suk su yu yo, nin nai sukdu kadit Mazmur e, nin nai sukdu kadit sukos gato yé un Yefun su e, nin nai sukdu kadit sukos subot Yefun e ne sino, ete nin ki sukdu sane nai yu et. Nin kos nin un men bi Yekwesu su nin mit dik si nin onyar dik et.

Suk Gato Yerasul Ben Ne 5:3

Orge Petrus ki do, ”Ananias, ben sa u anato biris bi yekwesu bok nggwa mo nan, ete nan kidar Yefun Allah Gen sare ne? Nan ki do, sugum gato nan ku kadit nan bi bur det gato nan so anare, ondewo, nan dakai grem sugum napyo wa nan dakai. Nan kidar Yefun Allah Gen ko ré go!

Yudas 1:15

wa ndobot yetu mwa ne sino yo, bere Yefun ndobot yé gato bariket Yefun mo sukibit gato án ben ne. Bere Yefun ndobot án mo sukdu mwa gato án kiket Yefun ne, eteyo bere Yefun bare án mo bot gesyos or re.”

Efesus 3:8

Kadit yé mwa gato sok mo Yefun Allah bi rus-i ne sino, ji ré anato gum wok teker mu bur, sarewo Yefun Allah dakai bes ji wa ji mu ki sukdu subot os ndo ne. Ji mu frot sukdu subot Kristus gato ndo wai o re nai yewis yi jam.