Lukas 12:37 - Abun Scripture

³⁷ Pakwerut ne bi yenggras do ma ku pá ne yo, pá gato mewa an bi nu tepsu yenggras syogat pá ben ne bere pá ku sukndo mone. Suk gato Ji ki ré suksangge anare, bere yenggras ne win an bi san, yenggras syogat an bi pakwerut ne kem, orete yenggras gwat sugit ma wa pakwerut ne git.

Lukas 12:37 Referans Kwoze

2 Petrus 3:14

Sane it yo, ji bi nji ji bi nyanggon gato ji jimnotku, men eswa kam gato Yefun Yesus tom ré it yo, men kamo nde, wo men wergat men nggwa, subere men ben suk mwa ne ndo sor, kwa yo gato ibit mo An gwem mo nde. Sane dom, men werwa men si Yefun Allah kem ndo su yu petok sor.

Matius 24:42

Sane nin frawa nin nggwa, we nin jam nde kam gato bere nin bi Yekwesu ma su ne.

Filipi 1:23

Ji nutbot os kwa we ré tó. Ji jam nde os u anato ndo wai ne? Kwa dik yo anato ji iwa ji mu kadit bur ré, ete ji mu kem su Yesus Kristus. Ji nut do, ji do si An kem sino it yo, ndo wai o re anane.

1 Korintus 2:9

Sarewo ye krom mo Yefun Allah bi sukdu do, ”Suk gato Yefun Allah fro wa ye gato bi sukjimnut sye kas subot An, anato ndo wai o re, men yetu yo me nde tó. Men yo jam sukdu subot suk ne dom nde. Men yetu bi sukjimnut yo kom mone dom nde.”

Wahyu 14:13

Orete ji jam sukdu kadit gu ne sare do, ”Nan krom sare do: Kadit kam ré yo, yé gato ben Yesus Kristus bi suk-i, ete kwop mone, yé ne sa, mit at wa, we bere Yefun ben sukndo su án.” Yefun Allah Gen ki do, ”Sangge, yé ne ku suk mwa gato ndo mo suk gato án ben ne. Sane yé ne yo mitwa ben suk mwa o nde, wo án kem not kadit re.”

2 Petrus 1:11

Sane bere men bi Yekwesu Yesus Kristus kak An mit wa men sok mo pe gato gesyos, ete men si An kem mone. Men bi Yekwesu Yesus Kristus gato kak os wa men sok mo Yefun Allah bi rus-i ne, bere An jom yé mwa ne sino mo pe ne.

Yohanes 12:26

Ye gato bi nggwa mo Ji wa an ben Ji bi suk-i ne yo, ye ne si Ji mu sino. Pe gato Ji mó, Ji bi pakon ne sisu Ji mone dom. Ye gato bi nggwa mo Ji wa an ben Ji bi suk-i yo, bere Ji bi Ai bes ye ne gum kok.”

Lukas 21:36

Nin frawa nin nggwa pe et! Nin ki suk su Yefun Allah petok sor subere An ós nin titi fro wé kadit sukye gato bere ma ne. Nin ndek mo Yefun Allah dom subere su kam gato Ji, gato Yetu bi Pa ma ndobot nin yetu ne, nin yo damen mo suk gato nin ben ne nde.”

Wahyu 7:17

Án yo ku sukye sane o nde, we Domba Gan gato kem mo kursi miten ne, bere mewa án. Bere Domba Gan gwat án mu mo syur nggrup gato ben án mbau. Bere Yefun Allah singgri án gro rom ne sino sa kadit án gro re.”

Wahyu 3:21

Yé gato nggi wai kadit bur ré bi suk-i yo, bere Ji bes án gum kok. Bere án gum kok tep wa án si Ji tepsu yekwesu. Bere Ji ki nai yé ne do, ”Nin ma, nin sisu Ji kem kok mo Ji bi nat ré, men anato gum Yekwesu sino.” Ji anato nggi wai kadit bur ré bi suk-i, anato Ji si Ji bi Ai kem kok mo An bi nat-i re.

Filipi 1:21

Ji dakai bi sukjimnut do, ji mbau yo, ji ben suk wa Yesus Kristus sor, wo ji kwop yo, ji ku suk gato ndo wai it anane.

Lukas 17:8

Sane nde, yenggras ne yo ki sane nde, wo an ki nai an bi pakwerut ne do, ’Nan ma kon sugit et. Sugit jon or, nan gwat ma, nan wen wa ji git et. Ji do git or, nan waii git wari.’

Lukas 12:43

Pakwerut ne bi yenggras do ma ku pa ne yo, pa gato benbot suk gato bi yenggras syogat pa ben ne, bere pa ku sukndo mone.

Lukas 12:36

Sato yenggras dik yo bi pakwerut ge bok yo eswa án bi yenggras satu kadit yé konwa ye we kra yu. Pakwerut ge bok ne kem su án fra ete eswa án bi yenggras satu ma. Yenggras ne do satu ma yo, an do nggo nusyo yo, pakwerut ne ma kekro ete kak nusyo wa án bi yenggras.

Lukas 22:27

Ye gato gum kok wai ne anato ye gato kem wa git sugit bado, pa gato ós wa gwat sugit ma ne, e? Men sino jam do, ye gato kem git sugit anato gum kok wai kadit pa gato an syogat gwat sugit ma ne. Sarewo Ji ben Ji bi suk-i su nin ré, Ji syogat nin ós Ji tepsu yepasye nde, wo Ji ós nin, Ji tepsu pakwerut wa nin.

Wahyu 16:15

Yesus Kristus ki sukdu subot kam sye ne do, ”Nin jammo suk gato Ji ki ré et. Bere Ji ma tepsu yegitsi. Kam gato Ji ma su ne, nin jam nde re, bere nin gensu sor. Ye gato frawa nggwa pe sor, ete fro bi san ndek, subere án mu yo, án kawarun nde, án damen dom nde, yé ne sa, mit at wa, we bere Yefun ben sukndo su yé ne re.”