Lukas 23:50 - Abun Scripture

^50-51 Yetu ge dik yo, an gum do Yusuf, an ontu mo kota Arimatea, mo bur Yudea. Yusuf ré, an gum sok mo ye Yahudi bi nu ari bi yekwesu. An ben sukndo, an ben an bi suk-i ri-roi. An eswa kam gato Yefun Allah ma jowa men tepsu men bi Yekwesu. An gum da sok mo ye Yahudi bi yekwesu, sarewo an yo simo yekwesu gato nai sukjimnut dik do, án gu Yefun Yesus kwop ne nde.

Lukas 23:50 Referans Kwoze

Suk Gato Yerasul Ben Ne 11:24

Barnabas sa, an ye gato ben sukndo. Yefun Allah Gen bok nggwa mo an pe sor. An onyar kem pe mo Yefun Yesus. Sane Barnabas tik yé mwa mone mit anato yé mwa ne brek kadit os nyim, ete án jammo Yefun Yesus tepsu án bi Yekwesu.

Suk Gato Yerasul Ben Ne 10:22

Ye ka gri ne ki do, ”Ye Roma bi yesukmise bi yesu gato gum do Kornelius syogat men ka gri ma more. An ben sukndo tepsu Yefun Allah mit, an jammo Yefun Allah. Ye Yahudi mwa ne sino un an. An ku Yefun Allah dakai bi malaikat ge dik yo. Malaikat ne syogat Kornelius ndekwa nan mu ku Kornelius mo bi nu, subere Kornelius jam nan bi sukdu et.”

Suk Gato Yerasul Ben Ne 10:2

An si an bi rus-i ne sino jammo Yefun Allah, án sino un Yefun Allah su án mit dik. Kornelius ós ye Yahudi gato yewa suk su suk mwa. An ki suk su Yefun petok sor.

Lukas 2:25

Maria si Yusuf gwat Yesus ma kom mo Yerusalem, sugane yetu ge dik yo gato gum do Simeon kem mo kota Yerusalem ne. Simeon ré, an ben sukndo, an ben suk ri tepsu Yefun Allah mit, we an jammo Yefun. An eswa kam gato bere Yefun Allah syogat Yekwesu ma mo bur Israel gato nai ye Israel wé kadit sukye. Yefun Allah Gen sisu Simeon pe.

Suk Gato Yerasul Ben Ne 13:29

Sane yé ben sukye nai Yefun Yesus tepsu sukdu mwa gato yenabi krom ne. Yé ben sukye ne, orge yé nai An kadit kwesukwin, yé grem An mukri mo jokwak mit.